এছিয়ান গেইমছৰ সফলতাৰ পিছতে এটাৰ পিছত আন এটা ভাল খবৰে হিমাৰ ওপৰত উবুৰি খাই পৰিছেহি। কালি, অৰ্থাৎ ১৭ ছেপ্তেম্বৰত অৰ্জুন বঁটাৰ বাবে নিৰ্বাচিত হোৱাৰ খবৰৰ পিছত আজি আন এটা ভাল খবৰ দিলে হিমাই।
বিশ্ব তাৰকাত পৰিণত হোৱা দেশৰ নৱতম ট্ৰেক চাঞ্চল্যগৰাকী চুক্তিবদ্ধ হৈছে জাৰ্মানিৰ বিশ্ববিখ্যাত এডিডাছ নামৰ বহুজাতিক কোম্পানিটোৰ সৈতে। এতিয়াৰ পৰা এডিডাছে হিমাক খেল আৰু প্ৰশিক্ষণৰ সময়ত সৰ্বোত্তম ক্ৰীড়া সামগ্ৰী যোগান ধৰিব। এই কথা জনাইছে এডিডাছৰ দিল্লীস্থিত কৰ্তৃপক্ষই।
“আমি এডিডাছে বিশ্বাস কৰো যে ক্ৰীড়াৰ মাজেৰে আমাৰ জীৱনক সলনি কৰি দিয়াৰ শক্তি আছে আৰু হিমা হ’ল তাৰ এটা ডাঙৰ উদাহৰণ। আমাৰ বহুতো সহযোগী আৰু অংশীদাৰে ভাৰতত যুৱসমাজক শক্তিশালী কৰি তোলা আৰু ইতিবাচক দিশত পৰিৱৰ্তন কৰা কামত গুৰুত্ব দিয়ে।” এইদৰে কয় এডিডাছ ইণ্ডিয়াৰ পৰিচালন সঞ্চালক ডেইভ থমাছে।
আনহাতে এডিডাছৰ সৈতে চুক্তিবদ্ধ হৈ নিজৰ আনন্দ প্ৰকাশ কৰে হিমা দাসে। “এডিডাছ পৰিয়ালৰ সৈতে জড়িত হ’বলৈ পাই মই অতি গৌৰৱ অনুভৱ কৰিছো”, এয়াই আছিল হিমাৰ তাৎক্ষণিক প্ৰতিক্ৰিয়া।
ইয়াৰ জৰিয়তে হিমাই বিশ্ববিখ্যাত ফুটবলাৰ লায়নেল মেছি, পল পগবা, ক্ৰিকেটাৰ ৰোহিত শৰ্মা, কুলদীপ যাদৱ, ঋষভ পাণ্ট, স্কোৱাছ খেলুৱৈ দীপিকা পল্লিকাল কাৰ্তিক আদিৰ দৰে খেলুৱৈৰ শাৰীত স্থান পালে।
উল্লেখযোগ্য যে এডিডাছ হ’ল বিশ্বৰ দ্বিতীয় বৃহৎ ক্ৰীড়া সামগ্ৰী আৰু সাজ-পাৰ নিৰ্মাতা কোম্পানি। নাইকৰ পিছতে এডিডাছৰ স্থান। আনহাতে ইউৰোপত এডিডাছেই সৰ্ববৃহৎ উৎপাদক।
