গুৱাহাটীত অসম প্ৰকাশন পৰিষদৰ সচিব প্ৰমোদ কলিতাৰ আৰু বাংলাদেশৰ উপ উচ্চায়ুক্ত ড০ শ্বাহ মহম্মদ তনবিৰ মনছুৰৰ মাজত অনুষ্ঠিত এখন বৈঠকত লোৱা সিদ্ধান্ত অনুসৰি, বাংলাদেশৰ প্ৰায় ১০টা প্ৰকাশন গোষ্ঠীয়ে এইবাৰৰ ৩২ সংখ্যক গুৱাহাটী গ্ৰন্থমেলাত অংশগ্ৰহণ কৰিব।
কলিতাই কৈছে যে অহা ২৫ ডিচেম্বৰৰ পৰা আৰম্ভ হ’বলগীয়া গুৱাহাটী গ্ৰন্থমেলাস্থলীত বাংলাদেশৰ প্ৰকাশন গোষ্ঠীসমূহৰ বাবে আছুতীয়া পেভিলিয়নৰ ব্যৱস্থা কৰা হ’ব। এই অনুষ্ঠানত ভাৰত-বাংলাদেশ মিত্ৰতাৰ ওপৰত এখন আলোচনাচক্ৰৰো আয়োজন কৰা হ’ব। বাংলাদেশৰ উপ উচ্চায়ুক্তগৰাকীয়ে গুৱাহাটী গ্ৰন্থমেলাত বালাদেশৰ প্ৰকাশন গোষ্ঠীসমূহৰ অংশগ্ৰহণ আৰু আলোচনাচক্ৰত অংশগ্ৰহণ নিশ্চিত বুলি প্ৰকাশন পৰিষদক আশ্বাস প্ৰদান কৰিছে।
জানিব পৰা মতে গ্ৰন্থমেলাত অংশগ্ৰহণ কৰিবলগীয়া বাংলাদেশৰ প্ৰকাশন গোষ্ঠীসমূহৰ নাম হৈছে বাংলা প্ৰকাশ, সন্দেশ, ভাষাচিত্ৰ, নবযুগ প্ৰকাশনী, চাৰুলিপি প্ৰকাশন, জাতীয় সাহিত্য প্ৰকাশ, আৰ্দন পাব্লিকেশ্যন (Aardon Publication), দীব্য প্ৰকাশ, মূৰ্ধণ্য পাব্লিছাৰ্ছ আৰু ৰোমান পাব্লিছাৰ্ছে (Murdhanya and Raman Publishers)।
