জনসংখ্যাৰ ফালৰ পৰা ইতিমধ্যে বিশ্বৰ তালিকাত শীৰ্ষস্থান দখল কৰিছে ভাৰতে। কিন্তু অস্তিত্ব ৰক্ষাৰ বাবে অধিকতকৈ অধিক সন্তান জন্ম দিবলৈ বাৰ্তা প্ৰদান কৰিছে হিন্দুত্ববাদী নেতাসকলে।
আৰ এছ এছৰ মুৰব্বী মোহন ভাগৱতেও শেহতীয়াকৈ অধিক সন্তান জন্ম দিবলৈ আহ্বান জনাইছে। শেহতীয়াকৈ তেওঁ আৰ এছ এছৰ এখন সভাত অংশগ্ৰহণ কৰি নৱ বিবাহিত দম্পতী সকলক কমেও ২-৩টা সন্তান জন্ম দিবলৈ আহ্বান জনাইছে।
নাগপুৰত অনুষ্ঠিত সমাৱেশত অংশগ্ৰহণ কৰি ভাগৱতে কয় যে জনসংখ্যা হ্ৰাস পাবলৈ আৰম্ভ কৰিছে। এইটো বৰ চিন্তনীয়। আধুনিক জনগাঁথনিয়ে কয় যে এখন সমাজৰ জনসংখ্যা ২.১ শতাংশৰ তললৈ নামি গ’লেই বিনাশ ঘটে। পৃথিৱীত ইয়াৰ বহু উদাহৰণ পোৱা যায়। ফলত জনসংখ্যা কোনো প্ৰকাৰে ২.১ শতাংশৰ তললৈ নামিব নালাগে।”
একে সময়তে তেওঁ কয় যে আমাৰ দেশৰ জনসংখ্যা নীতি ১৯৯৮ চনৰ পৰা ২০০২ চনলৈকে তৈয়াৰ কৰা হৈছিল। য’ত কোৱা হৈছে, যিকোনো সমাজৰ জনসংখ্যা ২.১%ৰ তললৈ নামিব নালাগে। ফলস্বৰূপে এই ২.১% হাৰ বজাই ৰাখিবলৈ হ’লে দুটাতকৈ অধিক সন্তান জন্ম হ’ব লাগিব। জনসংখ্যা বিজ্ঞানে সেইটোৱেই কয়।”
যদিও ভাগৱতে কোনো সম্প্ৰদায়ৰ নাম উল্লেখ কৰা নাই, ৰাজনৈতিক মহলে ভাগৱতৰ এই বাৰ্তা হিন্দু সম্প্ৰদায়ক লক্ষ্য কৰি লোৱা বুলি বিশ্বাস কৰে। কাৰণ শেহতীয়াকৈ এটা ৰিপৰ্ট ওলাইছে। য’ত দাবী কৰা হৈছে যে দেশত হিন্দুৰ জনসংখ্যা ৭.৮ শতাংশ হ্ৰাস পাইছে।
শেহতীয়াকৈ প্ৰকাশিত এক প্ৰতিবেদন অনুসৰি ভাৰতে চীনক অতিক্ৰম কৰি জনসংখ্যাৰ ক্ষেত্ৰত বিশ্বৰ তালিকাত শীৰ্ষস্থান দখল কৰিছে।
