বায়ু প্ৰদূষণে ভয়াৱহ ৰূপ লৈছে গুৱাহাটীত। বায়ু প্ৰদূষণৰ ক্ষেত্ৰত ৰাষ্ট্ৰীয় ৰাজধানী দিল্লীকো অতিক্ৰম কৰিছে গুৱাহাটী মহানগৰীয়ে। ৰাজ্যত শীতৰ প্ৰকোপ বৃদ্ধিৰ লগে লগে বায়ু প্ৰদূষণে ভয়াৱহভাৱে বৃদ্ধি পোৱা দেখা হৈছে। কেন্দ্রীয় প্রদূষণ নিয়ন্ত্রণ পৰিষদৰ তথ্য অনুসৰি, যোৱা ২০ জানুৱাৰীৰ পৰাই পর্যন্ত গুৱাহাটীৰ লগতে ৰাজ্য কেবাখনো নগৰত বায়ুৰ গুণমান অধিক নিম্নগামী হৈ ‘বেয়া’ শ্ৰেণীত অন্তর্ভুক্ত হৈছে।
কেন্দ্রীয় প্রদূষণ নিয়ন্ত্রণ পৰিষদৰ তথ্য অনুসৰি, যোৱা সপ্তাহতকৈ চলিত সপ্তাহত গুৱাহাটীৰ বায়ুৰ গুণমান সূচাংক অধিক নিম্নগামী হৈছে। বুধবাৰে গুৱাহাটীৰ বায়ুৰ সৰ্বোচ্চ গুণমান সূচাংক হৈছে ৪০০ আৰু সৰ্বনিম্ন সূচাংক ৩০৪। পৰিষদৰ তথ্য অনুসৰি গুৱাহাটী মহানগৰৰ গঢ় সূচাংক হৈছে ৩৪৮। এই সূচাংকই গুৱাহাটীৰ বায়ু প্ৰদূষণৰ ভয়ংকৰ অৱস্থাকে সূচাইছে।
উল্লেখ্য যে, কেন্দ্ৰীয় প্ৰদূষণ নিয়ন্ত্ৰণ পৰিষদে এ কিউ আই ০-৫০ৰ ভিতৰত থাকিলে ভাল। ৫১-১০০ৰ ভিতৰত থাকিলে সন্তোষজনক আৰু ১০১-২০২ ভিতৰত থাকিলে মধ্যমীয়া বুলি গণ্য কৰা হয়। ইয়াৰ বিপৰীতে ২০১-৩০০ৰ ভিতৰত থাকিলে বেয়া আৰু ৩০১-৪০০ৰ ভিতৰত থাকিলে অতি বেয়া হিচাপে গণ্য কৰা হৈছে।
গুৱাহাটীত চলি অবাধ নিৰ্মাণ কাৰ্যকে ইয়াৰ প্ৰধান কৰা বুলি ধাৰণা কৰা হৈছে। ইয়াৰোপৰি যান-বাহন, ইয়াৰ দাঁতি কাষীয়া অঞ্চলসমূহ আৰু পাহাৰসমূহত চলি থকা খনন, ব্ৰহ্মপুত্ৰ আৰু অন্য উপনৈৰপৰা উৰা অহা ধূলি আদিয়ে গুৱাহাটীৰ বায়ুক অধিক প্ৰদূষণ কৰি তুলিছে। চৰকাৰী-বেচৰকাৰী নির্মাণ তথা আন্তঃগাঁথনি, উন্নয়নমূলক কাৰ্যৰ বাবেই ৰাজ্যৰ বিভিন্ন চহৰৰ বায়ুৰ গুণমান শোচনীয় হৈ পৰিছে। ইয়াৰ বিপৰীতে চৰকাৰ প্ৰশাসনে কোনো ধৰণৰ সতৰ্কতামূলক ব্যৱস্থা নাই। বায়ু প্ৰদূষণৰ এনে মাত্ৰাই মহানাগৰিকৰ স্বাস্থ্যতো বিৰোপ প্ৰভাৱ পেলাইছে।
কেন্দ্রীয় প্রদূষণ নিয়ন্ত্রণ পৰিষদৰ তথ্য অনুসৰি, ২০১-৩০০ এ কিউ আইৰ বায়ুত দীর্ঘ সময় ধৰি থাকিলে বেছিভাগ লোকৰেই উশাহ-নিশাহত সমস্যাৰ সৃষ্টি হয় । ১০১-২০০ৰ ভিতৰত এ কিউ আই হ’লেই এজমা থকা, হৃদৰোগ আৰু হাওঁফাওঁৰ ৰোগত আক্রান্ত লোকে উশাহ-নিশাহৰ সমস্যাত ভোগে।
দীৰ্ঘদিন ধৰি গুৱাহাটীৰ বায়ু প্ৰদূষণৰ সূচাংক এইদৰে নিম্নগামী হৈ থাকিলে মহানাগৰিক জীৱন যাত্ৰা দুবিৰ্ষহ হৈ পৰাতো প্ৰায় নিশ্চিত।
