মানুহৰো শিং গজিব লৈছে; এজন ব্যক্তিৰ মূৰত গজিলে ৪ ইঞ্চিৰ শিং

নৰ্থ ইষ্ট নাওত কিছু দিনৰ পূৰ্বে ‘মানুহৰো শিং গজিব লৈছে; কিন্তু কেনেকৈ?’ শীৰ্ষক এক বাতৰি প্ৰকাশ পাইছিল। বৰ্তমান এই বাতৰিক সত্য প্ৰমাণ কৰি এজন ব্যক্তিৰ মূৰত শিং গজাৰ এটা ঘটনা পোহৰলৈ আহিছে।

জীৱ-জন্তুৰ মূৰত শিং থকাৰ দৰে এইবাৰ মধ্যপ্ৰদেশৰ সাগৰ নামৰ এখন জিলাৰ শ্যামলাল যাদৱ নামৰ এজন ব্যক্তিৰ মূৰত গজিছে প্ৰায় ৪ ইঞ্চি এটা শিং।

লগতে পঢ়ক http://মানুহৰো শিং গজিব লৈছে; কিন্তু কেনেকৈ ?

শ্যামলাল যাদৱে এই ৪ ইঞ্চিৰ শিংটো বিগত পাঁচ বছৰে মূৰত লৈ ঘূৰি ফুৰিছে। পাঁচ বছৰৰ পূৰ্বে শ্যামলাল যাদৱে মূৰত এক গুৰুতৰ আঘাত পাইছিল। ইয়াৰ পিছতে যাদৱৰ মূৰত শিং গজিবলৈ ধৰে।

শ্যামলাল যাদৱে বিভিন্ন চিকিৎসকৰ ওচৰত ইয়াৰ চিকিৎসা কৰাইছিল যদিও কোনো সুফল লাভ নকৰিলে। আনকি শ্যামলাল যাদৱে স্থানীয় নাপিতৰ দ্বাৰা শিংটো কাটিছিল যদিও পুনৰ শিংটো গজিবলৈ ধৰে।

পুনৰ শ্যামলাল যাদৱে ভাগ্যোদয় তীৰ্থ চিকিৎসালয় নামৰ এখন চিকিৎসালয়ত এজন চিকিৎসকৰ ওচৰত চিকিৎসা কৰায়। অৱশেষত অপাৰেশ্যনৰ জৰিয়তে শ্যামলাল যাদৱৰ মূৰৰ শিংটো উঠাই দিয়া হয়।

শ্যামলাল যাদৱক অপাৰেশ্যন কৰা চিকিৎসকে জনোৱা অনুসৰি শিংটো প্ৰায় ৪ ইঞ্চিৰ হ’ব আৰু চিটি স্কেনৰ জৰিয়তে শিংটো মূৰৰ ভিতৰলৈকে থকাও দেখা গৈছিল বুলি কয়।

লগতে চিকিৎসকজনে এই অদ্ভুত ঘটনাটো এক অধ্যয়ন কৰিব লগীয়া বিষয় বুলিও সদৰী কৰে।