ভাৰতত ২০২৩ চনৰ প্ৰথম ছমাহৰ তুলনাত দ্বিতীয়াৰ্ধত মুছলমান বিৰোধী ঘৃণামূলক ভাষণ ৬২ শতাংশ বৃদ্ধি পাইছে। আমেৰিকাৰ ৱাশ্বিংটনত থকা ইণ্ডিয়া হেট লেব (আই এইচ এল) ৰিচাৰ্চ গ্ৰুপৰ প্ৰতিবেদনৰ জৰিয়তে এই কথা প্ৰকাশ পাইছে। সোমবাৰে (২৬ ফেব্ৰুৱাৰী, ২০২৪) গৱেষক গোটটোৱে কয় যে যোৱা ৩ মাহত ভাৰতত মুছলমানসকলৰ বিৰুদ্ধে ঘৃণামূলক ভাষণ বৃদ্ধি কৰাত ইজৰাইল আৰু গাজাৰ যুদ্ধই গুৰুত্বপূৰ্ণ ভূমিকা পালন কৰিছিল।
ইণ্ডিয়া হেট লেবে সদৰী কৰা মতে ২০২৩ চনত দেশত ৬৬৮টা ঘৃণামূলক ভাষণ দিয়া হৈছিল, য’ত মুছলমানক লক্ষ্য কৰি লোৱা হৈছিল। ইয়াৰে প্ৰথম ছমাহত ২৫৫টা ঘটনা সংঘটিত হোৱাৰ বিপৰীতে দ্বিতীয়াৰ্ধত ৪১৩টা ঘটনা দেখা গৈছে।
লগতে পঢ়কঃ লণ্ডনত থকা ভাৰতীয় মূলৰ কাশ্মীৰী পণ্ডিত প্ৰবাসী অধ্যাপিকাক দেশত প্ৰৱেশ কৰাত বাধা; কাৰণ কি?
উল্লেখযোগ্য কথাটো হ’ল ভাৰতীয় জনতা পাৰ্টি ক্ষমতাত থকা ৰাজ্যসমূহত ৭৫ শতাংশ বা ৪৯৮টা এনে ঘটনা দেখা গৈছিল। প্ৰধানমন্ত্ৰী নৰেন্দ্ৰ মোডীকো একেটা দলৰ ফায়াৰব্ৰেণ্ড নেতা বুলি গণ্য কৰা হয়। সৰ্বাধিক মুছলমানৰ বিৰুদ্ধে ঘৃণামূলক ভাষণৰ ঘটনা সংঘটিত হৈছে মহাৰাষ্ট্ৰ, উত্তৰ প্ৰদেশ আৰু মধ্যপ্ৰদেশত।
মুছলমানৰ বিৰুদ্ধে ক’ত আৰু কিমান ঘৃণামূলক ভাষণৰ ঘটনা লিপিবদ্ধ হৈছিল?
-
ঘৃণামূলক ভাষণৰ মুঠ গোচৰ – ৬৬৮টা
-
বিজেপি শাসিত ৰাজ্যত – ৪৫৩ টা
-
অবিজেপি শাসিত ৰাজ্যত – ১৭০ টা
-
ৰাষ্ট্ৰীয় ৰাজধানী দিল্লীত – ৩৭ টা
-
কেন্দ্ৰীয় শাসিত অঞ্চলত – ৮ টা
২০২৪ চনৰ লোকসভা নিৰ্বাচনৰ কেইমাহমান আগতে অহা আই এইচ এলৰ প্ৰতিবেদন অনুসৰি ২০২৩ চনৰ ৭ অক্টোবৰৰ পৰা ৩১ ডিচেম্বৰলৈকে (এই সময়ছোৱাত পেলেষ্টাইনৰ ইছলামিক গোট হামাছে ইজৰাইলক আক্ৰমণ কৰিছিল আৰু ইয়াৰ পিছত ইজৰাইলৰ প্ৰতিহত আক্ৰমণৰ পিছত গাজাত উত্তেজনা আৰু বিবাদ বাঢ়িছিল) ভাৰতীয় মুছলমানৰ বিৰুদ্ধে ঘৃণামূলক ভাষণৰ ৪১টা ঘটনা লিপিবদ্ধ কৰা হৈছিল আৰু এই গোচৰসমূহত যুদ্ধৰ কথা উল্লেখ কৰা হৈছিল।
লগতে পঢ়কঃ নিৰ্বাচনী বণ্ডক ‘কেলেংকাৰী’ বুলি অভিহিত কৰিলে অৰ্থনীতিবিদ অমৰ্ত্য সেনে
গৱেষক গোটটোৱে লগতে কয় যে তেওঁলোকে ৰাষ্ট্ৰসংঘৰ (UN)ৰ ঘৃণামূলক ভাষণৰ সংজ্ঞা ব্যৱহাৰ কৰিছিল, যিটো হ’ল: ধৰ্ম, জাতীয়তা, ৰাষ্ট্ৰীয়তা, জাতি বা লিংগকে ধৰি বৈশিষ্ট্যৰ ভিত্তিত কোনো ব্যক্তি বা গোটৰ বিৰুদ্ধে বিৰুদ্ধে যিকোনো পক্ষপাতিত্বমূলক বা বৈষম্যমূলক ভাষাই হৈছে ঘৃণামূলক ভাষণ।
আই এইচ এলে কয় যে এই তথ্য পোহৰলৈ আহিছিল যেতিয়া তেওঁলোকে হিন্দু জাতীয়তাবাদী গোটৰ অনলাইন কাৰ্যকলাপ নিৰীক্ষণ কৰিছিল। এই সময়ছোৱাত গৱেষণা গোটটোৱে ছ’চিয়েল মিডিয়াত প্ৰকাশিত ঘৃণামূলক ভাষণৰ সৈতে জড়িত পৰীক্ষিত ভিডিঅ’সমূহ চাই আৰু বিশ্লেষণ কৰি ভাৰতীয় সংবাদ মাধ্যমৰ জৰিয়তে প্ৰকাশ পোৱা ঘটনাসমূহ সংকলিত কৰিছিল।
