কংগ্ৰেছৰ ছুনামিত কৰ্ণাটকত বিধ্বস্ত হোৱাৰ পাছতে ৰাষ্ট্ৰীয় স্বয়ং সেৱক সংঘৰ এগৰাকী জ্যেষ্ঠ নেতাই অসমৰ মুখ্যমন্ত্ৰী ডঃ হিমন্ত বিশ্ব শৰ্মাক সতৰ্ক কৰি দিছে। এক ফেচবুক পোষ্টৰ যোগে মুখ্যমন্ত্ৰীক ডঃ শৰ্মাক সতৰ্ক কৰি দি আৰএছএছৰ উত্তৰ পূৰ্বাঞ্চলৰ বৌদ্ধিক প্ৰমুখ তীৰ্থাংকু দাসে কয় যে হিতাধিকাৰী সৃষ্টিয়ে দলৰ সাধাৰণ কৰ্মীসকলক হতাশ কৰি তুলিছে।
আৰএছএছ জ্যেষ্ঠ নেতাজনৰ এই সতৰ্কবাণীয়ে এতিয়া বাজপেয়ী ভৱনত চাঞ্চল্যৰ সৃষ্টি কৰাৰ সমান্তৰালভাৱে হিমন্তৰ চৰকাৰক অস্বস্তিত পেলোৱাও দেখা গৈছে।
যি সময়ত অসম চৰকাৰে এখনৰ পাছত এখন হিতাধিকাৰী আঁচনি ঘোষণা কৰি ৩০ লাখ হিতাধিকাৰীক প্ৰতিমাহে আৰ্থিক সাহাৰ্য দি চমক সৃষ্টি কৰিছে ঠিক সেই সময়তে আৰএছএছৰ নেতাজনে হিতাধিকাৰীয়ে ভোট দিবই বুলি কোনো কথা নাই বুলিহে সতৰ্ক কৰি দিয়া কথাটোৱে বিশেষ তাৎপৰ্য বহন কৰিছে বুলি এতিয়া চৰ্চা লাভ কৰিছে।
আৰএছএছৰ বৌদ্ধিক প্ৰমুখ তীৰ্থাংকু দাস কলিতাই কৰ্ণাটকৰ পৰা বিজেপি দলে অনেক শিক্ষা ল’বলগীয়া আছে বুলিও মুকলিকৈ অসন্তুষ্টি ব্যক্ত কৰি সামাজিক মাধ্যমত লিখিছে এইদৰে— “হিতাধিকাৰীয়ে ভোট দিবই বুলি কোনো কথা নাই, নগদ ধনৰ আঁচনিসমূহে দলীয় নেতৃত্বক লালায়িত কৰে, সাধাৰণ কৰ্মীক হতাশ কৰে। কৰ্মী নাথাকিলে সংগঠন কিদৰে শক্তিগালী হ’ব?”
নেতাগৰাকীয়ে আৰু লিখিছে, “বিনা সংগঠনেৰে নিৰ্বাচনত বিজয় সাব্যস্ত কৰা কঠিন। কাৰ্যকৰ্তাৰ প্রতি মৰম, আত্মীয়তা, সহযোগিতা তথা বিশ্বাসৰ অভাৱ হ’লেই নিৰ্দিষ্ট কিছুমান ব্যক্তিৰ ওপৰত নেতৃত্ব নিৰ্ভৰশীল হ’বলগীয়া হয়, যাৰ ফলত দল আৰু নেতৃত্বৰ মাজৰ ব্যৱধান বৃদ্ধি হয়। তেতিয়াই মধ্যভোগীৰ সুবিধা হয়, যিসকল লোক এই দৃষ্টিৰে পূৰ্বৰ পৰাই অভ্যস্ত। আমি বুজিব লাগিব এই লোকসকলৰ জাতীয় অথবা ৰাষ্ট্ৰীয় স্বাৰ্থতকৈ ব্যক্তিগত স্বাৰ্থহে মূখ্য গণতন্ত্ৰত একে দলৰ শাসন দীৰ্ঘদিন ধৰি চলিলে এই বিকৃতিবোৰ স্বাভাবিক প্ৰক্ৰিয়াৰে আহে।”
আৰএছএছৰ জ্যেষ্ঠ নেতাগৰাকীয়ে নহয় বহু সময়ত পুৰণি বিজেপি নেতাই হিমন্ত বিশ্ব শৰ্মা আৰু তেওঁ চৰকাৰ অহংকাৰী হৈ উঠিছে বুলি মন্তব্য কৰি আহিছে। আনকি কিছুদিন পূৰ্বে প্ৰাক্তন মুখ্যমন্ত্ৰী তথা কেন্দ্ৰীয় মন্ত্ৰী সৰ্বানন্দ সোণোৱালেও নামোল্লেখ নকৰাকৈ ক্ষমতাত মত্ত হৈ অহংকাৰী হৈ উঠাটো উচিত নহয় বুলি তাৎপৰ্যপূৰ্ণ মন্তব্য কৰিছিল।
ইফালে দেওবাৰে এটা অনুষ্ঠানত অংশ লৈ যোগান বিভাগ্ৰ মন্ত্ৰী ৰঞ্জিত দাসে ক্ষোভ ব্যক্ত কৰি কৈছিল — “অহংকাৰ বেছি হৈছে। দুবাৰকৈ চৰকাৰত থকা বাবে একাংশৰ অহংকাৰ হৈছে। অহংকাৰ পৰিহাৰ কৰক।”
প্ৰাক্তন মুখ্যমন্ত্ৰী সৰ্বানন্দ সোণোৱালৰ পাছতে আৰএছএছৰ এগৰাকী জ্যেষ্ঠ নেতা আৰু বিজেপিৰ প্রাক্তন ৰাজ্যিক সভাপতিজনে এইদৰে নীতি শিক্ষা দিয়া কাৰ্যই ৰাজনৈতিক মহলত ব্যাপক চৰ্চা লাভ কৰাই নহয় হিমন্ত বিশ্ব শৰ্মাক অস্বস্তিটো পেলাইছে।
