কাষত নাই সতীৰ্থ মনীষ: জন্মদিনৰ দিনাই ভাবুক কেজৰিৱালে দিলে আবেগিক বাৰ্তা
দিল্লীৰ মুখ্যমন্ত্ৰী তথা আম আদমী পাৰ্টীৰ মুৰব্বী অৰবিন্দ কেজৰিৱালৰ আজি জন্মদিন। জন্মদিন উপলক্ষে কেজৰিৱালে আজি লাভ কৰিছে শুভাকাংক্ষী তথা গুণগ্ৰাহীৰ শতসহস্ৰ শুভাষা। কিন্তু তাৰ মাজতো যেন অসম্পূৰ্ণ কেজৰিৱাল!
এই অসম্পূৰ্ণতাৰ কাৰণ বাখ্যা কৰিছে দিল্লীৰ মুখ্যমন্ত্ৰীগৰাকীয়ে। জন্মদিনৰ শুভেচ্ছা জনোৱা সকলোকে ধন্যবাদ জনাই কেজৰিৱালে দিছে এক আবেগিক বাৰ্তা। কেজৰিৱালৰ আবেগিক উক্তি, আজি তেওঁ ‘মিছ’ কৰিছে সতীৰ্থ মনীষ চিছ’দিয়াক।
এক টুইট যোগে কেজৰিৱালে উল্লেখ কৰা মতে, সুৰা নীতিৰ অভিযোগত যোৱা ফেব্ৰুৱাৰী মাহৰ পৰাই কাৰাবন্দী হৈ থকা প্ৰাক্তন মন্ত্ৰী, সতীৰ্থ মনীষ চিছ’দিয়াক তেওঁ আজি ‘মিছ’ কৰিছে।
তেওঁ কয়, “আজি মোৰ জন্মদিন। বহু লোকে শুভেচ্ছা জনাইছে। বহুত বহুত ধন্যবাদ! কিন্তু মই মনীষক মিছ কৰিছো। তেওঁ মিছা গোচৰত জেলত আছে।”
কাৰাগাৰলৈ নিক্ষেপ কৰাৰ পূৰ্বে দিল্লীৰ শিক্ষামন্ত্ৰী হিচাপে কাৰ্যনিৰ্বাহ কৰি থকা চিছ’দিয়াৰ প্ৰসঙ্গ উল্লেখেৰে তেওঁ ভাৰতত জন্ম গ্ৰহণ কৰা প্ৰতিটো শিশুকে গুণগত শিক্ষা প্ৰদানৰ প্ৰতিজ্ঞা গ্ৰহণ কৰিবলৈও আহ্বান জনায়।
“আহক আমি সকলোৱে আজি এটা প্ৰতিশ্ৰুতি লওঁ যে ভাৰতত জন্ম লোৱা প্ৰতিটো শিশুক উন্নত মানৰ শিক্ষা প্ৰদানৰ বাবে আমি আমাৰ সামৰ্থ্যৰ সকলো কাম কৰিম। সেয়াই শক্তিশালী ভাৰতৰ ভেটি স্থাপন কৰিব।”– কেজৰিৱালে কয়।
এই প্ৰতিশ্ৰুতিয়ে ভাৰতক শীৰ্ষস্থান দিয়াৰ দেশবাসীৰ সপোন বাস্তৱায়িত কৰাত সহায় কৰিব আৰু সিয়েই মনীষ চিছ’দিয়াক সুখী কৰিব বুলিও আবেগিক মন্তব্য কৰে দিল্লীৰ মুখ্যমন্ত্ৰীগৰাকীয়ে।
Today is my birthday. Many people are sending their wishes. Thank you so much!
But I miss Manish. He is in jail in a false case. Lets all take a pledge today – that we will do everything within our means to provide best quality education to every child born in India. That will…
— Arvind Kejriwal (@ArvindKejriwal) August 16, 2023
উল্লেখ্য যে, দিল্লী আবকাৰী নীতি ২০২১-২২ৰ খচৰা প্ৰস্তুত আৰু ৰূপায়ণৰ ক্ষেত্ৰত দুৰ্নীতিৰ অভিযোগত চিবিআইয়ে ২৬ ফেব্ৰুৱাৰীত চিছ’দিয়াক গ্ৰেপ্তাৰ কৰিছিল।
ইয়াৰ পিছতে এই সুৰা নীতিৰ ধন সৰবৰাহৰ অভিযোগত ৯ মাৰ্চত তিহাৰ কাৰাগাৰতে চিছ’ডিয়াক গ্ৰেপ্তাৰ কৰিছিল এনফৰ্চমেণ্ট ডাইৰেক্টৰেটে।
কিন্তু এই সকলো অভিযোগ অস্বীকাৰ কৰি কেজৰিৱালে ৰাজনৈতিক প্ৰতিশোধৰ বাবে তদন্তকাৰী সংস্থাসমূহৰ অপব্যৱহাৰেৰে বিজেপিয়ে চিছ’ডিয়াক ভুৱা গোচৰত গ্ৰেপ্তাৰ কৰা বুলি দাবী কৰি আহিছে কেজৰিৱালে।