লকআপত ৩গৰাকী মহিলাক উলংগ কৰি অত্যাচাৰ চলোৱা আৰক্ষী বিষয়া মহেন্দ্ৰ শৰ্মাক নিলম্বন
আৰক্ষী চকীৰ ভিতৰত ৩ গৰাকীকৈ মহিলাক উলংগ কৰি অমানুষিক নিৰ্যাতন চলোৱাত অভিযুক্ত দৰঙৰ বুঢ়া আৰক্ষী চকীৰ ভাৰপ্ৰাপ্ত বিষয়া মহেন্দ্ৰ শৰ্মাক নিলম্বন কৰা হৈছে।
মহেন্দ্ৰ শৰ্মাৰ লগতে মহিলা কেইগৰাকীক নিৰ্যাতন চলোৱাত তেওঁক সহযোগ কৰা বিনীতা বড়ো নামৰ মহিলা কনিষ্টবল গৰাকীকো নিলম্বন কৰা হয়।
ভুক্তভুগী মহিলা কেইগৰাকীৰ পৰিয়ালে দৰং জিলাৰ আৰক্ষী অধীক্ষকৰ ওচৰত দাখিল কৰা অভিযোগৰ ভিত্তিত দৰং আৰক্ষীয়ে দুয়োজনৰ বিৰুদ্ধে গোচৰ ৰুজু কৰিছে।
উল্লেখযোগ্য যে বুঢ়া আৰক্ষী চকীত ৰুজু হৈ থকা অপহৰণৰ এটা গোচৰৰ অভিযুক্তক বিচাৰি যোৱা ৯ ছেপ্তেম্বৰত আৰক্ষীৰ এটা দলে গুৱাহাটীৰ ছয়মাইলত অভিযান চলাইছিল। কিন্তু অভিযুক্তক বিচাৰি নাপাই আৰক্ষীয়ে তেওঁৰ তিনিগৰাকী ভগ্নীক সন্ধিয়াৰ পিছত বুঢ়া আৰক্ষী চকীলৈ লৈ গৈছিল।
মহিলা ৩ গৰাকী সংবাদ মাধ্যমক জনোৱা মতে বুঢ়া আৰক্ষী চকীলৈ নি ভাৰপ্ৰাপ্ত বিষয়া মহেন্দ্ৰ শৰ্মাই তেওঁলোকৰ ওপৰত অভিযুক্ত ভাতৃক বিচৰাৰ নামত উলংগ কৰি নিৰ্মমভাৱে প্ৰহাৰ কৰা লগতে যৌন নিৰ্যাতনো চলায়।
নিৰ্যাতিতা মহিলা কেইগৰাকীৰ মাজত এগৰাকী দুমাহৰ গৰ্ভৱতী মহিলাও আছিল, কিন্তু বাৰে বাবে কাকুতি-মিনতি কৰাৰ পিছতো ক্ষান্ত নোহোৱা শৰ্মাৰ উপৰ্যুপৰি প্ৰহাৰত গৰ্ভৱতী মহিলা গৰাকীৰ গৰ্ভপাত হয়।
আনহাতে মুখ্য মন্ত্ৰী সৰ্বানন্দ সোণোৱালে এই সমগ্ৰ ঘটনাৰ তদন্তৰ নিৰ্দেশ দিছে। মুখ্য মন্ত্ৰীয়ে চেণ্ট্ৰেল ৱেষ্টাৰ্ণ ৰেঞ্জৰ ডি আই জি ব্ৰজেনজিৎ সিংহক ঘটনাৰ তদন্ত কৰিবলৈ নিৰ্দেশ দিয়ে।