শিক্ষা আৰু গুৱাহাটী উন্নয়ন দুয়োটা বিভাগৰে দায়িত্বত থকা মন্ত্ৰী সিদ্ধাৰ্থ ভট্টাচাৰ্য্যৰ নিজা সমষ্টিৰে এখন বিদ্যালয়ৰ কাহিনী এয়া। শিলপুখুৰীৰ গান্ধীবস্তিস্থিত এই বিদ্যালয়খনৰ নাম ড০ ভূপেন হাজৰিকা জাতীয় বিদ্যালয়। কিন্তু বিদ্যালয়খনৰ কণ-কণ ছাত্ৰ-ছাত্ৰীসকলে দৈনিক পাঠ গ্ৰহণ কৰিব লগীয়া হয় বিদ্যালয়খনৰ সন্মুখতে থকা জাবৰৰ এটা দ’মৰ পৰা ভাহি আহি থকা দুৰ্গন্ধ লৈ লৈ।
বিদ্যালয়খনৰ সন্মুখৰ নলাটোত যিকোনো সময়ত জাবৰে দ’ম বান্ধি থাকে। যাৰ ফলত জাবৰৰ পৰা ওলোৱা উৎকট গোন্ধ সহ্য কৰি ছাত্ৰ-ছাত্ৰীসকলে পাঠ গ্ৰহণ কৰিব লগীয়া হয়।
ছাত্ৰ-ছাত্ৰীৰ স্বাস্থ্যৰ দিশটোৰ প্ৰতি ডাঙৰ ভাবুকি স্বৰূপ এই দিশটোক শিক্ষা আৰু গুৱাহাটী উন্নয়ন, দুয়োটা বিভাগেই চৰম অৱজ্ঞা কৰি অহাৰ অভিযোগ তুলিছে বিদ্যালয় কৰ্তৃপক্ষই।
নলাটোৰ জাবৰৰ দ’মটোৰ উপৰি বিদ্যালয়ৰ সন্মুখেৰে পাৰ হৈ যোৱা উপ-পথটোৰ অৱস্থাও তেনেই জৰাজীৰ্ণ। পথটোৱেও ছাত্ৰ-ছাত্ৰীৰ জীৱনৰ প্ৰতি যিকোনো সময়তে বিপদ নমাই আনিব পাৰে।
বিদ্যালয় কৰ্তৃপক্ষই অভিযোগ কৰা মতে, যোৱা চাৰি বছৰৰ ভিতৰত বাৰম্বাৰ অভিযোগ-আপত্তি, আৱেনদ-নিৱেদন কৰাৰ পিছতো ছাত্ৰ-ছাত্ৰীৰ স্বাস্থ্যৰ সৈতে জড়িত গুৰুত্বপূৰ্ণ কথাটোত গুৱাহাটী পৌৰ নিগম তথা ৰেইলৱে কতৃপক্ষই কোনো কাণসাৰ দিয়া নাই।
মন কৰিব লগীয়া যে সামান্য আঁতৰতে ৰেইলৱে’ কৰ্তৃপক্ষৰো এটা ডাষ্টবিন আছে, যিটোৰ পৰাও উৎকট দুৰ্গন্ধ উৰি আহে।
এই সন্দৰ্ভত নৰ্থ-ইষ্ট নাওৰ সৈতে হোৱা কথা-বতৰাত গুৱাহাটী পৌৰ নিগম আৰু ৰেইলৱে’ কৰ্তৃপক্ষৰ বিৰুদ্ধে ক্ষোভ উজাৰে বিদ্যালয়খনৰ প্ৰধান শিক্ষক মোহিধৰ কাকতীয়ে।
তেওঁ কয়, “চাৰি-পাঁচ বছৰ পূৰ্বেই এই বিষয়ক লৈ ধৰ্ণা-প্ৰতিবাদ কৰা হৈছিল আৰু সংবাদ মাধ্যমতো বাতৰি প্ৰকাশ পাইছিল। নলাটোৰ কাষতে ৰেইলৱে’ কৰ্তৃপক্ষকো তেওঁলোকৰ ডাষ্টবিনটো আঁতৰোৱাৰ ব্যৱস্থা কৰিবৰ বাবে জনোৱা হৈছিল।”
ইয়াৰোপৰি, গণতান্ত্ৰিক আন্দোলন-ধৰ্ণাৰ ভাষা বুজি নোপোৱাৰ ফলত বিদ্যালয় কৰ্তৃপক্ষই গুৱাহাটী পৌৰ নিগম কৰ্তৃপক্ষ আৰু ৰেইলৱে’ কৰ্তৃপক্ষক বহুবাৰ লিখিত ৰূপতো আৱেদন দিছিল তথা তেওঁলোকৰ দাবী পূৰণৰ বাবে বিভাগীয় দুয়োটো কৰ্তৃপক্ষই আশ্বাস দি আহিছিল।
অৱশেষত প্ৰায় ৫ বছৰ ধৰি উক্ত স্থানৰ জাবৰসমূহ আঁতৰ নোহোৱাত দুয়োটা কৰ্তৃপক্ষৰ ওপৰতে বিদ্যালয় কৰ্তৃপক্ষই আস্থা হেৰুৱাই পেলোৱা বুলিও দুখ প্ৰকাশ কৰে বিদ্যালয়ৰ প্ৰধান শিক্ষকগৰাকীয়ে।
“চৰকাৰৰ প্ৰতি আমাৰ এটাই অনুৰোধ যাতে, দীৰ্ঘদিনীয়া এই সমস্যাৰ পৰা বিদ্যালয়ৰ ছাত্ৰ-ছাত্ৰীসকলক উদ্ধাৰ কৰে যেন।” চৰকাৰৰ প্ৰতি এই কাতৰ আহ্বান বিদ্যালয়খনৰ প্ৰধান শিক্ষক কাকতীৰ।
ইপিনে বিদ্যালয়খনৰ সন্মুখেৰে পাৰ হৈ গৈছে শিলপুখুৰীৰ পৰা লালমাটি সংযোগী য়ু এন বেজবৰুৱা উপপথ। সেই উপপথৰ অৱস্থাও শোচনীয়। সেই পথেদি প্ৰত্যেক দিনাই বিদ্যালয়লৈ আহে শতাধিক ছাত্ৰ-ছাত্ৰী।
উক্ত বিদ্যালখনৰ সন্মুখত থকা ঢালৰ বাবে এটা দিশৰ পৰা আহি থকা বাহনসমূহ আনটো দিশৰ পৰা দেখা নাপায়। যাৰ বাবে বিদ্যালয়খনৰ ছাত্ৰ-ছাত্ৰী দুৰ্ঘটনাত পতিত হোৱাৰ শংকা বৃদ্ধি পাইছে। জানিব পৰা মতে পূৰ্বে উক্ত স্থানত সংঘটিত হৈছে কেইবাটাও পথ দুৰ্ঘটনা।
নৰ্থ ইষ্ট নাওৰ আগত গান্ধীবস্তি উন্নয়ন সমিতিৰ সভাপতি গোলাম বদৰুল মুবিন আহমেদে কয়, “আমি বহুবাৰ প্ৰতিবাদ কৰি অহাৰ পাছত গড়কপ্তানী বিভাগৰ পৰা বিষয়াসকল আহি পথছোৱা নিৰীক্ষণ কৰি যায়হি আৰু মেৰামতি কৰাৰ আশ্বাস দি যায়। কিন্তু আজি ৪-৫ বছৰে এনেদৰেই পথছোৱা জৰাজীৰ্ণ অৱস্থাতে আছে। যাৰ ফলত বহুকেইটা পথ দুৰ্ঘটনা সংঘটিত হৈছে।”
