কোভিড-১৯ৰ পৰিস্থিতিলৈ লক্ষ্য ৰাখি ছাত্ৰ-ছাত্ৰীসকলৰ ওপৰত পাঠ্যক্ৰমৰ বোজা হ্ৰাস কৰিবলৈ অসম উচ্চতৰ মাধ্যমিক শিক্ষা সংসদে উচ্চতৰ মাধ্যমিকৰ পাঠ্যক্ৰম ২০২০-২১ শিক্ষাবৰ্ষত ৩০ শতাংশ হ্ৰাস কৰাৰ সিদ্ধান্ত লৈছে।
কোভিড-১৯মহামাৰীৰ বাবে ঘোষণা কৰা লকডাউনৰ ফলত কেৱল ৰাজ্যখনতে নহয়, গোটেই দেশতে শৈক্ষিক কাৰ্যকলাপ বাধাগ্ৰস্ত হৈছে।
কেন্দ্ৰীয় মাধ্যমিক শিক্ষা পৰিষদ(চিবিএছই)য়ে ইতিমধ্যে ইয়াৰ একাদ্বশ আৰু দ্বাদশ শ্ৰেণীৰ বাবে ২০২০-২১ শিক্ষাবৰ্ষৰ পাঠ্যক্ৰম ৩০ শতাংশ হ্ৰাস কৰিছে।
সূত্ৰসমূহৰ মতে, অসম উচ্চতৰ মাধ্যমিক শিক্ষা সংসদৰ শৈক্ষিক সমিতিৰ সদস্যসকলে ইতিমধ্যে এক বৈঠকত মিলিত হৈছিল আৰু ছাত্ৰ-ছাত্ৰীৰ কামৰ বোজা ৩০ শতাংশ হ্ৰাস কৰাৰ সিদ্ধান্ত লৈছে।
সূত্ৰসমূহে জানিবলৈ দিয়া মতে, এয়া কোভিড-১৯মহামাৰীৰ পৰিস্থিতিৰ সৈতে মোকাবিলা কৰাৰ বাবে ছাত্ৰ-ছাত্ৰীসকলৰ সহায়ক হোৱাকৈ মাত্ৰ এইবাৰৰ বাবে লোৱা ব্যৱস্থাহে।
জানিব পৰা গৈছে যে পাঠ্যক্ৰম হ্ৰাস কৰাৰ ক্ষেত্ৰত উচ্চতৰ মাধ্যমিকৰ প্ৰথম বৰ্ষ আৰু দ্বিতীয় বৰ্ষ দুয়োটাৰে পাঠ্যক্ৰমক সামৰি লোৱা হৈছে।
‘’অহা ৩১ আগষ্টৰ ভিতৰত অসম উচ্চতৰ মাধ্যমিক শিক্ষা সংসদে আনুষ্ঠানিকভাৱে এই বিষয়য়ত জাননী কৰাৰ পূৰ্ণ সম্ভাৱনা আছে,’’-সূত্ৰসমূহে জানিবলৈ দিয়ে।
