হোৱাটছএপত ড্ৰাগছৰ অৰ্ডাৰ দি আৰক্ষীৰ হাতত ধৰা পৰিল হায়দৰাবাদৰ এগৰাকী চিকিৎসক। পাঁচ লাখ টকাৰ ড্ৰাগছ কিয় অৰ্ডাৰ দিছিল সেয়া জানিব পৰা হোৱা নাই। অৱশ্যে চিকিৎসকৰ ওচৰ পোৱাৰ পূৰ্বেই আৰক্ষীয়ে ড্ৰাগছখিনি জব্দ কৰে।
জানিব পৰা মতে, চিকিৎসক নম্ৰতা চিগুৰুপতি হায়দৰাবাদ চহৰৰ ওমেগা হাস্পতালৰ চিইঅ’ হিচাপে কৰ্মৰত আছিল। ছমাহ পূৰ্বে তেওঁ সেই পদৰ পৰা পদত্যাগ কৰিছিল।
আৰক্ষীয়ে জনোৱা মতে, চিকিৎসকগৰাকীয়ে মুম্বাইৰ এজন ড্ৰাগছ ব্যৱসায়ীৰ পৰা প্ৰায় ৫ লাখ টকাৰ কোকেইন অৰ্ডাৰ দিছিল। যিটো কুৰিয়ৰৰ জৰিয়তে হায়দৰাবাদৰ ৰায়াদুৰগামলৈ ডেলিভাৰী কৰাৰ কথা আছিল। সেই সময়তে তেওঁ হাতেলোটে ধৰা পৰে। সৰবৰাহকাৰী ভান্স ঢাক্কাৰৰ সহযোগী ধৃত বালকৃষ্ণই চিকিৎসকৰ হাতত সেই ড্ৰাগছ গতাই দিছিল।
৩৪ বছৰীয়া নম্ৰতাই হোৱাটছএপযোগে মুম্বাইৰ ভান্স ঢাক্কৰৰ সৈতে যোগাযোগ কৰি ড্ৰাগছৰ অৰ্ডাৰ দি সম্পূৰ্ণ ৫ লাখ টকা অনলাইনযোগে আদায় দিয়ে।
আৰক্ষী বিষয়া ভেংকনা এনয়ে কয়, “নম্ৰতা পেছাত এগৰাকী চিকিৎসক। তথ্য পোৱাৰ পিছত আমি তেওঁৰ ওপৰত আৰু তেওঁ কোকেইন অৰ্ডাৰ কৰা ব্যক্তিজনৰ ওপৰত চকু ৰাখিছিলোঁ। হাতেলোটে ধৰা পেলাওঁ।” তেওঁ কয় যে তালাচীৰ সময়ত তেওঁলোকৰ পৰা ৫৩ গ্ৰাম কোকেইন, নগদ ১০ হাজাৰ টকা আৰু দুটা মোবাইল ফোন উদ্ধাৰ কৰা হৈছে।
চিকিৎসক আৰু কোকেইন ব্যৱসায়ী তথা সৰবৰাহকাৰীৰ বিৰুদ্ধে মাদক দ্ৰব্য নিয়ন্ত্ৰণ আইনৰ একাধিক ধাৰাত গোচৰ ৰুজু কৰি ন্যায়িক জিম্মালৈ প্ৰেৰণ কৰা হৈছে। জেৰাৰ সময়ত চিকিৎসকগৰাকীয়ে স্বীকাৰ কৰে যে তেওঁ এতিয়ালৈকে ড্ৰাগছৰ বাবে প্ৰায় ৭০ লাখ টকা ব্যয় কৰিছে।
