গুৱাহাটী মহানগৰীত কৰ্তব্যৰত এগৰাকী মহিলা সাংবাদিকক প্ৰাণনাশৰ ভাবুকি দিয়াক কেন্দ্ৰ কৰি চাঞ্চল্যৰ সৃষ্টি হৈছে।
এন ই ফকাচ ডট কম নামৰ ৱেব পৰ্টেলটোৰ সম্পাদক সংগীতা শইকীয়াক প্ৰাণনাশৰ ভাবুকি দিয়া হৈছে বুলি অভিযোগ উত্থাপন হৈছে ৷
ইতিমধ্যে, উক্ত ঘটনা সন্দৰ্ভত দিচপুৰ আৰক্ষী থানাত এজাহাৰ দাখিল কৰিছে মহিলা সাংবাদিক গৰাকীয়ে।
” আজি দিনৰ ১১.৪৫ বজাত শৈলেন ডেকা নামৰ ভিডিও এডিটৰ এগৰাকীয়ে লগত সন্দিপা সিনহা নামৰ যুৱতী এগৰাকীৰ সৈতে আহি মোৰ কাৰ্যালয়ৰ প্ৰবেশ দুৱাৰত উপস্থিত হৈ অশ্লীলভাৱে গালি-গালাজ কৰে ৷ লগতে দুৱাৰত ঢকিয়াই প্ৰাণনাশৰ ভাবুকি দিয়ে,” এজাহাৰত সংগীতা শইকীয়াই উল্লেখ কৰে।
এজাহাৰখনত মহিলা সাংবাদিক গৰাকীয়ে চৰম নিৰাপত্তাহীনতাত ভোগা বুলিও উল্লেখ কৰি নিৰাপত্তা প্ৰদানৰ বাবে আহ্বান জনায়।
আনহাতে, উক্ত ঘটনাৰ উপযুক্ত তদন্ত বিচাৰি দিচপুৰ থানাত এজাহাৰ দাখিল কৰি সংগীতা শইকীয়াই ৰাজ্যত মহিলা সাংবাদিকৰ নিৰাপত্তা সুনিশ্চিত কৰাৰ বাবে প্ৰশাসনক আহ্বান জনায়।
