অসাৰ হ’ল অসম আৰক্ষীৰ সঞ্চালক প্ৰধান ভাস্কৰজ্যোতি মহন্তৰ প্ৰতিশ্ৰুতি। আকৌ এবাৰ চূড়ান্ত বিফলতাৰে নিবনুৱা যুৱক-যুৱতীৰ আশাৰ সৈতে হেতালি খেলিলে অসম চৰকাৰে।
দেওবাৰে অনুষ্ঠিত হোৱা অসম আৰক্ষীৰ উপ পৰিদৰ্শক পদৰ লিখিত পৰীক্ষাৰ প্ৰশ্নকাকত ফাদিলৰ অভিযোগ উঠিছে।
ইতিমধ্যে সামাজিক মাধ্যমত ভাইৰেল হৈ পৰিছে প্ৰশ্নকাকতৰ কেইবাটাও পৃষ্ঠা।
উল্লেখ্য যে পৰীক্ষাৰ নিয়মাৱলী অনুসৰি পৰীক্ষাৰ্থীয়ে পৰীক্ষা হলৰ পৰা প্ৰশ্নকাকত লগত আনিব নোৱাৰে।
তদুপৰি পৰীক্ষাহলত প্ৰৱেশ কৰাৰ পূৰ্বেও প্ৰতিজন পৰীক্ষাৰ্থীকে তালাচী চলাইছে। পৰীক্ষা হলত ব্যৱস্থা কৰা হৈছে কটকটীয়া নিৰাপত্তাৰ।
তাৰ পিছতো এইদৰে পৰীক্ষা প্ৰশ্নকাকত কিদৰে ফাদিল হ’ল সেই লৈ চাঞ্চল্যৰ সৃষ্টি হৈছে।
পৰীক্ষা অনুষ্ঠি হোৱাৰ পূৰ্বেই প্ৰশ্নকাকত ফাদিল হৈছিল নেকি সেই লৈও তীব্ৰ চৰ্চা চলিছে।
অসম আৰক্ষীৰ সঞ্চালক প্ৰধান তথা ৰাজ্যিক পৰ্যায়ৰ আৰক্ষী নিযুক্তি বোৰ্ডৰ অধ্যক্ষ ভাস্কৰজ্যোতি মহন্তই নিকা তথা স্বচ্ছ নিযুক্তি পৰীক্ষাৰ প্ৰতিশ্ৰুতি দিছিল।
কিন্তু আৰক্ষী সঞ্চালক প্ৰধানৰ এই প্ৰতিশ্ৰুতি এতিয়া ধোঁৱাচাঙত উঠিল। বৰ্তমানলৈকে এই সন্দৰ্ভত কোনো মন্তব্য কৰাৰ পৰাও বিৰত আছে বিষয়াগৰাকী।
অনাগত সময়ত অসম চৰকাৰ, আৰক্ষী নিযুক্তি বোৰ্ডে এই বিষয়ত কি ব্যৱস্থা গ্ৰহণ কৰে সি লক্ষ্যণীয় হ’ব।
