স্বাস্থ্য বিভাগৰ বিৰুদ্ধে গুৱাহাটীৰ এগৰাকী সংগীত পৰিচালক আৰু এহাল মাতৃ-পুত্ৰই ভয়ংকৰ অভিযোগ উত্থাপন কৰিছে।
সংগীত পৰিচালকগৰাকীৰ ফেচবুক লাইভত মাতৃ-পুত্ৰই আনিছে এই গুৰুতৰ অভিযোগ।
শেখৰ জ্যোতি গোস্বামী নামৰ সংগীত পৰিচালকগৰাকী পজিটিভ ওলোৱাৰ ফলত ১০৮ বাহনেৰে খানাপাৰা ক’ভিড চিকিৎসালয়লৈ গৈ থকা পথতে কৰিলে ফেচবুক লাইভ।
সেই একেখন এম্বুলেঞ্চতে যোৱা প্ৰণৱ নামৰ যুৱক আৰু তেওঁৰ মাতৃয়ে স্বাস্থ্য বিভাগৰ বিৰুদ্ধে কৰিলে মহা বিস্ফোৰণ।
কালি ক’ভিড-১৯ নিগেটিভ বুলি ম’বাইলত মেছেজ অহা বুলি দাবী কৰি মহানগৰীৰ গো-শালাৰ যুৱকজনে কয়, “তাৰ পাছত পুনৰ পজিটিভ অহা বুলি ঘৰৰ পৰা মোক আৰু মাক জোৰ জবৰদস্তি উঠাই আনিছে।”
ইপিনে, মহানগৰীৰ গোশালা আউট পোষ্টৰ ভাৰপ্ৰাপ্ত আৰক্ষী বিষয়া শৰৎ চন্দ্ৰ বৰাৰ বিৰুদ্ধে মদ্যপান কৰি মাতৃ-পুত্ৰক অপদস্থ কৰাৰ গুৰুতৰ অভিযোগ তুলিছে ভিডিঅ’টোত।
“গোশালা আউট পোষ্টৰ ভাৰপ্ৰাপ্ত আৰক্ষী বিষয়া শৰৎ চন্দ্ৰ বৰাই দিন দুপৰতে মদ্যপান কৰি মই নিগেটিভ অহা মেছেজ দেখুওৱাৰ পাছতো বেয়াকৈ গালি-গালাজ পাৰিছে আৰু মোৰ মাক অপদস্থ কৰিছে,” যুৱকজনে এইদৰে কয়।
ইপিনে, উক্ত ভিডিঅ’ৰ জৰিয়তে পুত্ৰ-মাতৃয়ে আৰক্ষী সঞ্চালক প্ৰধান ভাস্কৰ জ্যোতি মহন্তক আহ্বান জনাই কয়, “শৰৎ চন্দ্ৰ বৰাৰ বিৰুদ্ধে ব্যৱস্থা গ্ৰহণ কৰিব লাগে। আমাক ন্যায় লাগে, কিয় আমাৰ নিগেটিভ অহাৰ পাছতো জোৰ-জবৰদস্তি উঠাই আনিব?”
আনহাতে, উক্ত ভিডিঅ’টোত সংগীত পৰিচালকগৰাকীয়ে চৰকাৰে কুৱাৰেন্টাইন কৰাৰ ক্ষেত্ৰত বৈষম্যমূলক আচৰণ লোৱা বুলি অভিযোগ কৰি লগতে কয় “ধনীসকলক ঘৰতে কুৱাৰেন্টাইন কৰি ৰাখে, দুখীয়াসকলক কুৱাৰেন্টাইন চেণ্টাৰলৈ লৈ আনে। সেই অঞ্চল কণ্টেইনমেণ্ট জ’ন আছিল যদিও যোৱা ৬ দিনে স্বাস্থ্য বিভাগ বা প্ৰশাসনৰ তৰফৰ পৰা কোনো খাদ্য যোগান নাই ধৰা।”
এই সন্দৰ্ভত গো-শালা আৰক্ষী চকীৰ ভাৰপ্ৰাপ্ত বিষয়াৰ সৈতে যোগাযোগ কৰাৰ চেষ্টা কৰা হৈছিল যদিও তেওঁক পোৱা নগ’ল।
