ৰঙৰ উৎসৱ হোলীলৈ মাজত মাথো কেইটামান দিন বাকী থকা অৱস্থাত এইবাৰ মহানগৰ আৰক্ষীয়ে ৰঙৰ উৎসৱ হোলী উদযাপনৰ সময়ত মানিব লগীয়া কিছু নীতি-নিয়ম বান্ধি দিছে।
এই নীতি-নিয়ম অনুসৰি হোলীত এইবাৰ আয়োজন কৰিব নোৱাৰিব ‘ৰেইন ডান্স’। এই ক্ষেত্ৰত কোনোয়ে যদি ৰেইন ডান্স আয়োজন কৰে তেতিয়া মহানগৰ আৰক্ষীয়ে তেওঁলোকৰ ক্ষেত্ৰত শাস্তিমূলক ব্যৱস্থা গ্ৰহণ কৰিব। এই কথা জানিবলৈ দিয়ে মহানগৰ আৰক্ষী আয়ুক্ত দীপক কুমাৰে।
‘পূৰ্বতে ৰেইন ডান্সৰ দৰে অনুষ্ঠানে মহানগৰীত আইন-শৃংখলাজনিত পৰিস্থিতিৰ সৃষ্টি কৰিছিল।’ এই মন্তব্য মহানগৰ আৰক্ষী আয়ুক্ত দীপক কুমাৰৰ।
তাৰোপৰি মহানগৰ আৰক্ষীয়ে হোলী উৎসৱত সুৰা সেৱন কৰি যান-বাহন চলোৱা ক্ষেত্ৰতো নিষেধাজ্ঞা আৰোপ কৰিছে। যাতে কোনো ধৰণৰ আইন-শৃংখলাজনিত পৰিস্থিতিৰ সৃষ্টি নহয়। ইতিমধ্যে মহানগৰ আৰক্ষীয়ে সকলো জিলা প্ৰশাসনকে উক্ত দিনত ড্ৰাই দে’ ঘোষণা কৰিবলৈ আহ্বান জনাইছে বুলিও আৰক্ষী সূত্ৰই জনাইছে।
