আই আই টি-গুৱাহাটীৰ এগৰাকী ছাত্ৰই অনলাইনযোগে আইছিছৰ প্ৰতি সমৰ্থন প্ৰকাশ কৰি কেম্পাছৰ পৰা নিৰুদ্দেশ হৈ থকাৰ পিছত শনিবাৰে তেওঁক আটক কৰা হৈছে।চতুৰ্থ বৰ্ষৰ বায়’টেকন’লজীৰ ছাত্ৰজনে লিংকডইনত এখন মুকলি পত্ৰ লিখি সন্ত্ৰাসবাদী সংগঠনটোৰ প্ৰতি আনুগত্য প্ৰকাশ কৰা বুলি জানিব পৰা গৈছে। শেহতীয়াকৈ ধুবুৰী জিলাত আইছিছ ইণ্ডিয়াৰ কথিত মুৰব্বী হৰিশ ফাৰুকীক গ্ৰেপ্তাৰ কৰাৰ পিছতে এই কাণ্ড সংঘটিত হৈছে।
আৰক্ষীৰ সূত্ৰ অনুসৰি আইছিছত যোগদান কৰাৰ ইচ্ছা প্ৰকাশ কৰা ইমেইল আৰু ছ’চিয়েল মিডিয়া পোষ্টৰ পিছতে উদ্বেগৰ সৃষ্টি হৈছিল। লিংকডইনত নিজৰ সিদ্ধান্তৰ বিষয়ে ব্যাখ্যা কৰি ৰাজহুৱা পত্ৰ লিখাৰ পিছতে লুকাউট এলাৰ্ট জাৰি কৰা হয়।
পিছত তেওঁক গুৱাহাটীৰ পৰা প্ৰায় ৩০ কিলোমিটাৰ নিলগৰ হাজোত উদ্ধাৰ কৰি সোধা-পোছাৰ বাবে আটক কৰি ৰখা হয়।
লগতে পঢ়কঃ কি দিন পৰিল! বিচাৰি টকা নাপালে, ভাড়াতীয়া গুণ্ডা লগাই নিজৰ পিতৃকে গুলীয়াই হত্যা কৰালে কিশোৰে
আই আই টি-গুৱাহাটী কৰ্তৃপক্ষই নিশ্চিত কৰিছে যে তেওঁ দুপৰীয়াৰ পৰা নিৰুদ্দেশ হৈ আছিল আৰু তেওঁৰ ফোনো সংযোগ সীমাৰ বাহিৰত আছিল। অসম আৰক্ষী সঞ্চালক প্ৰধান জি পি সিঙে টুইটাৰযোগে ছাত্ৰজনক যাত্ৰা কৰি থকা অৱস্থাত আটক কৰা হৈছিল বুলি উল্লেখ কৰি তেওঁ আইনী প্ৰক্ৰিয়াৰ সন্মুখীন হ’ব লাগিব বুলি কয়।
ছাত্ৰজনৰ পৰা আইছিছত যোগদান কৰিবলৈ যোৱাৰ পথত বুলি ইমেইল পোৱাৰ পিছতে আৰক্ষীয়ে তদন্ত আৰম্ভ কৰে। তেওঁৰ হোষ্টেলৰ কোঠাত তালাচী চলাই আইছিছৰ পতাকাৰ দৰে ক’লা পতাকা আৰু ইছলামিক ধৰ্মীয় পুথি পোৱা যায়। সূত্ৰসমূহে লগতে ছাত্ৰজনৰ কেম্পাছত কোনো ঘনিষ্ঠ বন্ধু নথকা অকলশৰীয়া আছিল বুলিও ব্যক্ত কৰিছে।
আইছিছ ইণ্ডিয়াৰ নেতা বুলি ধাৰণা কৰা হৰিশ ফাৰুকীক গ্ৰেপ্তাৰ কৰাৰ পিছতে ছাত্ৰজনৰ এই ঘটনাটোৱে বিশেষ গুৰুত্ব লাভ কৰিছে। অনুৰাগ সিং (ওৰফে ৰেহান)কে ধৰি সহযোগীসহ ফাৰুকীক বুধবাৰে অসম আৰক্ষীয়ে আটক কৰে।
লগতে পঢ়কঃউৎসৱৰ ভিৰ নিয়ন্ত্ৰণৰ বাবে অধিক হোলী বিশেষ ৰে’ল; কেইখনমান ৰে’লৰ অতিৰিক্ত ষ্টপেজ প্ৰদান
২০১৯ চনৰ পৰা সক্ৰিয় হৈ থকা ফাৰুকীয়ে বাংলাদেশত আত্মগোপন কৰি ভাৰতীয়ক উগ্ৰপন্থী সংগঠনটোৰ প্ৰতি আকৰ্ষিত কৰাৰ সন্দেহ কৰা হৈছে। তেওঁৰ বিৰুদ্ধে ভাৰতৰ কেইবাখনো ৰাজ্যত আইছিছৰ ঘাটি স্থাপনৰ অভিযোগ আছে।
