পশ্চিমবংগৰ দুৰ্গাপুৰত উদ্ধাৰ হৈছে এজন কিশোৰৰ পচি যোৱা মৃতদেহ। মৃতদেহটি উদ্ধাৰ হোৱা পিছতেই চাঞ্চল্যৰ সৃষ্টি হৈছে সমগ্ৰ অঞ্চলটোত।
মৃত কিশোৰগৰাকীৰ নাম নাম অমিত সৌ । বয়স মাত্ৰ ১৭ বছৰ। জানিব পৰা মতে তিনিদিন ধৰি নিৰুদ্দেশ হৈ আছিল কিশোৰটি। পৰিয়ালে যোগাযোগ কৰিছিল আৰক্ষীৰ লগত। আৰক্ষীৰ বিচাৰ-খোচাৰৰ অন্তত দুৰ্গাপুৰৰ এখন উদ্যানত উদ্ধাৰ হৈছিল কিশোৰটিৰ অৰ্ধগলিত মৃতদেহ।
পৰিয়ালৰ লোকে জনোৱা মতে তিনিদিন আগতে অমিত মৰ্নিং ৱাক কৰিবলৈ ওলাই গৈছিল। তাৰ পিছত ঘৰলৈ উভতি অহা নাছিল। পৰিয়ালৰ লোকে বহু বিচাৰ-খোচাৰ কৰাৰ পাছতো অমিতক বিচাৰি নাপায় থানাত নিৰুদ্দেশৰ গোচৰ পঞ্জীয়ন কৰে।
এই গোচৰৰ পিছতেই আৰক্ষীয়ে তদন্ত আৰম্ভ কৰে। আৰক্ষীয়ে তদন্ত চলাই থকাৰ অৱস্থাতে দুৰ্গাপুৰৰ এখন পাৰ্কৰ নিৰাপত্তাৰক্ষীয়ে পাৰ্কখনৰ এটা কালভাৰ্টৰ তলৰ পৰা দুৰ্গন্ধ লাভ কৰে আৰু আৰক্ষীক খবৰ দিয়ে। দুৰ্গাপুৰ আৰক্ষীয়ে তাত উপস্থিত হৈ কালভাৰ্টটোৰ পৰা মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰে।
পৰিয়ালৰ লোকৰ মতে, অমিতে শেহতীয়াকৈ কেইবাদিনো মোবাইল গেমত মগ্ন হৈ আছিল। অনলাইন গেমিং এপৰ জৰিয়তে এগৰাকী ফিলিপাইনৰ মহিলাৰ মহিলাৰ সৈতে কথা-বতৰা পাতিছিল অমিতে। সেই মহিলাগৰাকীক লগ কৰিবলৈ অমিত ফিলিপাইনলৈ যাবৰ বাবে তৎপৰ হৈ পৰিছিল।
ইয়াৰ ফলত ঘৰত প্ৰায়ে অশান্তিৰ সৃষ্টি হৈছিল। আৰক্ষীয়ে জনোৱা মতে, মৃত্যুৰ কাৰণ এতিয়াও স্পষ্ট হোৱা নাই। অমিতৰ মৃত্যু কেনেকৈ হ’ল সেয়া মৰণোত্তৰ পৰীক্ষাৰ পিছতহে স্পষ্ট হ’ব। ইতিমধ্যে আৰক্ষীয়ে অস্বাভাৱিক মৃত্যুৰ গোচৰ ৰুজু কৰি তদন্ত আৰম্ভ কৰিছে।
