বিধায়ক শিলাদিত্যৰ বিৰুদ্ধে উচ্চতম ন্যায়ালয়ৰ ন্যায়াধীশলৈ অভিযোগ পত্ৰ প্ৰেৰণ নগাঁৱৰ যুৱকৰ
বিজেপি দলৰ বিতৰ্কিত নেতা তথা হোজাই সমষ্টিৰ বিধায়ক শিলাদিত্য দেৱে এন আৰ চিৰ প্ৰসংগত এটা নিৰ্দিষ্ট সম্প্ৰদায়ক বাৰে বাৰে টাৰ্গেট কৰি এখনৰ পিছত আন এখন সংবাদ মেল আয়োজন কৰি কেতবোৰ বিস্ফোৰক মন্তব্যৰে ৰাজ্যখনৰ সামাজিক আৰু ৰাজনৈতিক পৰিৱেশ এক প্ৰকাৰ কুলষিত কৰি তুলিছে।
এনে মন্তব্যৰ বাবে বিধায়ক দেৱৰ বিৰুদ্ধে বিভিন্ন সময়ত তীব্ৰ প্ৰতিবাদ আৰু প্ৰতিক্ৰিয়াও প্ৰকাশ পাইছে। বাৰে বাৰে কৰা এনে মন্তব্যৰ বিৰুদ্ধে নগাঁও চহৰৰ ইছলামপট্টি সেউজ নগৰৰ আব্দুল জলিল আকন্দ নামৰ যুৱকজনে যোৱা ৫ আগষ্টত বিধায়ক শিলাদিত্য দেৱৰ বিৰুদ্ধে নগাঁও সদৰ থানাত এক এজাহাৰ দাখিল কৰিছিল। যোৱা ৪ আগষ্টত বিধায়কগৰাকীয়ে সংবাদ মাধ্যমৰ আগত এন আৰ চিৰ চূড়ান্ত খচৰা তালিকাক লৈ কৰা কেতবোৰ বিতৰ্কিত আৰু সাম্প্ৰদায়িক মন্তব্যৰ বিৰুদ্ধে দাখিল কৰা এজাহাৰখনৰ ভিত্তিত নগাঁও সদৰ আৰক্ষী থানাত ২৬২০/১৮ নম্বৰত এক গোচৰো ৰুজু হৈছে।
আকন্দই এই এজাহাৰখন দাখিল কৰি সংবাদ মাধ্যমৰ আগত মন্তব্য কৰিছিল যে অনাগত সময়ত এনে ধৰণৰ বিতৰ্কিত মন্তব্য প্ৰকাশৰ পৰা বিৰত নাথাকিলে, শিলাদিত্যৰ বিৰুদ্ধে সৰ্বোচ্চ ন্যায়ালয়ৰ কাষ চাপিব।
ইমানৰ পিছতো শিলাদিত্য ক্ষান্ত নথকাত আকন্দই তেওঁৰ বিৰুদ্ধে মঙলবাৰে উচ্চতম ন্যায়ালয়ৰ ন্যায়াধীশদ্বয় ৰঞ্জন গগৈ আৰু ৰুহিতন নৰিমানলৈ এক তথ্য সম্বলিত অভিযোগ পত্ৰ প্ৰেৰণ কৰিছে।
ডাক আৰু ই মেইলযোগে প্ৰেৰণ কৰা ১৭ পৃষ্ঠা জোৰা অভিযোগ পত্ৰত উল্লেখ কৰা মতে, এন আৰ চিৰ সদ্য প্ৰকাশিত চুড়ান্ত খচৰা তালিকাত ১.১০ কোটি অবৈধ বাংলাদেশী মুছলমানৰ নাম অন্তৰ্ভুক্ত হৈছে, ২০২৬ চনত ৫৬ টা সমষ্টিত মুছলমান সংখ্যাগৰিষ্ঠ হ’ব, এন আৰ চি কাগজৰ খেল, অসমক পৰিকল্পিতভাবে ইছলামিক ৰাষ্ট্ৰৰ অন্তৰ্ভুক্ত কৰাৰ দুই ধৰণে ষড়যন্ত্ৰ চলিছে, এন আৰ চি উন্নীতকৰণ প্ৰক্ৰিয়াত নিয়োজিত ৫৫ হেজাৰ কৰ্মচাৰীৰ ৩০ হাজাৰেই অসম বিৰোধী আদি কেতবোৰ বিতৰ্কিত আৰু সাম্প্ৰদায়িক মন্তব্য প্ৰকাশ কৰিছিল বিধায়ক শিলাদিত্য দেৱে।
শিলাদিত্যৰ এনে অগণতান্ত্ৰিক, ৰাষ্ট্ৰ বিৰোধী, উচতনিমুলক, সাম্প্ৰদায়িক মন্তব্যই অসমত দীৰ্ঘদিন ধৰি বৰ্তি থকা সাতামপুৰুষীয়া শান্তি-সম্প্ৰীতি বিনষ্ট কৰাৰ আংশকা কৰিছে অভিযোগকাৰী যুৱকজনে।
তদুপৰি, যি সময়ত উচ্চতম ন্যায়ালয়লৰ তত্বাৱধানত এন আৰ চি প্ৰক্ৰিয়া চলি আছে, তেনে সময়ত শিলাদিত্যৰ মন্তব্যসমূহে প্ৰকৃততে সৰ্বোচ্চ ন্যায়ালয়ক অৱমাননা কৰাৰ অভিযোগ তুলিছে। সেয়ে ন্যায়ালয়ে তেওঁৰ বিৰুদ্ধে এক নিজাববীয়া গোচৰ ৰুজু কৰি কঠোৰ আইনী ব্যৱস্থা গ্ৰহণৰ দাবী জনাইছে।