গুৱাহাটী ক্ৰীড়া সন্থাৰ উদ্যোগত নেহেৰু ষ্টেডিয়ামত চলি থকা ‘চি’ ডিভিজন ফুটবল লীগৰ শুকুৰবাৰে গুৱাহাটী এফ চি আৰু ৰয়েলছ ক্লাবৰ মাজত অনুষ্ঠিত হোৱা তীব্ৰ উত্তেজনাপুৰ্ণ খেলখন নিৰ্ধাৰিত সময়ত ৩-৩ গ’লত অমীমাংসিত ৰূপে সামৰণি পৰে।
ৰয়েলছৰ হৈ দিগন্ত বৰদলৈয়ে এটা গ’ল দিয়াৰ আৰু সমগ্ৰ খেলখনত উজ্জীৱিত প্ৰদৰ্শন দাঙি ধৰা দেৱজিৎ বড়োই দুটা গ’ল দিয়ে। গুৱাহাটী এফ চিৰ হৈ লামছুদফাৰমে দুটা আৰু হাউদিপে এটা গ’ল কৰি খেলখন ড্ৰৰূপে সামৰণি মৰাত সহায় কৰে।
খেলখনৰ প্ৰথমাৰ্ধত দুয়োটা দলেই সমানে সমানে প্ৰদৰ্শন কৰিছিল যদিও বিৰতিৰ পাছত ৰয়েলছে বেছিভাগ সময় বল নিজৰ দখলত ৰাখিবলৈ সক্ষম হয়, তথাপি খেলখনত জয়লাভ কৰিবলৈ সক্ষম নহ’ল। আনহাতে, গুৱাহাটী এফ চিৰ গ’লৰক্ষকৰ সুন্দৰ প্ৰদৰ্শনৰ বাবে দলটোৱে কেইবাটাও নিশ্চিত বিপদৰ পৰা হাত সাৰে।
প্ৰতিযোগিতাখনৰ আন এখন খেলত গুৱাহাটী চিটি এফ চি মুখামুখি হৈছিল য়ুনাইটেড এফ চিৰ। নিৰ্ধাৰিত সময়ত দুয়োটা দলেই এটাও গ’ল স্কোৰ কৰিব নোৱাৰাত খেলখন ড্ৰ ৰূপে সমাপ্ত হয়।
উল্লেখযোগ্য যে, প্ৰতিযোগিতাখনৰ আজিৰ খেল দুখনত অতি কমসংখ্যক দৰ্শকহে উপস্থিত থাকে।
