শেহতীয়াকৈ জম্মু-কাশ্মীৰ উচ্চ ন্যায়ালয়ে পহলগামত সংঘটিত সন্ত্ৰাসবাদী আক্ৰমণৰ পিচত বিতাড়িত হোৱা ৬২ বছৰীয়া এগৰাকী মহিলাক পাকিস্তানলৈ পঠিয়াবলৈ দিয়া নিৰ্দেশ সন্দৰ্ভত তীব্ৰ প্ৰতিক্ৰিয়া প্ৰকাশ কৰিছে ভাৰতৰ গৃহ মন্ত্ৰালয়ে। গৃহ মন্ত্ৰালয়ে যুক্তি আগবঢ়াইছে যে বিদেশী নাগৰিকক বিতাড়ন কৰাৰ ক্ষেত্ৰত চৰকাৰে লোৱা সিদ্ধান্তত ন্যায়পালিকাই হস্তক্ষেপ কৰা অনুচিত।
মন্ত্ৰালয়ে কয়, আদালতে ভাৰতৰ সীমাৰ বাহিৰত বলবৎ হ’বলগীয়া কোনো সিদ্ধান্ত ল’ব নালাগে, কাৰণ এই ধৰণৰ পদক্ষেপ সংবিধানৰ বিপৰীত আৰু যুক্তিহীন। তেওঁলোকে স্পষ্ট কৰে যে, ৰখশন্দ ৰছিদ নামৰ মহিলাগৰাকীক পাকিস্তানে পুনৰ গ্ৰহণ নকৰিলে ভাৰতে তেওঁৰ বিতাড়নৰ সিদ্ধান্ত বলবৎ কৰিব নোৱাৰে।
গৃহ মন্ত্ৰালয়ে এই বিষয়ে গুৰুত্ব আৰোপ কৰি কয় যে আদালতে সুশাসন আৰু সংবিধানিক কাঠামো ৰক্ষাৰ স্বার্থত নিজৰ কৰ্তৃত্বৰ সীমা মানি চলিব লাগিব। তেওঁলোকে সকীয়াই দিয়ে যে এই ধৰণৰ সিদ্ধান্তই ভবিষ্যতলৈ এক সমস্যাজনক নজিৰ স্থাপন কৰিব পাৰে।
উল্লেখযোগ্য যে ৰখশন্দ ৰছিদ ৩৮ বছৰৰ পৰা ভাৰতত বাস কৰি আছে, এগৰাকী ভাৰতীয় নাগৰিকৰ পত্নী আৰু তেওঁৰ দীৰ্ঘম্যাদী ভিছা আছিল, যাৰ নবীকৰণৰ দিন আছিল। কিন্তু পহলগামৰ আক্ৰমণত ২৬ জন লোক নিহত হোৱাৰ পিচত ভাৰত চৰকাৰে সকলো পাকিস্তানী নাগৰিকক নিৰ্দিষ্ট সময়ৰ ভিতৰত দেশ এৰি যাবলৈ নিৰ্দেশ দিয়ে। যদিও এই আদেশত দীৰ্ঘম্যাদী ভিছাধাৰী বা ভাৰতীয় নাগৰিকৰ পত্নীসকলক ৰেহাই দিয়া হৈছিল।
গৃহ মন্ত্ৰালয়ে স্পষ্টকৈ কয় যে ভাৰতীয় নাগৰিকক বিয়া কৰাই স্বয়ংক্ৰিয়ভাৱে ভাৰতত থকাৰ অধিকাৰ প্রদান নকৰে। তেওঁলোকে পুনৰ জোৰ দি কয় যে বিদেশী নাগৰিকসকলৰ অধিকাৰ ভাৰতীয় নাগৰিকৰ দৰে নহয়, আৰু তেওঁলোকৰ উপস্থিতি প্ৰব্ৰজন নীতি আৰু আইন অনুসৰি নিয়ন্ত্ৰিত হয়।
মন্ত্ৰালয়ে উদ্বেগ প্ৰকাশ কৰি কয় যে আদালতৰ এই ধৰণৰ সিদ্ধান্তই অন্যান্য বিদেশীকো ভাৰতত থকাৰ অধিকাৰ দাবী কৰিবলৈ উৎসাহিত কৰিব পাৰে, যাৰ ফলত দেশৰ অনুপ্ৰৱেশ নীতি আৰু চৰকাৰী কৰ্তৃত্বৰ কাঠামোত বিঘ্ন ঘটিব পাৰে।
সেয়ে, গৃহ মন্ত্ৰালয়ে অভিযোগ তোলে যে আদালতে বৈদেশিক সম্পৰ্ক আৰু ৰাষ্ট্ৰীয় নিৰাপত্তাৰ দৰে বিষয়ত হস্তক্ষেপ কৰি নিজৰ অধিকাৰ ক্ষেত্ৰ অতিক্ৰম কৰিছে।
