নগাঁও জিলাৰ চামগুৰি আৰক্ষী থানাৰ অন্তৰ্গত আমনিত আজি পুৱতি নিশা এজন লম্পট স্বামীয়ে পত্নীক হত্যা কৰা ঘটনাই অঞ্চলজুৰি আলোড়নৰ সৃষ্টি কৰিছে ৷
ঘটনা সম্পৰ্কে জানিব পৰা মতে, নগাঁও জিলাৰ চামগুৰি আৰক্ষী থানাৰ অন্তৰ্গত মিছাস্থিত ভাৰতীয় সেনা ছাউনীৰ সমীপৱৰ্তী আমনিত মনোজ মুড়া ( ২৩) নামৰ এজন লম্পট স্বামীয়ে পত্নী কবিতা গুৰ(২১) নামৰ নৱ বিবাহিতা মহিলা গৰাকীক আজি পুৱতি নিশা প্ৰায় ৩-৩০ বজাত চোকা অস্ত্ৰ আৰু লাঠিৰে কোবাই কোবাই হত্যা কৰে ৷
পত্নীৰ পৰা মদ খাবলৈ এশ টকা বিচাৰি নোপোৱাৰ কাৰণেই মনোজে কবিতাক নিষ্ঠুৰভাৱে হত্যা কৰিলে বুলি আৰক্ষী সূত্ৰে জানিব পৰা গৈছে ৷
আমনি নিবাসী ৰূপলাল মূড়া নামৰ লোক জনৰ পুত্ৰ মনোজে দুবছৰ পূৰ্বে কবিতাক ঢেকীয়াজুলি আৰক্ষী থানা লুলুপমাৰি চিৰাকাটাৰ পৰা পলুৱাই আনিছিল ৷ চিৰাকাটা নিবাসী মৃত চুমনা গুৰ আৰু বজয়ন্তী গুৰৰ জীয়ৰী কবিতা যোৱা ২২ ডিচেম্বৰত পিতৃ গৃহলৈ গৈ কালি স্বামী গৃহলৈ ঘুৰি অহাৰ পাছতে আজি পুৱতি নিশা উক্ত নাৰকীয় ঘটনাটো সংঘটিত হয় ৷
ইপিনে, আজি কবিতাৰ মাক বজয়ন্তী গুৰে চামগুৰি আৰক্ষী থানাত জোৱায়েক মনোজৰ বিৰুদ্ধে উক্ত ঘটনা সন্দৰ্ভত এখন এজাহাৰ দাখিল কৰাৰ পাছত আৰক্ষীয়ে অভিযুক্ত মনোজক নিজ গৃহৰ পৰা গ্ৰেপ্তাৰ কৰি সম্প্ৰতি থানাৰ লক আপত ৰখাৰ লগতে মৃতদেহৰ মৰণোত্তৰ পৰীক্ষাৰ বাবে নগাঁও অসামৰিক চিকিৎসালয়লৈ প্ৰেৰণ কৰা বুলি জানিব পৰা গৈছে ৷
