তাপ প্ৰবাহে দহিছে সমগ্ৰ দেশ। তাপপ্ৰবাহৰ ফলত ইতিমধ্যে দেশত মৃত্যু হৈছে শতাধিক ব্যক্তিৰ। তাপৰ ফলত বহু লোক অসুস্থ হৈ পৰিছে।
স্বাস্থ্য বিভাগকে ধৰি প্ৰশাসনে সকলোকে সতৰ্ক কৰি দিছে। লগতে গৰমত সাম্ভাৱ্য বিপদৰ পৰা হাত সাৰিবলৈ ল’বলগীয়া সাৱধানতাৰ কথা প্ৰচাৰ কৰিছে স্বাস্থ্য বিভাগ আৰু প্ৰশাসনে। কিন্তু ঘৰৰ পোহনীয়া জীৱ-জন্তুৰ গৰমৰ বিষয়ে কোনেও তেনেকৈ একো পৰামৰ্শ দিয়া নাই।
সেয়েহে আজি আপোনালোকৰ বাবে লৈ আহিছোঁ গৰমত পোহনীয়া জন্তুৰ প্ৰতি ল’বলগা কিছু যতনৰ সম্পৰ্কে তথ্য –
অতি গৰমৰ বাবে পোহনীয়া জন্তুবোৰেও না না শাৰীৰিক সমস্যাত ভোগে। গৰমত শৰীৰত পানীৰ পৰিমাণ কমি যোৱাৰ বাবে পোহনীয়া জীৱ-জন্তুও গুৰুতৰভাৱে অসুস্থ হ’ব পাৰে।
এই সমস্যা হোৱাৰ আগতে পোহনীয়া জন্তুৰ শৰীৰত কেইবাটাও লক্ষণ দেখা যায়।
বিশেষজ্ঞসকলৰ মতে, অতি উত্তাপত হিট ষ্ট্ৰ’ক কেৱল মানুহৰেই নহয়, পোহনীয়া জন্তুৰো হিটষ্ট্ৰ’ক হ’ব পাৰে।
অতি গৰমৰ বাবে পোহনীয়া জন্তুৰ মুখৰ পৰা বেছিকৈ লেলাওটি ওলাব পাৰে। যদি আন সময়ত ওলোৱা লেলাওটিৰ ঘনত্বতকৈ গৰমৰ সময়ৰ লেলাৱটিৰ ঘনত্ব বেছি হয় তেন্তে চিকিৎসকৰ ওচৰলৈ লৈ যাব লাগে।
কুকুৰৰ নাক যদি গৰম বা শুকান হৈ থাকে তেন্তে জ্বৰ হ’ব পাৰে।
অতিমাত্ৰা গৰম হ’লে পোহনীয়া জন্তুৰ ডায়েৰিয়া হ’ব পাৰে। অস্বাভাৱিক মলত্যাগ হ’লে মল-মূত্ৰত থকা তেজ চিকিৎসকৰ ওচৰলৈ যাব লাগে।
গৰমৰ ফলত পোহনীয়া জন্তুৰ প্ৰস্ৰাৱত সমস্যা হয়। গতিকে পোহনীয়া জন্তুৰ প্ৰস্ৰাৱৰ ওপৰত চকু ৰাখিব লাগে।
যদি পানীৰ অভাৱত ভোগে তেন্তে পোহনীয়া জন্তুটো ভাগৰি পৰিব। অতিমাত্ৰা শুই থাকিব। দৌৰিবলৈও টান পাব। যদি আপোনাৰ পোহনীয়া জন্তুটোৱে হঠাতে নিস্তব্ধ হৈ পৰে বা বেছিভাগ সময় শুই কটায় তেন্তে সম্পূৰ্ণ পৰীক্ষা কৰাটো প্ৰয়োজনীয়।
পোহনীয়া জন্তুক গৰমৰ সময়ত কেতিয়াও বন্ধ বাহনৰ ভিতৰত ৰাখিব নালাগে। ৰাখিবলগা হ’লেও এচি অন কৰিব লাগে বা সকলো খিৰিকী খোলা ৰাখিব লাগে।
পোহনীয়া জন্তু থকা কোঠাৰ এটা চুকত এটা বাটিত পানী ৰাখিব লাগে। চৰাই হ’লে পিঞ্জৰাত দুটা পাত্ৰত পানী ৰাখিব লাগে। এটা খোৱাৰ বাবে, আনটো গা ধোৱাৰ বাবে। প্ৰয়োজন হ’লে চৰাইৰ পিঞ্জৰাৰ সন্মুখত ফেন চলাব লাগে।
খোজকঢ়াবলৈ পোহনীয়া জন্তুক ৰ’দলৈ নিব নালাগে। তাৰ সলনি পুৱাই অথবা গধূলি হে খোজকঢ়াব লাগে।
চিকিৎসকৰ পৰামৰ্শ লৈ সকলো ঔষধ হাতত ৰাখিব লাগে। যাতে জৰুৰীকালীন পৰিস্থিতিত প্ৰাথমিক চিকিৎসা প্ৰদান কৰিব পৰা যায়।
