মন্ত্ৰী হিমন্তৰ পুত্ৰ নন্দিল কেপ্টেইন হ’ল প্ৰাক্তন প্ৰধান মন্ত্ৰী ৰাজীৱ গান্ধী পঢ়া বিখ্যাত ডুন স্কুলৰ

দেশৰ প্ৰাক্তন প্ৰধান মন্ত্ৰী ৰাজীৱ গান্ধী পঢ়া, ‘ভাৰতৰ ইটন’ খ্যাত ডুন স্কুলত কেপ্টেইন নিৰ্বাচিত হ’ল মন্ত্ৰী হিমন্ত বিশ্ব শৰ্মাৰ সন্তান নন্দিল বিশ্ব শৰ্মা। আজি এই কথাটো জনাই ৰাজ্যৰ প্ৰভাৱশালী মন্ত্ৰীজনে এটা টুইট কৰে।

‘’Very heartening to see my son Nandil taking over as Captain of The Doon School’’ নিজৰ সন্তানৰ এই কৃতিত্ব দাঙি ধৰি মন্ত্ৰীজনে টুইটটোত লিখে।

আনহাতে ডুন স্কুলৰ অফিচিয়েল ফেচবুক পোষ্ট এটাতো নন্দিলে স্কুল কেপ্টেইন হিচাপে দায়িত্ব লোৱাৰ কথা কোৱা হয়। নন্দিলে বিদায়ী স্কুল কেপ্টেইন বিকছিটৰ পৰা দায়িত্ব লয়।

বৰ্তমান একাদশ শ্ৰেণীত পঢ়া নন্দিল বিশ্ব শৰ্মা যোৱা বছৰ উক্ত বিদ্যালয়খনৰ পৰাই দশম শ্ৰেণীত উত্তীৰ্ণ হৈছিল।

https://twitter.com/himantabiswa/status/1088274061560557569

উল্লেখযোগ্য যে উত্তৰাখণ্ডৰ ডুন স্কুল হ’ল দেশৰ ভিতৰতে আগশাৰীৰ ব্যক্তিগত খণ্ডৰ বিদ্যালয়, যাক ভাৰতৰ ইটন (ইংলেণ্ডৰ বিখ্যাত ইটন স্কুলৰ তুলনাৰে) বুলি কোৱা হয়।

কেৱল ছাত্ৰই অধ্যয়নৰ সুবিধা থকা আৰু ১৯৩৫ চনতে স্থাপিত ভাৰতৰ এই বিখ্যাত বিদ্যালয়খনত দেশৰ বহুতো বিখ্যাত মানুহে স্কুলীয়া শিক্ষা গ্ৰহণ কৰিছিল। প্ৰাক্তন প্ৰধান মন্ত্ৰী প্ৰয়াত ৰাজীৱ গান্ধী তাৰ ভিতৰত অন্যতম।

প্ৰসংগক্ৰমে ক’ব পাৰি যে পূৰ্বৰ কংগ্ৰেছ চৰকাৰৰ লগতে এতিয়াৰ বিজেপি চৰকাৰৰ দিনতো যথেষ্ট সময় শিক্ষা মন্ত্ৰী হৈ থকা হিমন্ত বিশ্ব শৰ্মাই নিজৰ সন্তানক পঢ়ুৱাবলৈ ৰাজ্যৰ বাহিৰৰ ব্যক্তিগত খণ্ডৰ বিদ্যালয় বাছি লোৱাটোৱে সেই সময়ত ৰাজ্যত চৰ্চা লাভ কৰা দেখা গৈছিল।

দুয়োখন চৰকাৰৰ দিনতে শিক্ষা মন্ত্ৰী হৈ থাকিও আৰু মন্ত্ৰীজনে ৰাজ্যৰ শিক্ষা ব্যৱস্থাটোলৈ আমূল পৰিৱৰ্তন অনা বুলি প্ৰায়ে দাবী কৰি থাকিলেও প্ৰকৃততে যে নিজৰ ৰাজ্যত এটা ভাল বা ভৰসাযোগ্য শিক্ষাৰ পৰিৱেশ গঢ়িব নোৱাৰিলে ই তাৰেই প্ৰমাণ বুলি সমালোচনা উঠিছিল।

প্ৰসংগক্ৰমে উল্লেখ কৰিব পাৰি যে মন্ত্ৰীজনৰ কন্যা সুকন্যা শৰ্মাও পঢ়ে আজমীৰৰ এখন ব্যক্তিগত খণ্ডৰ বিদ্যালয়ত।