ৰাজ্যসভালৈ হিমন্ত বিশ্ব শৰ্মা! ২১’ৰ ৰণক্ষেত্ৰ এৰি পলায়ন কৰিব বিচাৰিছে নেকি হিমন্তই?
অচিৰেই খালী হ’ব ৰাজ্যসভাৰ তিনিখনকৈ আসন,গতিকে এই আসনকেইখন যিকোনো প্ৰকাৰে নিজৰ দখললৈ অনাৰ বাবে উঠি পৰি লাগিছে শাসক দলটোৱে।ইয়াৰ সমান্তৰালকৈ বিৰোধীয়েও এখন আসন নিজৰ হাতলৈ নিয়াৰ চেষ্টা চলাইছে।
দুখনকৈ আসনত শাসকীয় বিজেপি আৰু মিত্ৰজোঁট বিপিএফৰ প্ৰাৰ্থীৰ জয় প্ৰায় নিশ্চিত যদিও তৃতীয় আসনখনত বিৰোধী প্ৰাৰ্থীৰ বিজয়ৰ সম্ভাৱনা অধিক।
এতিয়া প্ৰশ্ন হয়, শাসকীয় বিজেপিয়ে এখন আসন বিপিএফৰ বিশ্বজিৎ দৈমাৰীক পুনৰবাৰ এৰি দিব বুলি প্ৰকাশ কৰিছে যদিও বিজেপিৰ নিজৰ আসনখনত প্ৰাৰ্থী কাক প্ৰক্ষেপ কৰিব তাক লৈ কিছু অৱকাশ থাকি গৈছে।
কিছুদিন আগলৈকে প্ৰাক্তন কংগ্ৰেছী তথা ন-বিজেপি ভুবনেশ্বৰ কলিতাক আসনখন দিয়া বুলি চিন্তা চৰ্চা চলিছিল যদিও শেহতীয়াকৈ প্ৰভাৱশালী মন্ত্ৰী হিমন্ত বিশ্ব শৰ্মাৰ নামটোহে অধিক চৰ্চিত হৈছে। অৱশ্যে প্ৰাক্তন সাংসদ কলিতাই আসনখনত তেওঁকেই প্ৰক্ষেপ কৰিব বুলি আশাবাদী।
বিজেপিৰ এক উচ্চস্তৰীয় সুত্ৰই আমাৰ সাংবাদিকক সদৰী কৰা মতে হিমন্ত বিশ্ব শৰ্মা ৰাজ্যসভালৈ নিৰ্বাচিত হৈ মোদী কেবিনেটত কেন্দ্ৰীয় মন্ত্ৰী হিচাপে নিজকে অন্তৰ্ভুক্ত কৰিব পাৰে।
এই কথাও নুই কৰিব নোৱাৰি যে প্ৰভাৱশালী মন্ত্ৰীগৰাকীয়ে লোকসভা নিৰ্বাচনৰ পূৰ্বে সংবাদমাধ্যমৰ আগত অথবা শেহতীয়াকৈ বিধানসভাৰ বিশেষ অধিৱেশনত ২০২১ ত ৰাজ্যৰ ৰাজনীতিত নাথাকো বুলি স্পষ্টকৈ ঘোষণা কৰিছিল।
আনকি এই বৰ্ষৰ ১ ফেব্ৰুৱাৰিতে তেওঁ ৰাজ্যিক বিজেপিৰ সভাপতি ৰঞ্জিত দাসলৈ পত্ৰ লিখি ২০২১ত ৰাজ্যৰ ৰাজনীতিত নাথাকো বুলি জনাই দিয়া হ’ব বুলি উল্লেখ কৰিছিল। অৱশ্যে তেওঁ ৰঞ্জিত দাসলৈ সেই পত্ৰ প্ৰেৰণ কৰিলে নে নাই সেই কথা প্ৰকাশ পোৱা নাই।
ইপিনে, ২০২১ ত বিজেপিৰ ৰাজ্যিক সভাপতি মন্ত্ৰী হিমন্ত বিশ্ব শৰ্মাকে ধৰি প্ৰায় সংখ্যক মন্ত্ৰী বিধায়কে ১০০ খন আসনতকৈও অধিক লক্ষ্য আগত লৈ ইতিমধ্যে কুচকাৱাজ আৰম্ভ কৰিছে। এই ক্ষেত্ৰত প্ৰভাৱশালী মন্ত্ৰী হিমন্ত বিশ্ব শর্মাই পূৰ্বৰে পৰা চাণক্যৰ ভূমিকা লৈ আহিছে।
তথাপি বিজেপিয়ে মিছন ১০০+ ল’লেও যেন কা বিৰোধী শক্তি বা প্ৰতিশ্ৰুতি ভংগ ইত্যাদি কিছুমান কাৰকে এই লক্ষ্যত উপনীত হোৱাত হেঙাৰ হিচাপে থিয় দিব।
তেনে সময়তে হিমন্ত বিশ্ব শৰ্মাইয়ো যেন ৰাজ্যৰ ৰাজনীতিৰ পৰা কেন্দ্ৰৰ ৰাজনীতিৰ বাবে মন মেলাৰ প্ৰসংগটোৱে বিশেষ তাৎপয্য বহন কৰিছে।
প্ৰশ্ন হয়, ‘ভবা মতে লক্ষ্যত উপনীত হ’ব নোৱাৰিব বুলি ভাবিয়েই আগতেই ২১’ৰ ৰণক্ষেত্ৰৰ পৰা পলায়ণ কৰিব খুজিছে নেকি মন্ত্ৰী হিমন্ত বিশ্ব শৰ্মাই?