নৱ নিৰ্বাচিত সাংসদ হৰেনচিং বে’ই নিৰ্বাচনী বিজয় উৎসৱত এগৰাকী মহিলাৰ গালত চোৱাক লৈ হোৱা বিতৰ্কৰ প্ৰতিক্ৰিয়া কৰি মহিলাগৰাকীৰ স্বামী মেথিউ ইংলেঙে বে’ৰ আচৰণত একো ভুল নাছিল বুলি মন্তব্য কৰিছে।
দেওবাৰে ৰংথে-আং গাওঁস্থিত নিজৰ ঘৰত সংবাদমেলযোগে ইংলেঙে স্পষ্ট কৰি দিয়ে যে তেওঁৰ পত্নী সাংসদ বে’ৰ নিজৰ জীয়েকৰ দৰে, আৰু জীয়েকৰ দৰে এগৰাকী মহিলাক মৰমতে চোৱাত একো ভুল নাই।
কাৰ্বি পৰম্পৰা অনুসৰি তেওঁৰ পত্নী আৰু সাংসদ বে’ একে গোষ্ঠীৰ আৰু তেওঁলোক সম্বন্ধত বাপেক-জীয়েক, তেওঁ কয়।
“মই আৰু মোৰ পত্নী বে’ক লগ কৰি বিজয়ৰ অভিনন্দন জনাবলৈ গৈছিলো। মই সাংসদজনৰ কাষতে আছিলো। মিদিয়াৰ সৈতে কেমেৰাৰ সন্মুখত মত বিনিময় কৰি থাকোতে তেওঁ মোৰ পত্নীৰ গালত স্পৰ্শ কৰিছিল। মোৰ পত্নী আৰু সাংসদ বে’ দুয়ো বে’ গোষ্ঠীৰ। কাৰ্বি পৰম্পৰা মতে মোৰ পত্নী সাংসদজনৰ জী। মোৰ পত্নীৰ মুখত চুই সাংসদ হৰেনচিং বে’ই একো ভুল কৰা নাই।”; ইংলেঙে জনায়,
সাংসদ বে’ৰ বিৰুদ্ধে “মহিলাৰ গাল চোৱা”ক লৈ আঙুলি উঠোৱা এ’ পি এইচ এল চি (All Party Hills Leaders Conference)ৰ নেতা জি কাথাৰে “ৰাজনীতি” কৰা বুলি মন্তব্য কৰি ইংলেঙে কাথাৰৰ পৰা ক্ষমা প্ৰাৰ্থনা দাবী কৰিছে।
“কাথাৰে নিজৰ ৰাজনৈতিক স্বাৰ্থসিদ্ধিৰ বাবে বেলেগৰ ভাবমূৰ্তি নষ্ট কৰিব নালাগে। হৰেনচিং বে’ৰ ভাবমূৰ্তি নষ্ট কৰা বাবে কাথাৰে ক্ষমা খুজিব লাগে,” ইংলেঙৰ মত।
মেথিউ ইংলেং আৰু বৰ্তমানৰ সাংসদ হৰেনচিং বে’ দুয়ো ইউ পি দি এচ (United People’s Democratic Solidarity) সশস্ত্ৰ সংগ্ৰামৰ সহযোদ্ধা আছিল।
কাৰ্বি আংলং স্বায়ত্ত শাসিত পৰিষদৰ মুখ্য কাৰ্য্যবাহী সদস্য তুলিৰাম ৰংহাঙৰ বাংল’ত লোকসভা নিৰ্বাচনৰ ফলাফল ঘোষণাৰ দিনা “ঘটনা”টোৰ সূত্ৰপাত হৈছিল।
বিজয়ী বে’ৰ লগতে তুলিৰাম ৰংহাং আৰু বিজেপিৰ অন্যান্য বিষয়-ববীয়া আৰু সমৰ্থকো বিজয় উৎসৱটোত উপস্থিত আছিল।
