ক্ষমতাৰ মোহ নে ৰাজনীতিৰ নিচা : কঁকাল দাঙিব নোৱাৰিলেও নিৰ্বাচনী ৰণলৈ মন বিজয়াৰ
লোকসভা নিৰ্বাচনৰ বাবে সাজু হৈছে বৰ্ষীয়ান ৰাজনৈতিক নেত্ৰী বিজয়া চক্ৰৱৰ্তী। বয়সে চাৰি কুৰিৰ দেওনা গৰকিলেও বা অন্যৰ সহায় নোলোৱাকৈ চলা-ফুৰা কৰিব নোৱাৰিলেও এইবাৰ পুনৰ গুৱাহাটী লোকসভা সমষ্টিৰ পৰা প্ৰতিদ্বন্দ্বিতাৰ বাবে মন মেলিছে বৰ্ষীয়ান নেত্ৰীগৰাকীয়ে।
১৯৭৭ চনতেই মঙ্গলদৈ জিলা জনতা দলৰ সম্পাদিকা হিচাপে নিজৰ ৰাজনৈতিক জীৱন আৰম্ভ কৰা চক্ৰৱৰ্তীয়ে। ১৯৮৬ চনত অগপৰ ৰাজ্যসভাৰ সাংসদ হিচাপে অসমৰ পৰা নিৰ্বাচিত হৈছিল। বৰ্তমান চক্ৰৱৰ্তীয়ে বিজেপিৰ পৰা গুৱাহাটী লোকসভা সমষ্টিৰ সাংসদ হিচাপে কাৰ্য্যনিৰ্বাহ কৰি আছে।
প্ৰশ্ন হয়, ৪০ বছৰৰো অধিক সময় ৰাজনৈতিক ক্ষেত্ৰত দপ-দপাই থাকিও বৰ্তমানো ক্ষমতাৰ মোহ এৰিব পৰা নাই কিয় বৰ্ষীয়ান ৰাজনৈতিক নেত্ৰীগৰাকীয়ে? নে বয়সে ৮০ গৰকিলেও নিজৰ ৰাজনৈতিক নিচাৰ বাবে এইবাৰো গুৱাহাটী সমষ্টিৰ পৰা প্ৰতিদ্বন্দ্বিতা কৰিব বিচাৰিছে সাংসদগৰাকীয়ে।
ইপিনে, গুৱাহাটী লোকসভা সমষ্টিৰ পৰা বৰ্তমানৰ দক্ষ মন্ত্ৰী হিমন্ত বিশ্ব শৰ্মাৰ নাম অধিক চৰ্চিত হৈ আছে যদিও বৰ্তমান চক্ৰৱৰ্তীৰ দখলত থকা সমষ্টিতো হিমন্তক এৰি দিব খোজা নাই। বৰঞ্চ তেজপুৰৰ সাংসদ আৰ পি শৰ্মাৰ ঠাইতহে হিমন্তই নিৰ্বাচন খেলাৰ পোষকতা কৰে সাংসদজনে।
মই গুৱাহাটী সমষ্টিৰ পৰা টিকট বিচাৰিছো। দলে দিলে গুৱাহাটীৰ পৰা নিৰ্বাচন খেলিব বিচাৰো। গুৱাহাটীৰ ৰাইজেও মই প্ৰতিদ্বন্দ্বিতা কৰাটো বিচাৰে। মোৰ বিশ্বাস দলে টিকট দিলে মই জয়ী হ’ম। তেজপুৰত আৰ পি শৰ্মাৰ সলনি হিমন্ত বিশ্ব শৰ্মা উঠক। আজি সংবাদ মাধ্যমৰ আগত এই মন্তব্য কৰে সাংসদ বিজয়া চক্ৰৱৰ্তীয়ে।
অৱশ্যে, এক সুত্ৰৰ পৰা জানিব পৰা মতে কংগ্ৰেছত থকাৰে পৰা হিমন্ত বিশ্বৰ সৈতে বিজয়া চক্ৰৱৰ্তীয়ে এক সু-সম্পৰ্ক বজাই ৰাখিছে। সেইদৰে হিমন্ত বিশ্ব শৰ্মাই গুৱাহাটীৰ পৰা লোকসভা নিৰ্বাচনত প্ৰতিদ্বন্দ্বিতা কৰিলে তেওঁ টিকটৰ দাবীদাৰ নহয় বুলিও পূৰ্বতে উল্লেখ কৰিছিল।
তাৰ পাছতেই হিমন্ত বিশ্ব শৰ্মাই তেজপুৰ লোকসভা সমষ্টিৰ পৰা প্ৰতিদ্বন্দ্বিতা কৰিব বুলি ব্যাপক চৰ্চা চলাত সাংসদজনে বিজেপিৰ পৰা টিকট বিচাৰি আবেদন জনাইছে।
তদুপৰি, সভাই-সমিতিয়ে আনৰ সহায় নোহোৱাকৈ যাব নোৱাৰা বৰ্ষীয়ান নেত্ৰীগৰাকীয়ে বৰ্তমান অসুস্থ নহয় তথা ৰাইজৰ সৈতে থাকিলেহে সুস্থ হৈ থাকিব বুলি সংবাদমাধ্যমৰ জৰিয়তে দাবী কৰিছে।
প্ৰশ্ন হয়, মন্ত্ৰী হিমন্ত বিশ্ব শৰ্মাৰ প্ৰতি গুৱাহাটীৰ সাংসদ বিজয়া চক্ৰৱৰ্তীৰ ইমান দৰদ কিয়? মন্ত্ৰীগৰাকীক বাদ দি বিজেপিৰ অইন নেতাক সাংসদগৰাকীয়ে এৰি দিব খোজা নাই কিয়?
প্ৰসংগক্ৰমে উল্লেখ কৰিব পাৰি যে, গুৱাহাটী লোকসভা সমষ্টিৰ পৰা বিজেপিৰ ৰাজ্যিক মুখপাত্ৰ ৰূপম গোস্বামী, কুইন ওজা, ড০ প্ৰদীপ ঠাকুৰীয়া আৰু হেমাংগ ঠাকুৰীয়াইয়ো প্ৰাৰ্থিত্ব প্ৰত্যাশীৰ দৌৰত নামি পৰা বুলি দাবী কৰিছে।