কুখ্যাত ‘মংকিগেট’ৰ স্মৃতি ঘূৰি আহিল। বিতৰ্কৰ কেন্দ্ৰবিন্দু সেই হৰভজন সিং। বিষয়টোও একেই— বৰ্ণবিদ্বেষী মন্তব্য। সেই সময়ত অষ্ট্ৰেলিয়াৰ খেলপথাৰত হৰভজন আৰু প্ৰয়াত অষ্ট্ৰেলিয়াৰ অল-ৰাউণ্ডাৰ এণ্ড্ৰু চাইমণ্ডছৰ মাজত সংঘাত হৈছিল। আৰু এতিয়া তেওঁ কমেণ্টৰী বক্সৰ পৰা ৰাজস্থান ৰয়েলছৰ ইংৰাজ বলাৰ জোফ্ৰা আৰ্চাৰৰ ওপৰত বৰ্ণবিদ্বেষী মন্তব্য নিক্ষেপ কৰিলে।
দেওবাৰে আই পি এলত ৰাজস্থান ৰয়েলছ আৰু ছানৰাইজাৰ্ছ হায়দৰাবাদ মুখামুখি হয়। আৰ্চাৰ বলিং কৰিবলৈ আহি একেবাৰেই ছন্দত নাছিল। তেওঁ ৪ অভাৰত ৭৬ ৰান দিয়ে। কোনো উইকেটো নাপালে। আই পি এলৰ ইতিহাসত ইমান ৰান দিয়া নাই কোনো বলাৰে।
প্ৰথমে বেটিং কৰি হায়দৰাবাদে অভিলেখ সৃষ্টি কৰি ২৮৬ ৰান সংগ্ৰহ কৰে। চেজিং কৰিবলৈ নামি ২৪২ ৰানতে সমাপ্ত হয় ৰাজস্থানৰ ইনিংছ। মেচখনৰ মেন অৱ দ্য মেচ হয় ঈশান কিষাণ। ৰাষ্ট্ৰীয় দলৰ এইগৰাকী উপেক্ষিত ক্ৰিকেটাৰে মাত্ৰ ৪৬টা বলতে বিস্ফোৰক শতক অৰ্জন কৰে।
অৱশ্যে ৰানৰ বৰষুণ হোৱা মেচখনৰ বিতৰ্কিত অংশটো খেলপথাৰৰ বাহিৰত সংঘটিত হৈছিল। আৰ্চাৰ যেতিয়া বলিং কৰিবলৈ আহিছিল, তেতিয়া হৰভজন সিঙে হাতত মাইক্ৰ’ফোনটো লৈ কমেণ্টৰী বক্সত বহি আছিল। হিন্দীত মন্তব্য দি থাকোঁতে হঠাতে ইংৰাজ বলাৰজনক উদ্দেশ্যি কয়, “লণ্ডনৰ ক’লা টেক্সিৰ মিটাৰ অতি সোনকালে বাঢ়ে। আৰ্চাৰৰ মিটাৰো তেনেদৰে হোহোৱাই বৃদ্ধি পাইছে।” তেওঁৰ ইকোনমি হাৰ ক্ৰমান্বয়ে বৃদ্ধি পাইছে সেইটো বুজাবলৈ ভাজীয়ে এনে এটা স্থুল ৰুচিৰ কৌতুক বাছি লৈছিল।
কোৱা বাহুল্য যে বিষয়টো ছ’চিয়েল মিডিয়াৰ দৃষ্টিগোচৰ হ’বলৈ বেছি সময় নালাগিল। হৰভজনৰ এই বক্তব্যৰ আঁৰত লুকাই থকা বৰ্ণবাদ পোহৰলৈ আনি প্ৰাক্তন স্পিনাৰগৰাকীক ক্ষমা খুজিবলৈ বহুতে আহ্বান জনাইছে। হিন্দী ধাৰাভাষ্যৰ গুণগত মান আৰু মূল্যবোধ কিমান হ্ৰাস পাইছে সেই কথাও বহুতে আঙুলিয়াই দিয়ে। আনকি এজনে তেওঁৰ এক্স-হেণ্ডলত অনুৰোধ জনাইছে যে হৰভজন সিঙক কমেন্টৰীৰ জগতখনৰ পৰা অপসাৰণ কৰা হওক।
ভাৰতীয় দলটোৱে ইয়াৰ পূৰ্বে ২০০৮ চনত অষ্ট্ৰেলিয়া ভ্ৰমণ কৰিছিল। সেই দলৰ সদস্য আছিল হৰভজন সিং। ছিডনী টেষ্টৰ সময়ত এণ্ড্ৰু চাইমণ্ডছৰ প্ৰতি বৰ্ণবাদী ভাষা ব্যৱহাৰ কৰা বুলি উত্থাপিত অভিযোগৰ সমৰ্থনত ওলাই আহিছিল অষ্ট্ৰেলিয়াৰ ক্ৰিকেটাৰসকলে। সেই সময়ত শচীনৰ দৰে একাংশই ভাজীৰ কাষত থিয় দিছিল যদিও বিষয়টোত কম বিতৰ্ক হোৱা নাছিল। তিনিখন মেচৰ বাবে নিষেধাজ্ঞা আৰোপ কৰা হৈছিল যদিও পিছলৈ সেই শাস্তি উঠাই লোৱা হয় ।
আনহাতে, বৰ্তমানৰ আই পি এলৰ ধাৰাভাষ্যক লৈও বিতৰ্কৰ সৃষ্টি হৈছে। পেনেলত থকাৰ পিছতো প্ৰতিযোগিতা আৰম্ভ হোৱাৰ পূৰ্বেই হঠাতে তালিকাৰ পৰা বাদ পৰিছে ইৰফান পাঠান। জানিব পৰা মতে, প্ৰাক্তন ভাৰতীয় পেচাৰগৰাকীয়ে বৰ্তমানৰ কেইবাগৰাকীও ক্ৰিকেটাৰক সমালোচনা কৰিছিল, সেয়েহে খেলুৱৈসকলৰ আপত্তি আৰু অসন্তুষ্টিৰ ভিত্তিত তেওঁক আঁতৰাই দিয়া হৈছে।
