তিনিচুকীয়াৰ ধলাত পাঁচজনকৈ নিৰীহ লোকক হত্যা কৰা ঘটনাই আজি চাৰিটা দিন অতিক্ৰম কৰিলে। কিন্তু এতিয়ালৈ এই নাৰকীয় কাণ্ডৰ লগত কোন জড়িত সেই কথা নিশ্চিত কৰিব পৰা নাই অসম আৰক্ষীয়ে।
ইপিনে ধলাৰ হত্যাকাণ্ডৰ তদন্ত চলি থকাৰ মাজতে বদলি কৰা হৈছে শদিয়াৰ আৰক্ষী অধীক্ষক প্ৰশান্ত সাগৰ চাংমাইক। অসম চৰকাৰৰ গৃহ বিভাগে আজি জাৰি কৰা এক জাননী যোগে তেওঁক বাক্সাৰ চৰাইমাৰীত থকা ২৪ সংখ্যক অসম আৰক্ষী (আই আৰ) বেটেলিয়নৰ কমাণ্ডেণ্ট পদলৈ বদলি কৰা হৈছে।
আনহাতে, ২৪ সংখ্যক অসম আৰক্ষী (আই আৰ) বেটেলিয়নৰ কমাণ্ডেণ্ট দেৱজিত দেউৰীক শদিয়াৰ আৰক্ষী অধীক্ষক হিচাপে বদলি কৰা হৈছে।
জাননীখনত জনস্বাৰ্থৰ বাবেই এই ৰদবদল কৰা বুলি উল্লেখ আছে যদিও স্বাভাবিকতে প্ৰশ্ন উত্থাপন হৈছে যে ধলাৰ ঘটনাৰ বাবেই বদলি কৰা হ’ল নেকি আৰক্ষী অধীক্ষক চাংমাইক?
সকলো সময়তে সফলতাৰ জয়গান গোৱা বিজেপি নেতৃত্বাধীন চৰকাৰখনৰ মুখ্য মন্ত্ৰীৰ নিজৰ হাতত থকা গৃহ বিভাগৰ ব্যৰ্থতা প্ৰতিপন্ন হোৱাৰ বাবেই বদলি কৰা হৈছে নেকি আৰক্ষী বিষয়াজনক? লগতে আৰক্ষী অধীক্ষকগৰাকীক বদলি কৰিয়েই গৃহ বিভাগৰ ব্যৰ্থতা ঢাকিবলৈ চেষ্টা কৰা হৈছে নেকি?
ইতিমধ্যেই ধলাৰ এই ঘটনাৰ পাছত অসম আৰক্ষী তথা গৃহ বিভাগৰ এই ব্যৰ্থতাক ধিক্কাৰ দিছে বিভিন্ন পক্ষই।
উল্লেখযোগ্য যে আৰক্ষী তথা চৰকাৰে প্ৰথমতে এই হত্যাকাণ্ড আলফা(স্বাঃ)ই সংঘটিত কৰা বুলি সন্দেহ প্ৰকাশ কৰিছিল যদিও সংগঠনটোৱে ঘটনাৰ পিছদিনাই এই ঘটনাৰ লগত তেওঁলোক জড়িত নহয় বুলি স্পষ্ট কৰি দিয়ে।
ইপিনে তদন্তৰ নামত আৰক্ষীয়ে এই ঘটনাৰ পূৰ্বে কেতবোৰ বিতৰ্কিত মন্তব্য কৰাৰ বাবে আলোচনাপন্থী আলফা নেতা মৃণাল হাজৰিকা আৰু জিতেন দত্তক গ্ৰেপ্তাৰ কৰি জেইল হাজোতলৈ প্ৰেৰণ কৰে। কিন্তু একেই উচটনিমূলক মন্তব্য কৰা বিধায়ক শিলাদিত্য দেব, কমলাক্ষ দে’ পুৰকায়স্থ আৰু কেইবাটাও বাঙালী সংগঠনৰ নেতাক এই পৰ্যন্ত অসম আৰক্ষীয়ে গ্ৰেপ্তাৰ নকৰা কথাটোৱেও বিতৰ্কৰ সৃষ্টি কৰিছে।
