ঈদ উপলক্ষে দেশৰ বিভিন্ন প্ৰান্তৰ ৩২ লাখ দৰিদ্ৰ মুছলমান পৰিয়াললৈ বিজেপিয়ে বিশেষ কিট বিতৰণ কৰিব। এই পদক্ষেপৰ নাম “সৌঘট-ই-মোডী”, যিটো বিজেপিৰ সংখ্যালঘু মৰ্চাই আৰম্ভ কৰিছে।
মঙলবাৰে দিল্লীৰ নিজামুদ্দিনৰ পৰা এই প্ৰকল্পটো উদ্বোধন কৰে বিজেপিৰ ৰাষ্ট্ৰীয় সভাপতি জে পি নাড্ডাই। ইয়াৰ লক্ষ্য হৈছে দৰিদ্ৰ মুছলমান পৰিয়াললৈ ঈদৰ আনন্দ কঢ়িয়াই অনা, যাতে তেওঁলোকে কোনো ধৰণৰ আৰ্থিক অসুবিধা নোহোৱাকৈ উৎসৱ পালন কৰিব পাৰে।
এই প্ৰকল্প সফলতাৰে ৰূপায়ণ কৰিবলৈ ৩২,০০০ কৰ্মীক ৩২,০০০ টা মছজিদৰ সৈতে নিয়োজিত কৰা হৈছে। যিসকলে প্ৰতিটো মছজিদত উপস্থিত থাকি দৰিদ্ৰ মুছলমান পৰিয়াললৈ কিট যোগান ধৰিব।
বিজেপিৰ সংখ্যালঘু মৰ্চাৰ ৰাষ্ট্ৰীয় সভাপতি জামাল ছিদ্দিকীয়ে কয় যে এই আঁচনিৰ অধীনত ৰমজান, ঈদ, গুড ফ্ৰাইডে, ইষ্টাৰ, নাওৰুজ আৰু ভাৰতীয় নৱবৰ্ষৰ দৰে অনুষ্ঠানত দৰিদ্ৰ লোকসকলক সহায় কৰা হ’ব। একে সময়তে জিলা পৰ্যায়তো আয়োজন কৰা হ’ব ঈদ মিলন উৎসৱ।
কিটত কি থাকিব?
প্ৰতিটো কিটত বিভিন্ন ধৰণৰ সামগ্ৰী থাকিব। খাদ্য সামগ্ৰীৰ উপৰিও এই কিটত চাউল, খেজুৰ, শুকান ফল, চেনি, কাপোৰ আৰু কুৰ্তাকে ধৰি অন্যান্য সামগ্ৰীও থাকিব। মহিলাৰ বাবে কিটত কপাহী কাপোৰ আৰু পুৰুষৰ কিটত কুৰ্তা-পাইজামা থাকিব। প্ৰতিটো কিটৰ দাম প্ৰায় ৫০০ৰ পৰা ৬০০ টকা। এই কিটসমূহে দৰিদ্ৰ মুছলমান পৰিয়ালসমূহক ঈদৰ আনন্দ উপভোগ কৰাত সহায় কৰিব।
ৰাজনৈতিক দষ্টিভংগী আৰু লক্ষ্য
সংখ্যালঘু মৰ্চাৰ ৰাষ্ট্ৰীয় সংবাদ মাধ্যমৰ মুৰব্বী ইয়াছিৰ জিলানীয়ে কয় যে “সৌঘট-ই-মোডী” প্ৰকল্পৰ লক্ষ্য হৈছে মুছলমান সম্প্ৰদায়ৰ মাজত বিভিন্ন চৰকাৰী কল্যাণমূলক আঁচনিৰ প্ৰচাৰ, বিজেপিৰ উদ্দেশ্য মনত ৰাখি, বিজেপি আৰু এনডিএৰ প্ৰতি ৰাজনৈতিক সমৰ্থন সংগ্ৰহ কৰা।
তেওঁ লগতে কয়, “এই অভিযানৰ মূল উদ্দেশ্য হৈছে মুছলমানসকলৰ মাজত বিজেপিৰ কল্যাণমূলক আঁচনিৰ বাৰ্তা প্ৰেৰণ কৰা আৰু ঈদ আৰু অন্যান্য ধৰ্মীয় উৎসৱৰ সময়ত তেওঁলোকক সাহায্য প্ৰদান কৰা।”
প্ৰথমবাৰৰ বাবে সংখ্যালঘু মৰ্চাৰ পদক্ষেপ
বিজেপিৰ সংখ্যালঘু মৰ্চাৰ এইটোৱেই প্ৰথম বৃহৎ পদক্ষেপ, যিয়ে ৩২ লাখ মুছলমান পৰিয়ালক যোগাযোগ কৰাত সহায় কৰিব। গোটটোৰ উদ্দেশ্য হৈছে সংখ্যালঘু জনগোষ্ঠীৰ মাজত বিভিন্ন চৰকাৰী সুবিধাৰ বিষয়ে সজাগতা সৃষ্টি আৰু তেওঁলোকৰ দৃষ্টিভংগী সলনি কৰা।
ৰাজনৈতিক আৰু সামাজিক দুয়োটা দৃষ্টিকোণৰ পৰা এই পদক্ষেপ গুৰুত্বপূৰ্ণ। সামাজিকভাৱে ঈদৰ সময়ত দৰিদ্ৰ মুছলমান পৰিয়ালক বিশেষ সাহায্য প্ৰদান কৰিব। ৰাজনৈতিকভাৱে বিজেপিৰ বাবে এইটো গুৰুত্বপূৰ্ণ কাৰণ বিশেষকৈ দেশজোৰা নিৰ্বাচন আগতীয়া হোৱাৰ সময়ত দলটোৱে মুছলমান সম্প্ৰদায়ৰ মাজত নিজৰ স্থিতি সুদৃঢ় কৰিব বিচাৰিছে।
বিজেপিৰ “সৌঘট-ই-মোডী” আঁচনি মুছলমান সমাজৰ বাবে এক গুৰুত্বপূৰ্ণ পদক্ষেপ। যিয়ে তেওঁলোকৰ বাবে ঈদৰ আনন্দ সহজ কৰি তুলিব। এই পদক্ষেপৰ জৰিয়তে বিজেপিয়ে এটা বাৰ্তা প্ৰেৰণ কৰিব বিচাৰিছে। যাতে তেওঁলোকে মুছলমানৰ কল্যাণৰ বাবে চৰকাৰী প্ৰকল্পৰ পৰা লাভৱান হ’ব পাৰে আৰু দলৰ প্ৰতি সমৰ্থন বৃদ্ধি কৰিব পাৰে।
