অহা ২১ অক্টোবৰত ভাৰত আৰু ৱেষ্ট ইণ্ডিজৰ মাজত অনুষ্ঠিত হ’বলগীয়া এদিনীয়া আন্তৰ্জাতিক ক্ৰিকেট খেলখনৰ বাবে সাজু হৈ উঠিছে গুৱাহাটীৰ বৰ্ষাপাৰা ষ্টেডিয়াম।
অহা ১১ নৱেম্বৰলৈকে চলিবলগীয়া দুয়োখন দেশৰ এই শৃংখলাটোত দুখন টেষ্ট মেচ, পাঁচখন এদিনীয়া আৰু তিনিখন টি-টুৱেন্টি খেল অন্তৰ্ভুক্ত হৈছে।
সাত সপ্তাহ জুৰি চলিবলগীয়া এই ঘৰুৱা শৃংখলাটো ভাৰতে ৱেষ্ট ইণ্ডিজৰ বিৰুদ্ধে অহা ৪ অক্টোবৰত ৰাজকোটত এখন টেষ্ট মেচৰে আৰম্ভ কৰিব। এছিয়া কাপৰ অন্ত পৰাৰ এসপ্তাহতকৈয়ো কম দিনৰ ভিতৰতে এইখন খেল অনুষ্ঠিত হ’ব। শৃংখলাৰ দ্বিতীয়খন টেষ্ট অহা ১২ ৰ পৰা ১৬ অক্টোবৰলৈকে হায়দৰাবাদত অনুষ্ঠিত হ’ব।
আনহাতে, পাঁচখনীয়া এদিনীয়া শৃংখলাটোৰ প্ৰথমখন খেল অহা ২১ অক্টোবৰত গুৱাহাটীত অনুষ্ঠিত হ’ব। ইয়াৰ পিছতে দ্বিতীয়খন ২৪ অক্টোবৰত ইণ্ডোৰত আৰু তৃতীয়খন ২৭ অক্টোবৰত পুনেত অনুষ্ঠিত হ’ব।
এদিনীয়া শৃংখলাটোৰ চূড়ান্ত খেল দুখন মুম্বাই আৰু থিৰুৱনন্থপুৰমত ক্ৰমে ২৯ অক্টোবৰ আৰু ১ নৱেম্বৰত অনুষ্ঠিত হ’ব।
এদিনীয়া শৃংখলাটো সমাপ্ত হোৱাৰ পিছতে তিনিখনীয়া টি-টুৱেন্টিৰ শৃংখলাটো আৰম্ভ হ’ব। সূচী অনুসৰি প্ৰথমখন টি-টুৱেন্টি ৪ নৱেম্বৰত কলকাতাত, ৬ নৱেম্বৰত লক্ষ্ণৌত আৰু ১১ নৱেম্বৰত চেন্নাইত অনুষ্ঠিত হ’ব।
এছিয়া কাপত ভাৰতৰ অধিনায়ক বিৰাট কোহলীয়ে নেখেলে যদিও ৱেষ্ট ইণ্ডিজৰ বিৰুদ্ধে হ’বলগীয়া ঘৰুৱা শৃংখলাত অধিনায়কগৰাকীয়ে যোগদান কৰিব।
ইপিনে অহা ২১ অক্টোবৰত বৰ্ষাপাৰাত অনুষ্ঠিত হ’বলগীয়া খেলখনৰ বাবে অসম তথা উত্তৰ-পূৰ্বাঞ্চলৰ ক্ৰিকেট প্ৰেমী উৎসাহিত পৰিছে। বিশেষকৈ কোহলীৰ নেতৃত্বৰ টীম ইণ্ডিয়াৰ খেলুৱৈসকলৰ উজ্জীৱিত প্ৰদৰ্শন চাবলৈ অধীৰ আগ্ৰেহেৰে অপেক্ষা কৰিছে যুৱ ক্ৰিকেটট প্ৰেমীসকল।
অহা ১৯ অক্টোবৰত দুয়োটা দলৰে খেলুৱৈসকল আহি গুৱাহাটীত উপস্থিত হ’বহি।
উল্লেখযোগ্য যে বিগত ২০১৭ চনৰ অক্টোবৰত বৰ্ষাপাৰাত ভাৰত আৰু অষ্ট্ৰেলিয়াৰ মাজত আন্তৰ্জাতিক টি-টুৱেন্টি মেচখন অনুষ্ঠিত হৈছিল য’ত অষ্ট্ৰেলিয়াই দুই উইকেটত বিজয় সাৱ্যস্ত কৰিছিল।
উক্ত মেচখন সমাপ্ত হোৱাৰ পিছতে অষ্ট্ৰেলিয়াৰ খেলুৱৈসকলৰ বাছখনত কোনো দুস্কৃতিকাৰীয়ে শিল দলিওৱাৰ দুৰ্ভাগ্যজনক ঘটনা সংঘটিত হৈছিল। সেয়েহে আয়োজকসকলে এইবাৰ সুৰক্ষা ব্যৱস্থা অধিক কটকটীয়া কৰি তোলা বুলি জানিব পৰা গৈছে।
