গুৱাহাটী আৰক্ষীয়ে ১৪ জুন শুকুৰবাৰে গুৱাহাটীত জনসাধাৰণৰ বাবে বিভিন্ন অভিযানৰ সময়ত উদ্ধাৰ হোৱা কিন্তু দাবী নোহোৱাকৈ থকা বৃহৎ সংখ্যক চুৰি মোবাইল ফোন হেণ্ডছেট আৰু লেপটপ প্ৰদৰ্শন কৰিব।
গুৱাহাটী আৰক্ষী আয়ুক্ত দিগন্ত বৰাই বৃহস্পতিবাৰে এক বিবৃতিত কয় যে শেহতীয়াকৈ গুৱাহাটী আৰক্ষীয়ে ঘৰৰ পৰা চুৰি কৰি লোৱা অথবা দুস্কৃতিকাৰীয়ে কাঢ়ি নিয়া বহু সংখ্যক মোবাইল ফোন হেণ্ডছেট আৰু লেপটপ উদ্ধাৰ কৰিছে।
এই উদ্ধাৰ হোৱা কিছুমান সামগ্ৰী মালিকক ঘূৰাই দিয়াৰ বিপৰীতে মালিকক বিচাৰি নোপোৱা এতিয়াও প্ৰায় ৬৫০টা এনে ফোন আৰু ১৬টা লেপটপ আৰক্ষীৰ ওচৰত দাবী নকৰাকৈ পৰি আছে বুলিও জানিব পৰা গৈছে।
পুৱা ১১ বজাৰ পৰা কটন বিশ্ববিদ্যালয়ৰ বিপৰীতে পান বজাৰৰ হেম বৰুৱা পথত থকা আৰক্ষী আয়ুক্তৰ কাৰ্যালয় চৌহদত সকলো দাবী নকৰা সামগ্ৰী জনসাধাৰণৰ বাবে প্ৰদৰ্শন কৰা হ’ব। শেহতীয়াকৈ একেধৰণৰ বস্তু হেৰুওৱা ব্যক্তিসকলে মালিকীস্বত্বৰ প্ৰমাণ দাঙি ধৰি তথা প্ৰদৰ্শন কৰি আৰক্ষী আয়ুক্তৰ কাৰ্যালয়লৈ গৈ নিজৰ গেজেট চিনাক্ত কৰি দাবী কৰিব পাৰে বুলিও ইয়াত উল্লেখ কৰা হৈছে।
ইয়াৰে অধিকাংশ সামগ্ৰী উদ্ধাৰ হৈছে মহানগৰীৰ পল্টন বজাৰ থানাৰ অধীনত। আনহাতে, পানবজাৰ থানাৰ অধীনত ১২টা, লতাশিল আৰক্ষী থানা (৬), নুনমাটি আৰক্ষী থানা (৬) চান্দমাৰী আৰক্ষী থানা (৫), প্ৰাগজ্যোতিষপুৰ আৰক্ষী থানা (৪) আৰু গীতানগৰ আৰক্ষী থানা (৩) উদ্ধাৰ হৈছে।
