ইংলেণ্ডৰ বিৰুদ্ধে এদিনীয়া ছিৰিজ অন্তিমখন মেচত জয়লাভ কৰি প্ৰথমখন টী-২০মেচত প্ৰবল আত্মবিশ্বাস লৈ খেলপথাৰত নামিছিল ভাৰতীয় মহিলা ক্ৰিকেট দল।
প্ৰথম বলিং কৰি ভাৰতীয় দলে সুন্দৰ আৰম্ভণিও ঘটায়। কিন্তু মেচত পৰাজয় বৰণ কৰিলেও হাৰ্লিন দেউলৰ এটি দুৰ্দান্ত কেচ এতিয়া ব্যাপক চৰ্চাৰ বিষয় হৈ পৰিছে।
খেলখনৰ ১৯তম অভাৰক অন্তিমটো বলত বাউণ্ডাৰিত ফিল্ডিং কৰা হাৰ্লিনে আক্ৰমণাত্মক বেটিং কৰি থকা এমি জোন্সৰ কেচ ধৰি তেওঁক পেভলিয়নলৈ পঠিয়ায়।
বাউণ্ডাৰিৰ সীমাত থকা ফিল্ডাৰসকলে বাউণ্ডাৰি অতিক্ৰম কৰাৰ আগেয়ে বল বতাহত এৰি দি পুনৰ বাউণ্ডাৰিৰ ভিতৰলৈ আহি কেচ ধৰা দেখিবলৈ পোৱা যায়।
তেনে এক প্ৰয়াসেৰেই হাৰ্লিনে তেওঁ আশা কৰাতকৈ কিছু দূৰত থকাত সম্পূৰ্ণ বতাহত শৰীৰট উৰন্ত পখীৰ দৰে মেলি দি পুনৰ বলটো কৰায়ত্ত কৰে।
হাৰ্লিনৰ এই কেচ ছচিয়েল মিডিয়াত ব্যাপক চৰ্চা লাভ কৰিছে। ক্ৰিকেটাৰ, অনুৰাগীৰ পৰা আৰম্ভ কৰি বিশেষজ্ঞলৈকে সকলো মুগ্ধ।
কোনোৱে এই কেচটোক এইবাৰৰ ইংলেণ্ডৰ গ্ৰীষ্মৰ শ্ৰেষ্ঠ কেচ বুলি কোৱাৰ লগতে কেচটোৰ আকৌ তুলনা কৰা হৈছে নিউজিলেণ্ডত ৰবীন্দ্ৰ জাডেজাই ধৰা নীল ৱাগনাৰৰ কেচটোৰ সৈতে।
That was a brilliant catch @imharleenDeol. Definitely the catch of the year for me!pic.twitter.com/pDUcVeOVN8
— Sachin Tendulkar (@sachin_rt) July 10, 2021
হাৰ্লিনৰ এই দুৰ্দান্ত কেচটো দেখি প্ৰতিপক্ষৰ খেলুৱৈসকলেও আনকি অভিনন্দন জনাবলৈ পাহৰা নাই।
হাৰ্লিনে কেচ ধৰা বলটো কৰিছিল শিখা পাণ্ডেই। শিখাই তেওঁৰ ছচিয়েল মিডিয়া একাউন্টত লিখিছে,’’আমি আজিৰ পৰা এটা সিদ্ধান্ত ল’লো যে এনেধৰণৰকেচক হাৰ্লিন কেচ বুলি কোৱা হ’ব। দুৰ্দান্ত!’’
