ছাত্ৰ-ছাত্ৰীক জেষ্ঠগৰাকীয়ে শিক্ষা দিয়ে সততাৰ আৰু নৈতিকতাৰ; অসৎ উপায় অৱলম্বন কৰি পৰীক্ষাত অৱতীৰ্ণ হোৱাৰ পৰা বাৰণ কৰে শিক্ষাৰ্থীক। পিছে এই ধাৰণাৰ পৰা সম্পূৰ্ণ বিপৰীত এক নীতিতহে বিশ্বাস কৰে কৰ্ণাটকৰ এগৰাকী মন্ত্ৰীয়ে।
এক শৈক্ষিক অনুষ্ঠানত বক্তব্য ৰাখি মন্ত্ৰীগৰাকীয়ে নিজৰ শৈক্ষিক কীৰ্তিৰ বৃত্তান্ত দাঙি ধৰি সৃষ্টি কৰিছে তীব্ৰ আলোড়ন।
অনুষ্ঠানত উপস্থিত থকা ছাত্ৰ-ছাত্ৰীৰ সমুখত মন্ত্ৰীগৰাকীয়ে দশম শ্ৰেণীৰ পৰীক্ষাত নকল কৰি উত্তীৰ্ণ হোৱাৰ লগতে নকল বিষয়ত পি এইচ ডি কৰা বুলি মন্তব্য কৰি সংবাদ শিৰোনাম দখল কৰিছে।
এই ‘অনন্য শৈক্ষিক কীৰ্তি’ৰ বৃত্তান্ত শুনোৱা মন্ত্ৰীগৰাকীৰ নাম হৈছে বি শ্ৰীৰামুলু। শ্ৰীৰামুলু কৰ্ণাটকৰ শাসকীয় বিজেপি চৰকাৰৰ জনজাতীয় কল্যাণ বিভাগৰ মন্ত্ৰী।
কৰ্ণাটকৰ বেল্লাৰী জিলাত ছাত্ৰ-ছাত্ৰীৰ সমাৱেশত নিজ ভাষণত বি শ্ৰীৰামুলুৱে কয়, “মোক টিউচনত প্ৰতিদিনে অপমান কৰা হৈছিল আৰু কোনো কামৰ বাবেই মই উপযুক্ত নহয় বুলি কোৱা হৈছিল।”
“মই দশম শ্ৰেণীৰ পৰীক্ষাত উত্তীৰ্ণ হোৱাৰ সময়ত মোৰ শিক্ষক আচৰিত হৈছিল। মই মোৰ শিক্ষকক কৈছিলো যে মই কেৱল নকল কৰি দশম শ্ৰেণীৰ পৰীক্ষাত উত্তীৰ্ণ হোৱাই নহয়, মই পৰীক্ষাৰ সময়ত নকল বিষয়ত পি এইচ ডি ডিগ্ৰীও লাভ কৰিছো।”- শ্ৰীৰামুলুৱে লগতে কয়।
