‘মোৰ জয় নিশ্চিত’: গুৱাহাটীত বিশাল সমদলেৰে অন্তিম প্ৰচাৰত কংগ্ৰেছৰ ববিতা শৰ্মা
“আমাৰ যিসকল কংগ্ৰেছ কৰ্মী আছে, তেওঁলোকৰ উৎসাহ-উদ্দীপনা দেখিলে বুজি পাব আমাৰ জয় নিশ্চিত। ৰাইজৰ সঁহাৰিৰ পৰাও জয়ী হ’ম বুলি নিশ্চিত।”, প্ৰচাৰৰ অন্তিম দিনা দিচপুৰস্থিত মানৱেন্দ্ৰ শৰ্মা কমপ্লেক্সৰ পৰা জালুকবাৰীলৈকে বাহিৰ কৰা এক বাইক-গাড়ী ৰেলিৰ আগমুহূৰ্তত নৰ্থ ইষ্ট নাওৰ সাংবাদিকৰ আগত এই মন্তব্য কৰে গুৱাহাটী লোকসভা সমষ্টিৰ কংগ্ৰেছ প্ৰাৰ্থী ববিতা শৰ্মাই।
ইয়াৰোপৰি, সাংসদ হিচাপে নিৰ্বাচিত হ’লে গুৱাহাটীৰ সমস্যাসমূহ সমাধান কৰাৰ ক্ষেত্ৰত বলিষ্ঠ পদক্ষেপ গ্ৰহণ কৰিব বুলি দাবী কৰি শৰ্মাই কয়, “গুৱাহাটী মহানগৰীৰ মূল সমস্যা হৈছে খোৱাপানীৰ সমস্যা। আমাৰ চৰকাৰৰ দিনতে খোৱাপানীৰ সমস্যা সমাধানৰ বাবে এখন আঁচনি আনিছিলো যদিও সেইখন কাৰ্য্যকৰী হৈ নুঠিল। পৰৱৰ্তী যি চৰকাৰ আহিল, তেওঁলোকেও আঁচনিখন কাৰ্য্যকৰী নকৰিলে”।
আনহাতে সাংসদ হিচাপে জয়ী হ’লে বানপানী আৰু গৰাখহনীয়াক ৰাষ্ট্ৰীয় সমস্যা হিচাপে স্বীকৃতি দিয়াবলৈ চেষ্টা কৰিব বুলিও সদৰী কৰে।
দাৰিদ্ৰ্য সীমাৰেখাৰ তলৰজনসাধাৰণে যাতে সেই অৱস্থানৰ পৰা ওপৰলৈ আহিব পাৰে তাৰ বাবে চেষ্টা কৰা, পৰ্য্যটন ক্ষেত্ৰৰ উন্নীতকৰণ, হাজো, বকো, ছয়গাওঁ ইত্যাদি অঞ্চলত সাংস্কৃতিক পৰ্যটন গঢ় দিয়াৰ ক্ষেত্ৰত গুৰুত্ব আৰোপ কৰা– নিজৰ কাৰ্য্যসূচী হিচাপে দাঙি ধৰে প্ৰাৰ্থীগৰাকীয়ে।
মন কৰিব লগীয়া যে, বাইক ৰেলিৰ সময়তে দিচপুৰ ৰাজধানী মছজিদৰ সমীপত তীব্ৰ যান-জঁটৰ সৃষ্টি হয়, যাৰ ফলত বহু সময় ধৰি আবদ্ধ হৈ থাকিবলগীয়া হয় এখন ৰোগী কঢ়িওৱা এম্বুলেন্স। এম্বুলেন্সখনে চাইৰেন বজাই চাইড বিচাৰে যদিও সন্মুখত বহুসংখ্যক বাইক থকাৰ বাবে প্ৰায় ২০ মিনিট ধৰি আবদ্ধ হৈ থাকে এম্বুলেন্সখন।
প্ৰাক্তন মুখ্য মন্ত্ৰী তৰুণ গগৈয়ে উদ্বোধন কৰা উক্ত ৰেলিত কংগ্ৰেছ প্ৰাৰ্থীগৰাকীৰ সংগ দিয়ে প্ৰদেশ কংগ্ৰেছৰ সভাপতি ৰিপুণ বৰাই।