অসমৰ বুৰঞ্জীত লুটি-বাগৰ মৰা মন্ত্ৰী হিমন্তই প্ৰথম আৰু শেষজন হওক : তৰুণ গগৈ
নাগৰিকত্ব সংশোধনী বিধেয়কৰ বিৰুদ্ধে ৰাজ্যত প্ৰতিবাদ তীব্ৰতৰ হৈ থকাৰ সময়তে মন্ত্ৰী হিমন্ত বিশ্ব শৰ্মাই বিভিন্ন সভাই-সমিতিয়ে উত্তেজক বক্তব্য ৰাখি আহিছে। দেশৰ সংবিধানৰ শপত লোৱা মন্ত্ৰীজনেই ধৰ্ম নিৰপেক্ষতাৰ চৰিত্ৰক চূড়ান্তভাৱে অৱমাননা কৰাও পৰিলক্ষিত হৈছে।
তেনে সময়তে হিমন্তৰ দৰে মানুহ অসমৰ বাবে অশুভ সংকেত বুলি আখ্যা দিছে প্ৰাক্তন মুখ্য মন্ত্ৰী তৰুণ গগৈয়ে।
দেওবাৰে সংবাদমেল সম্বোধন কৰি প্ৰাক্তন মুখ্য মন্ত্ৰী গগৈয়ে কয়, “হিমন্ত বিশ্ব শৰ্মাৰ ক্ষমতাই ইমানেই মূৰত ধৰিছে যে তেওঁৰ নিয়ন্ত্ৰণ আছে নে নাই তাত মোৰ সন্দেহ আছে। নহ’লে ইমান উগ্ৰ কথা নকয়। তেওঁ প্ৰকৃততে মন্ত্ৰী হৈ থকাৰ অধিকাৰেই হেৰুৱাই পেলাইছে”।
“হিমন্ত বিশ্ব শৰ্মা নেগুৰকটা বাঘ” বুলি কটাক্ষ কৰি গগৈয়ে কয় যে হিমন্তই এতিয়া যাকে-তাকে আক্ৰমণ কৰিবলৈ লৈছে।
“এনেকুৱা লুটি-বাগৰ দিয়া, ঠগ-প্ৰৱঞ্চক মন্ত্ৰী অসমৰ বুৰঞ্জীত হিমন্তই প্ৰথমজন আৰু শেষৰজন হোৱাটো বিচাৰো”, একালৰ সতীৰ্থজনক নিৰ্মম আক্ৰমণ গগৈৰ।
ইপিনে মন্ত্ৰী শৰ্মাই অতি উগ্ৰ ৰূপ ধাৰণ কৰাৰ কাৰণো দাঙি ধৰি প্ৰাক্তন মুখ্য মন্ত্ৰীজনে কয়, “মোহন ভাগৱত তেওঁৰ এতিয়া নতুন গুৰু। মোহন ভাগৱতক তেওঁ নিজৰ স্বাৰ্থৰ কাৰণে সন্তুষ্ট কৰিবলৈ গৈছে। কথাতেই আছে, নতুনকৈ হিন্দুৱেই হওক বা মুছলমানেই হওক অলপ বেছি হয়”।
ইয়াৰ উপৰি খগেন শৰ্মাক ডি জি পি হিচাপে নিযুক্তি দিয়াৰ পিছতে আৰ এছ এছৰ মানুহক নিযুক্তি দিয়া বুলি হিমন্তই ৰাহুল গান্ধীক অভিযোগ দিছিল বুলি জানিবলৈ দিয়ে প্ৰাক্তন মুখ্য মন্ত্ৰীজনে।
“তেতিয়া ‘তৰুণ গগৈয়ে আৰ এছ এছৰ মানুহক মুখ্য সচিব আৰু আৰক্ষী সঞ্চালক প্ৰধান পদত নিযুক্তি দিছে’ বুলি ৰাহুল গান্ধীক অভিযোগ দিছিলগৈ।” প্ৰাক্তন সতীৰ্থজনৰ অতীত খুঁচৰি গগৈয়ে কয়।
“তেতিয়া তেওঁ মোতকৈ বেছি কংগ্ৰেছী হৈ দেখুৱাইছিল”, গগৈৰ মন্তব্য।
ইপিনে নাগৰিকত্ব সংশোধনী বিধেয়কৰ সমগ্ৰ উত্তৰ-পূবৰ ৰাইজৰ লগতে প্ৰায়কেইখন ৰাজ্যৰ চৰকাৰেই বিৰোধিতা কৰি থকাৰ পাছতো বিজেপি চৰকাৰে আঁকোৰগোঁজালি কৰি থকা বিষয়টোক “আমাৰ বাবে প্ৰত্যাহ্বান” বুলি মন্তব্য কৰে।
“বিধেয়কখন উত্তৰ-পূৰ্বাঞ্চলৰ কেৱল হিমন্ত আৰু মুখ্য মন্ত্ৰী সৰ্বানন্দ সোণোৱালেহে বুজি পাইছে আৰু কোনেও বুজি নাপালে”, সোণোৱাল আৰু হিমন্তই দল-সংগঠনবোৰে বিধেয়কখন বুজি নোপোৱাকৈ আন্দোলন কৰিছে বুলি সভাই-সমিতিয়ে নেতা দুজনে কৰা মন্তব্যৰ পৰিপ্ৰেক্ষিতত গগৈয়ে কয়।
“সৰ্বানন্দ সোণোৱালে ২০১৬ চনৰ বিধেয়কখন ২০১৯তহে বুলি পালে। সেয়ে ইমান দিন নিমাতী কইনা হৈ থাকি এতিয়া মাত ওলাইছে”, তাৰ পিছতে গগৈৰ কটাক্ষ।