মেঘালয়ৰ পূব জয়ন্তীয়া পাহাৰ জিলাত কয়লা খনিত বিগত দুটা সপ্তাহ ধৰি আবদ্ধ হৈ থকা পোন্ধৰজন খনি শ্ৰমিকক উদ্ধাৰ অভিযানত শেহতীয়াকৈ নামি পৰিব ভাৰতীয় বায়ুসেনা বাহিনীৰ এটি দল।
শুকুৰবাৰে ভাৰতীয় বায়ুসেনাৰ এখন বিমানেৰে উচ্চ ক্ষমতাসম্পন্ন পাম্প তথা এনডিআৰএফৰ জোৱানক লৈ উৰিষ্যাৰ পৰা আহি উদ্ধাৰ অভিযানত নামি পৰিব। তদুপৰি, উৰিষ্যা অগ্নি নিৰ্বাপক সেৱাৰ এটা দলো বিমানেৰে আহি আছে।
অত্যাধুনিক মাৰ্টিন চি-১৩০জে ছুপাৰ হাৰকুলেছ বিমানখন গুৱাহাটীত অৱতৰম কৰি ইয়াৰ পৰাই শক্তিশালী পাম্পটো মেঘালয়ৰ পূব জয়ন্তীয়া পাহাৰলৈ লৈ যোৱা হ’ব। ইণ্ডিয়ান এক্সপ্ৰেছ কাকতৰ এটা বাতৰিত এইকথা প্ৰকাশ পাইছে।
উল্লেখযোগ্য যে ১৫ জন খনি শ্ৰমিক মেঘালয়ৰ পূব জয়ন্তীয়া পাহাৰ জিলাৰ কেছান কয়লা খনিত যোৱা ১৩ ডিচেম্বৰৰ পৰাই আবদ্ধ হৈ আছে। এই শ্ৰমিকসকলৰ বেছিভাগেই অসম আৰু মেঘালয়ৰ। ইতিমধ্যে এছডিআৰএফ, এনডিআৰএফ আৰু স্থানীয় কৰ্তৃপক্ষই শ্ৰমিকসকলক উদ্ধাৰৰ বাবে যথাসাধ্য চেষ্টা চলাইছে যদিও খনিত জলস্তৰ বেছি হোৱা বাবে এতিয়াও উদ্ধাৰত সফল হ’ব পৰা নাই।
এই উদ্ধাৰ অভিযানত মেঘালয় চৰকাৰে যৎপৰোনাস্তি চেষ্টা অব্যাহত ৰাখিছে যদিও অসমৰ কেইবাজনো শ্ৰমিক আবদ্ধ হৈ থকাৰ পাছতো অসম চৰকাৰে কোনো ব্যৱস্থা গ্ৰহণ কৰা নাই।
এনে এক পৰিস্থিতিত ৰাষ্ট্ৰীয় দুৰ্যোগ ব্যৱস্থাপনা কৰ্তৃপক্ষৰ অনুৰোধ মৰ্মে ভাৰতীয় বায়ুসেনাই উদ্ধাৰৰ অভিযানত সহায় আগবঢ়োৱাৰ সিদ্ধান্ত গ্ৰহণ কৰিছে।
অগ্নিনিৰ্বাপক সেৱাৰ সঞ্চালক প্ৰধান বি কে শৰ্মাই জানিবলৈ দিয়ে যে মুখ্য অগ্নি নিৰ্বাপক সেৱা বিষয়া সুকান্ত শেঠীৰ নেতৃত্বত এটা ২০ জনীয়া সদস্যৰ দল বায়ু সেনা বাহিনীৰ এখন বিশেষ বিমানেৰে উচ্চ শক্তি সম্পন্ন পাম্পকে ধৰি সা-সজুঁলিৰে সৈতে শ্বিলঙলৈ ৰাওনা হৈছে। ‘’ আবদ্ধ হৈ পৰা খনি শ্ৰমিকসকলক উদ্ধাৰৰ ক্ষেত্ৰত তেওঁলোকে স্থানীয় কৰ্তৃপক্ষক সহায় কৰিব,’’-তেওঁ কয়।
দলটোৱে আন আন উচ্চ প্ৰযুক্তিৰ সা-সজুলি তথা যন্ত্ৰ-পাতিৰ উপৰিও কমেও ২০ টা উচ্চ ক্ষমতা সম্পন্ন পাম্প লৈ আনিছে। এই একোটা পাম্পে প্ৰতি মিনিটত ১,৬০০ লিটাৰ পানী উলিয়াই দিব পৰা শক্তি সম্পন্ন। দলটোৱে প্ৰথমতে পৰিস্থিতিটো অধ্যয়ন তথা বিশ্লেষণ কৰাৰ পাছত সন্ধান তথা উদ্ধাৰ অভিযান আৰম্ভ কৰিব।
