এছিয়ান গেইমছত আজি ৪x৪০০ মিটাৰৰ মহিলাৰ ৰীলেত ভাৰতে স্বৰ্ণ পদক অৰ্জন কৰে। অসম কন্যা হিমা দাসৰ লগতে আন খেলুৱৈ কেইগৰাকীৰ উজ্জীৱিত প্ৰদৰ্শনেৰে ভাৰতে স্বৰ্ণ জয় কৰিবলৈ সক্ষম হয়।
এই ৪x৪০০ মিটাৰৰ মহিলা ৰীলেত ভাৰতীয় দলটোৱে ৩ মিনিট ২৮ ছেকেণ্ড ৭২ মাইক্ৰ’ছেকেণ্ডত এই দৌৰ সম্পূৰ্ণ কৰে। আনহাতে, বাহৰেইনৰ দলটোৱে ৩ মিনিট ৩০ ছেকেণ্ড ৬১ মাইক্ৰ’ছেকেণ্ডত এই দৌৰ সম্পূৰ্ণ কৰি ৰূপৰ পদক লাভ কৰে। এই প্ৰতিযোগিতাত ব্ৰঞ্জৰ পদক অৰ্জন কৰা ভিয়েটনামৰ দলটোৱে এই দৌৰ সম্পূৰ্ণ কৰে ৩ মিনিট ৩৩ ছেকেণ্ড ২৩ মাইক্ৰ’ছেকেণ্ডত।
উল্লেখযোগ্য যে ইণ্ডোনেছিয়াৰ জাকাৰ্টাত চলি থকা ১৮ সংখ্যক এছিয়ান গেইমছত চমকপ্ৰদ প্ৰদৰ্শনেৰে দুটাকৈ বৃহৎ সাফল্য অৰ্জন কৰিবলৈ সক্ষম হোৱাৰ পাছত আজি জাকাৰ্টাৰ ট্ৰেকত অন্তিম বাৰৰ বাবে দৌৰি দেশৰ চাৰিশ মিটাৰৰ সম্রাজ্ঞী তথা অসম কন্যা হিমা দাসে ভাৰতীয় দলৰ সদস্য হিচাপে স্বৰ্ণ পদক অৰ্জন কৰিবলৈ সক্ষম হয়।
উল্লেখ্য যে আজি হিমাই এছিয়াডত নিজৰ শেষ ইভেণ্ট হিচাপে মহিলাৰ ৪x৪০০ মিটাৰৰ ৰীলেত প্ৰতিদ্বন্দ্বিতা আগবঢ়ায়। ৪x৪০০ মিটাৰৰ মহিলা ভাৰতীয় দলটোত হিমাৰ উপৰি আছে এম আৰ পুভাম্মা, সৰিতাবেন গাইকোৱাড় আৰু ভি কে বিস্ময়া।
ভাৰতীয় সময়মতে ৪x৪০০ মিটাৰৰ চূড়ান্ত মেচখন আজি সন্ধিয়া ৬ বাজি ৫০ মিনিটত অনুষ্ঠিত হয়। এই ইভেণ্টৰো হিমা দাস তথা তেওঁৰ সংগীসকলৰ মূল প্ৰতিদ্বন্দ্বী আছিল বাহৰেইন। বাহৰেইনক নেতৃত্ব দিয়ে হিমাক চাৰিশ মিটাৰৰ ব্যক্তিগত ইভেণ্টত পৰাস্ত কৰা ছালৱা ঈদ নাছেৰে।
উল্লেখ্য যে, ভাৰতীয় দলটো যোৱা ২৪ আগষ্টত জাকাৰ্টাত দলৰ প্ৰশিক্ষক গেলিনা বুখাৰিনাই এক ট্ৰায়েলৰ জৰিয়তে নিৰ্বাচিত কৰে।
মনকৰিবলগীয়া যে আজিৰ এই ৰীলেতো ভাৰতীয় দলৰ মূল অস্ত্ৰ আছিল অসম কন্যা হিমা দাস। কিয়নো উপৰ্যুপৰি দুটা দিনত জাকাৰ্টা এছিয়ান গেইমছত দুবাৰকৈ চাৰিশ মিটাৰৰ ৰাষ্ট্ৰীয় অভিলেখ ভংগ কৰাৰ লগতে ৪০০ মিটাৰৰ ব্যক্তিগত আৰু মিক্সড ৰেলীত ৰূপৰ পদক অৰ্জন কৰি ইতিহাস সৃষ্টি কৰি থৈছিল হিমা দাসে।
