Raj Nandini Kalita in KBC গুৱাহাটীৰ ছাউথ পইন্ট স্কুলৰ অধ্যয়নৰত ৰাজনন্দিনী কলিতা নামৰ ১৪ বছৰীয়া ছাত্ৰীগৰাকীয়ে ৰাষ্ট্ৰীয় টেলিভিশ্বনৰ জনপ্ৰিয় শ্ব’ কৌন বনেগা ক্ৰোৰপতিত অংশগ্ৰহণ কৰি এদিন ভাৰতৰ ৰাষ্ট্ৰপতি হোৱাৰ তেওঁৰ সপোনৰ কথা ব্যক্ত কৰে।
ৰাজনন্দিনীৰ প্ৰেৰণাদায়ী ভাষণে খোদ অমিতাভ বচ্চনকো মুগ্ধ কৰিবলৈ সক্ষম হয়।
অমিতাভ বচ্চনে কয়,’’ডাঙৰ ডাঙৰ নেতাই এনে ভাষণ দিব নোৱাৰে।‘’
ৰাজনন্দিনীয়ে তেওঁৰ সাৱলীল ভাষণত কয়, ’’মই এখন ভাৰতৰ সপোন দেখো য’ত সকলো নাগৰিকে শিক্ষিত আৰু এনে এখন দেশ যি সদায় প্ৰগতিৰ দিশে প্ৰথম পদক্ষেপ লয়, এখন স্বাধীনতাৰ ভাৰতবৰ্ষ, যিখনে প্ৰতিটো ক্ষেত্ৰতে নিৰৱিচ্ছিন্নভাৱে এখোজ আগবাঢ়ি থাকিব পাৰে।‘’
ছাত্ৰীগৰাকীয়ে বিকাশৰ দিশে আগবাঢ়িবলৈ ১০০শতাংশ সাক্ষৰ ভাৰতৰ কামনা কৰে। ‘’এইটোৱে মোৰ সপোন আৰু ইয়াক বাস্তৱায়িত কৰিবলৈ মই ভাৰতৰ ৰাষ্ট্ৰপতি হ’ব বিচাৰো।‘’
ৰাজনন্দিনীয়ে কয়,’’ মই ভাবো যে দৰিদ্ৰতা আৰু অজ্ঞতা দূৰীকৰণৰ বাবে শিক্ষাই হৈছে মুখ্য সমাধান।‘’
ছাত্ৰীগৰাকীয়ে তেওঁৰ স্পষ্ট আৰু আকৰ্ষণীয় ভংগীৰে বক্তব্য প্ৰকাশ কৰি কয়,’’মই যদি ভাৰতৰ ৰাষ্ট্ৰপতি হওঁ, মই এই নিৰ্দ্ধাৰিত লক্ষ্যসমূহ পূৰণ কৰিবলৈ সৰ্বতোপ্ৰকাৰে চেষ্টা কৰিম। মোৰ ভাৰতৰ বাবে থকা সপোন বাস্তৱায়িত কৰিম আৰু আনকো ইয়াৰ প্ৰতি উদ্বুদ্ধ কৰিম।‘’
Also Read:Omicron Threat: দক্ষিণ আফ্ৰিকাৰ পৰা ভাৰতলৈ অহা ৬ জন ব্যক্তিৰ দেহত ধৰা পৰিছে কৰ’না
ৰাজনন্দিনীৰ এই ভাষণত উপস্থিত সকলোৱে জাউৰিয়ে জাউৰিয়ে হাত চাপৰি বজাই ছাত্ৰীগৰাকীক আদৰণি জনায়।
ৰাজনন্দিনীয়ে ইতিমধ্যে কেবিচিত ভালদৰে খেলি বিভিন্ন প্ৰশ্নৰ উত্তৰ দিছে আৰু পৰৱৰ্তী খণ্ডত তেওঁ ১কোটি টকাৰ লক্ষ্যৰে খেলত অগ্ৰসৰ হ’ব।
