শিৱসাগৰৰ থাওৰা সমষ্টিত সৰ্বাধিক ৮১ শতাংশ ভোটদান
বৃহস্পতিবাৰে দেশৰ ৯১ টা লোকসভা সমষ্টিৰ লগতে অসমৰ পাঁচটা সমষ্টিৰ বাবে নিৰ্বাচন অনুষ্ঠিত হয়। অসমৰ যেৰহাট লোকসভা সমষ্টিৰ অন্তৰ্গত শিৱসাগৰ জিলাৰ তিনিটা সমষ্টি ক্ৰমে শিৱসাগৰ, আমগুৰি আৰু থাওৰা বিধান সভা সমষ্টিত ব্যাপক হাৰত ৰাইজে ভোটদান কৰে।
তিনিটা সমষ্টিৰ মুঠ ভোটাৰ ৩,৭৭,৬৪৬ জনৰ ভিতৰত ২,৯৬,৩২৯ জনে ভোটদান সাব্যস্ত কৰে। ভোটদানৰ হাৰ ৭৮.৪৭ শতাংশ। তিনিওটা সমষ্টিৰ ভিতৰত সৰ্বাধিক ভোটদান হয় থাওৰা বিধান সভা সমষ্টিত। থাওৰাত ১,০৯,৫৯০ গৰাকী ভোটাৰৰ বিপৰীতে ৮৮,৭৬৭ গৰাকী ভোটাৰে ভোটদান কৰে। ভোট দানৰ হাৰ ৮১ শতাংশ।
দ্বিতীয় স্থানত আছে শিৱসাগৰ বিধান সভা সমষ্টি। সমষ্টিটোত মুঠ ভোটাৰ ১,৪৮,২২৬ গৰাকী। ভোটদান সাব্যস্ত কৰে ১,১৫,৯০৭ গৰাকীয়ে। ভোটদানৰ হাৰ ৭৮.২০ শতাংশ।
আনহাতে, আমগুৰি বিধান সভা সমষ্টিত মুঠ ভোটাৰ ১,১৯,৮৩০ গৰাকীৰ বিপৰীতে ভোটদান সাব্যস্ত কৰে ৯১,৬৫৫ গৰাকী ভোটাৰে। ভোটদানৰ হাৰ ৭৬.৪৯ শতাংশ।
উল্লেখযোগ্য যে, থাওৰা আৰু আমগুৰি সমষ্টিত পুৰুষত কৈ মহিলা ভোটাৰৰ সংখ্যা সৰ্বাধিক হোৱা পৰিলক্ষিত হয়। পুৱাৰে পৰা ভোট কেন্দ্ৰ সমুহত মহিলাৰ দীঘলীয়া শাৰী দেখিবলৈ পোৱা যায়। শিৱসাগৰ জিলা প্ৰশাসনে বিগত সময়ত ৰাইজক নিজৰ ভোটাধিকাৰ সাব্যস্ত কৰাৰ বাবে আৰু ভোটাৰৰ মাজত সজাগতা বৃদ্ধিৰ বাবে বহু কাৰ্যসূচী ৰূপায়ণ কৰিছিল।
যোৰহাট লোকসভা সমষ্টিটোত এই বাৰ আঠগৰাকী প্ৰাৰ্থীয়ে প্ৰতিদ্বন্দ্বিতা কৰিছে। দুই এটা সৰুসুৰা বিক্ষিপ্ত ঘটনাৰ বাহিৰে জিলাখনত শান্তিপূৰ্ণ ভাৱে ভোটদান সম্পন্ন হয়। শিৱসাগৰত এইবাৰ ছটা ভোটকেন্দ্ৰ সম্পূৰ্ণ ৰূপে মহিলাই পৰিচালনা কৰাৰ লগতে ৪০ টা কেন্দ্ৰ চিচিটিভিৰ জৰিয়তে অনলাইন নিৰীক্ষণৰ ব্যৱস্থা কৰা হৈছিল।