চাহ বেপাৰী হিচাপে পৰিচয় দিব খোজা মোদীয়ে পিন্ধে লাখটকীয়া পোচাক : ৰাজীৱ কাকতি
বিজেপিৰ ‘পৰিৱৰ্তন’ৰ পৰা পৰিত্ৰাণ বিচাৰি আগন্তুক লোকসভা নিৰ্বাচনৰ বাবে কঁকালত টঙালি বান্ধিছে হিন্দুস্থান নিৰ্মাণ দল। বিজেপিৰ বিৰুদ্ধে বিশ্ব হিন্দু পৰিষদৰ পৰা ফালৰি কাটি আহি গঠন কৰা আন্তঃৰাষ্ট্ৰীয় হিন্দু পৰিষদে আগন্তুক লোকসভা নিৰ্বাচনত বিজেপিৰ ভোট ভাঙিবলৈ ‘হিন্দুস্থান নিৰ্মাণ দল’ নামেৰে এক নতুন ৰাজনৈতিক দলৰ জন্ম দিছে।
ভাৰতৰ অন্য প্ৰান্তৰ লগতে অসমতো ৰাজনৈতিক দলটোৱে বিজেপিৰ বিৰুদ্ধে আৰম্ভ কৰিছে প্ৰচাৰ অভিযান। এই অভিযানত তেওঁলোকৰ শ্ল’গান হ’ব ‘বিজেপিৰ পৰিৱৰ্তনৰ পৰা পৰিত্ৰাণ’। দেওবাৰে গুৱাহাটীৰ শ্ৰীমন্তপুৰস্থিত ৰাজ্যিক কাৰ্যালয়ত এক সংবাদমেলযোগে এই কথা ঘোষণা কৰে দলৰ ৰাজ্যিক সভাপতি ৰাজীৱ কাকতিয়ে।
উল্লেখযোগ্য যে, যোৱা ১৯ মাৰ্চৰ দিনা দলটোৱে ৰাজ্যৰ তিনিটা লোকসভা সমষ্টিৰ প্ৰাৰ্থীৰ নাম ঘোষণা কৰাৰ পাছত আজি তেওঁলোকে অন্য চাৰিটা লোকসভা সমষ্টিৰ প্ৰাৰ্থীৰ তালিকা ঘোষণা কৰে। তালিকা অনুসৰি কৰিমগঞ্জৰ পৰা নিখিল চন্দ্ৰ দাস, ধুবৰীৰ পৰা অলকেশ ৰয়, মঙলদৈত মণিৰাম বসুমতাৰী আৰু কলিয়াবৰৰ পৰা দিগন্ত কুমাৰ শইকীয়াই।
সংবাদমেলত তালিকাখন প্ৰকাশ কৰিয়েই দলৰ সভাপতি কাকতি সৰব হৈ পৰে বিজেপি চৰকাৰৰ বিৰুদ্ধে।
তেওঁ কয় ‘বিজেপিৰ পৰিৱৰ্তনৰ পৰা পৰিত্ৰাণ বিচাৰি নিৰ্বাচনী যুদ্ধ হ’ব। সৰুতে চাহ বেপাৰী হিচাপে পৰিচয় দিব খোজা মোদীয়ে এতিয়া পিন্ধে লাখটকীয়া পোচাক। প্ৰত্যেকখন সভাতে সলনি হয় তেওঁৰ পোচাক।‘
ইপিনে, প্ৰধান মন্ত্ৰী নৰেন্দ্ৰ মোদীকে ধৰি বিজেপিৰ সকলো নেতা-কৰ্মীয়ে নামৰ আগত ‘চকীদাৰ’ ব্যৱহাৰ কৰাক কেন্দ্ৰ কৰি সৰৱ হৈ পৰে সভাপতিজন।
‘চাহ বেপাৰীৰ পৰা এতিয়া উন্নত হৈ তেওঁ চকীদাৰ হ’ল। নিজক চকীদাৰ বুলি কলেও মানুহে তেওঁক বিশ্বাসত নলয়।‘ এইদৰে কয় কাকতিয়ে।
ইয়াৰ উপৰি, হিন্দুস্থান নিৰ্মাণ দলৰ এজন কৰ্মকতা ভাৰতীয় জনতা পাৰ্টীৰ হাজাৰ জন কৰ্মকৰ্তাৰ সমান বুলি দাবী কৰে কাকতিয়ে।
তেওঁ আৰু কয় ‘আমাৰ দলৰ সদস্যই বিজেপিৰ নেতাৰ দৰে ছিণ্ডিকেট ৰাজ কৰিব নাযায়।‘
আনহাতে এইবাৰৰ নিৰ্বাচনত গেৰুৱা দলটোৱে অসমত এখন বা দুখন আসনতে সন্তুষ্ট থাকিব লাগিব বুলি উল্লেখ কৰে। তেওঁ লগতে ‘চকীদাৰৰ শ্ল’গানত অসন্তুষ্ট হৈ ভাৰতৰ জনগণে দেশৰ পৰা বিজেপিক নিঃশেষ কৰিব’ বুলিও তাৎপৰ্যমূলক মন্তব্য কৰে ৰাজীৱ কাকতিয়ে।
ইপিনে, বাকী থকা ৭ টা লোকসভা সমষ্টিৰ প্ৰাৰ্থীৰ নাম অহা ২৬ মাৰ্চৰ দিনা ঘোষণা কৰা হ’ব বুলি জানিব পৰা গৈছে।
ইয়াৰ পূৰ্বে দলটোৱে প্ৰকাশ কৰা তালিকা অনুসৰি গুৱাহাটী লোকসভা সমষ্টিৰ পৰা দলৰ ৰাজ্যিক সভাপতি ৰাজীৱ কাকতীয়ে প্ৰতিদ্বন্দ্বিতা কৰিব লগতে বৰপেটাৰ পৰা ভাস্কৰ কলিতা আৰু ডিব্ৰুগড় লোকসভা সমষ্টিৰ পৰা প্ৰতিদ্বন্দ্বিতা কৰিব অপূৰ্ব শইকীয়াই।