ফলৰ আৱৰ্জনাক শক্তিশালী পানী বিশুদ্ধকৰণলৈ ৰূপান্তৰিত কৰাত সফলতা অৰ্জন আই আই টি-গুৱাহাটীৰ
আই আই টি গুৱাহাটীৰ গৱেষকসকলে ফলৰ আৱৰ্জনাসমূহৰ পৰা আহৰণ কৰা বায়’চাৰ ব্যৱহাৰ কৰি উদ্যোগিক বর্জ্য পানীৰ পৰা বিপজ্জনক প্রদূষক আঁতৰোৱাৰ এক কম খৰচী আৰু বহনক্ষম পদ্ধতি উদ্ভাৱন কৰিছে৷
অধ্যাপক গোপাল দাসৰ নেতৃত্বত চলা এই গৱেষণাৰ লক্ষ্য হৈছে নাইট্ৰ’এৰ’মেটিক যৌগ, যিবোৰ ৰং, ঔষধ আৰু প্ৰসাধন সামগ্ৰীৰ দৰে উদ্যোগৰ বর্জ্য পানীত থকা বিষাক্ত প্রদূষক নিষ্কাষণ কৰা৷ দলটোৱে আনাৰসৰ কুঁহি আৰু মৌচুমি টেঙাৰ আঁহ ব্যৱহাৰ কৰি পাইৰ’লাইছিছৰ জৰিয়তে বায়’চাৰ সৃষ্টি কৰিছিল, যিয়ে ৪-নাইট্ৰ’ফিনল নামৰ সাধাৰণ দূষক পদাৰ্থ শোষণ কৰাত ফলপ্ৰসূ বুলি প্ৰমাণিত হৈছিল।
বায়’চাৰ পদ্ধতিয়ে কম খৰচি আৰু পৰিৱেশ অনুকূল বিকল্প ব্যৱস্থা আগবঢ়াই। ইয়াৰ উপৰিও বায়’চাৰক একাধিকবাৰ পুনৰ ব্যৱহাৰ কৰিব পাৰি, যাৰ ফলত এই প্ৰক্ৰিয়াটো স্থায়ী হৈ পৰিব।
কেমিকেল ইঞ্জিনিয়াৰিং ছায়েন্সত প্ৰকাশিত এই গৱেষণাত গ্ৰাম্য পানী বিশুদ্ধকৰণ আৰু পৰিৱেশ উন্নয়নৰ প্ৰচেষ্টাত এই প্ৰযুক্তি ব্যৱহাৰৰ সম্ভাৱনাৰ ওপৰত আলোকপাত কৰা হৈছে।
পৰৱৰ্তী পদক্ষেপসমূহৰ ভিতৰত পৰিৱেশৰ প্ৰত্যাহ্বানসমূহ মোকাবিলা কৰিবলৈ বাণিজ্যিক উৎপাদনৰ সম্ভাৱনাকে ধৰি পৰীক্ষাগাৰৰ পৰিসৰৰ পৰীক্ষণ, ক্ষেত্ৰ পৰীক্ষা আৰু বজাৰৰ বৈধতা অন্তৰ্ভুক্ত কৰা হৈছে।