গুৱাহাটীৰ বৰ্ষাপাৰাৰ ড০ ভূপেন হাজৰিকা ক্ৰিকেট ষ্টেডিয়ামত অনুষ্ঠিত হোৱা ভাৰত-ৱেষ্ট ইণ্ডিজৰ মাজৰ প্ৰথমখন এদিনীয়াত ভাৰতে ৱেষ্ট ইণ্ডিজ দলক ৮ উইকেটত পৰাস্ত কৰে।
মেচখনত ৱেষ্ট ইণ্ডিজ দলে নিৰ্ধাৰিত ৫০ অভাৰত ভাৰতক ৩২৩ ৰানৰ এক বিশাল লক্ষ্য বান্ধি দিছিল যদিও ভাৰতে ৪২.১ অভাৰতে মাত্ৰ দুটা উইকেট হেৰুৱাই সহজে বিজয় লক্ষ্যত উপনীত হয়।
মেচখনত ভাৰতৰ হৈ অধিনায়ক বিৰাট কোহলীয়ে ১০৭টা বলত বিস্ফোৰক ১৪০ ৰানৰ ইনিংছ খেলাৰ লগতে অপেনাৰ ৰোহিত শৰ্মাইও শতকীয় ইনিংছ খেলে। ৰোহিত শৰ্মাই ১১৭টা বলত ১৫২ ৰান কৰি অপৰাজিত হৈ ৰয়।
আজিৰ মেচখনত ব্যক্তিগত ৩৬ নম্বৰ শতক অৰ্জন কৰা ভাৰতীয় অধিনায়ক বিৰাট কোহলিয়ে মেচখনৰ শ্ৰেষ্ঠ খেলুৱৈৰ সন্মান লাভ কৰে। আনহাতে ৰোহিত শৰ্মাই এদিনীয়াত নিজৰ ব্যক্তিগত ২০ নম্বৰ শতকটো সম্পূৰ্ণ কৰে।
উল্লেখ্য যে টছত জয়ী হৈ প্ৰথমে বেট ধৰা ৱেষ্ট ইণ্ডিজ দলে চিমৰন হেটমেয়েৰৰ বিস্ফোৰক ১০৬ ৰান আৰু অপেনাৰ কাইৰন পাৱেলৰ ৫১ ৰানৰ অৰ্ধশতকীয় ইনিংছৰ সহায়ত নিৰ্ধাৰিত ৫০ অভাৰত ৮ উইকেট হেৰুৱাই ৩২২ ৰান কৰিবলৈ সক্ষম হয়।
ইফালে ভাৰতীয় দলে ৩২৩ ৰানৰ লক্ষ্য আগত লৈ নিজৰ ইনিংছ মুকলি কৰি আৰম্ভণিতে অপেনাৰ শিখৰ ধাৱানৰ উইকেটটো হেৰুৱাই শলঠেকত পৰিছিল যদিও অধিনায়ক বিৰাট কোহলি আৰু ৰোহিত শৰ্মাৰ দৰ্শনীয় বেটিঙৰ সহায়ত মেচখন সম্পূৰ্ণৰূপে নিজৰ নিয়ন্ত্ৰনত আনিবলৈ সক্ষম হয়। দুযোজন খেলুৱৈয়ে ২৪৬ ৰানৰ এক গুৰুত্বপূৰ্ণ পাৰ্টনাৰছিপ আগবঢ়ায়।
মেচখনত ৱেষ্ট ইণ্ডিজৰ দলৰ বলাৰে ভাৰতীয় অধিনায়ক বিৰাট কোহলি আৰু ৰোহিত শৰ্মাৰ ওপৰত কোনো ধৰণৰ চাপ পেলাবলৈ সক্ষম নহ’ল। ৱেষ্ট ইণ্ডিজৰ হৈ থমাছ আৰু বিশ্বুৱে এটাকৈ উইকেট দখল কৰে।
আনহাতে ভাৰতৰ হৈ মহম্মদ চামিয়ে ২টা, চাহালে ৩টা, খলীল আহমেদে ১টা আৰু ৰবিন্দ্ৰ জাদেজাই দুটাকৈ উইকেট দখল কৰিবলৈ সক্ষম হৈছিল।
