আমেৰিকাত অবৈধভাৱে প্ৰৱেশৰ প্ৰৱণতা নিম্নগামী; ভাৰতীয় অনুপ্ৰৱেশ হ্ৰাস পাইছে ৬৯শতাংশ

এসময়ত হাজাৰ হাজাৰ ভাৰতীয়ই উন্নত জীৱনৰ আশাত অবৈধভাৱে আমেৰিকাত প্ৰৱেশ কৰাৰ বিপদ মূৰ পাতি লৈছিল। বহু দেশৰ সীমা অতিক্ৰম কৰি কোটি কোটি টকা খৰছ কৰা আৰু নিজৰ জীৱনকো তুচ্ছ-তাচ্ছিল্য কৰাটোও এটা নিয়মীয়া ঘটনা আছিল। অৱশ্যে এই ধাৰাত এইবাৰ ডাঙৰ বিপৰ্যয় দেখা গৈছে। আমেৰিকাৰ সীমান্তৰক্ষী সংস্থাৰ শেহতীয়া তথ্য অনুসৰি ২০২৩ চনৰ তুলনাত অবৈধভাৱে আমেৰিকাত প্ৰৱেশ কৰিবলৈ চেষ্টা কৰা ভাৰতীয়ৰ সংখ্যা ৬৯ শতাংশ হ্ৰাস পাইছে।

আমেৰিকাৰ শুল্ক আৰু সীমা সুৰক্ষাই (চিবিপি) ২০২৬ বিত্তীয় বৰ্ষৰ মে’ মাহলৈকে প্ৰকাশ কৰা তথ্য অনুসৰি চলিত বিত্তীয় বৰ্ষত সীমান্তত মুঠ ২০,৬১৪টা ‘একাউণ্টাৰ’ বা ভাৰতীয় নাগৰিকৰ সৈতে মুখামুখি হোৱাৰ তথ্য লাভ কৰা হৈছে। ইয়াৰ তুলনাত ২০২৩ বিত্তীয় বৰ্ষত এই সংখ্যা আছিল প্ৰায় ৬৭ হাজাৰ, যিটো যোৱা কেইবছৰমানৰ ভিতৰত সৰ্বাধিক।

আটাইতকৈ উল্লেখযোগ্য হ্ৰাস দেখা গৈছে মেক্সিকো সংলগ্ন দক্ষিণ-পশ্চিম সীমান্তত। তাত সীমান্তৰক্ষী আৰু ভাৰতীয়ৰ মাজত হোৱা এনকাউণ্টাৰৰ সংখ্যা মাত্ৰ ৪১৭ লৈ হ্ৰাস পাইছে, যিটো ২০২৩ চনৰ তুলনাত প্ৰায় ৯৯ শতাংশ কম। আনহাতে কানাডা সংলগ্ন উত্তৰ সীমান্ততো ভাৰতীয় অনুপ্ৰৱেশৰ চেষ্টাৰ সংখ্যা ৯১ শতাংশ হ্ৰাস পাইছে। চলিত বিত্তীয় বৰ্ষত তাত ২,২৫০টা ঘটনা নথিভুক্ত হৈছে।

বিশ্লেষকসকলৰ মতে এই নাটকীয় অৱনতিৰ অন্যতম কাৰণ হৈছে আমেৰিকাৰ ৰাষ্ট্ৰপতি ড’নাল্ড ট্ৰাম্পৰ দ্বিতীয় কাৰ্যকালৰ প্ৰশাসনৰ কঠোৰ অনুপ্ৰৱেশ নীতি। কাৰ্যভাৰ গ্ৰহণ কৰাৰ পিছৰে পৰা আমেৰিকা প্ৰশাসনে অবৈধ অনুপ্ৰৱেশকাৰীৰ বিৰুদ্ধে কঠোৰ অভিযান আৰম্ভ কৰিছে। সীমান্ত সুৰক্ষা শক্তিশালী কৰাৰ উপৰিও দ্ৰুত বিতাড়নৰ নীতিও ৰূপায়ণ কৰা হৈছে। ইয়াৰ প্ৰত্যক্ষ প্ৰভাৱ ভাৰতীয়ৰ ওপৰত পৰিছে।

ভাৰতৰ বৈদেশিক পৰিক্ৰমা মন্ত্ৰালয়ে জুন মাহত প্ৰকাশ কৰা তথ্য অনুসৰি ২০২৬ চনৰ প্ৰথম ছমাহত আমেৰিকাৰ পৰা ভাৰতলৈ ১০৭৬ জন ভাৰতীয়ক বিতাড়িত কৰা হৈছে। ইয়াৰ পূৰ্বে ২০২৫ চনত গোটেই বছৰটোত ৩৫০০ৰো অধিক ভাৰতীয়ক বিতাড়িত কৰা হৈছিল, যিটো যোৱা ১৬ বছৰৰ ভিতৰত সৰ্বাধিক। যোৱা বছৰৰ ফেব্ৰুৱাৰী মাহত আমেৰিকাৰ বিমানে ভাৰতীয় বিতাড়িত লোকসকলক একাধিক পৰ্যায়ত অমৃতসৰ আৰু দিল্লীলৈ ঘূৰাই আনিছিল। সেই সময়ত মহিলা আৰু শিশুক হেণ্ডকাফ আৰু শিকলিৰে লগাই ঘূৰাই পঠোৱাৰ অভিযোগক কেন্দ্ৰ কৰি আন্তঃৰাষ্ট্ৰীয় পৰ্যায়ত বিতৰ্কৰ সৃষ্টি হৈছিল।

অনুপ্ৰৱেশ বিশেষজ্ঞসকলৰ মতে কেৱল কঠোৰ প্ৰশাসনিক ব্যৱস্থাই নহয়, বৃহৎ আৰ্থিক বিপদেও ভাৰতীয়সকলক নিৰুৎসাহিত কৰি তুলিছে। নিক্সস্কেন চেণ্টাৰৰ ইমিগ্ৰেচন বিশেষজ্ঞ গিলবাৰ্ট গুয়েৰাৰ মতে ভাৰতৰ পৰা অবৈধভাৱে আমেৰিকালৈ যোৱাটো ব্যয়বহুল। কিন্তু এতিয়া ধৰা পৰা আৰু বিতাড়নৰ আশংকা ইমানেই বাঢ়িছে যে বহু লোকে আৰু এই বিনিয়োগক লাভজনক বুলি নাভাবে।

তেওঁৰ মতে, মধ্য আমেৰিকাৰ কিছুমান দেশৰ নাগৰিকৰ দৰে ভাৰতীয়সকলৰ বাবে বাৰে বাৰে সীমান্ত পাৰ হ’বলৈ চেষ্টা কৰাটো সহজ নহয়। কাৰণ অবৈধ যাত্ৰাৰ বাবে লাখৰ পৰা কোটি টকা খৰচ হয়। ফলত বিফল হ’লে ক্ষতিৰ সৈতে মোকাবিলা কৰাটো অতি কঠিন হৈ পৰে।

একাংশ বিশেষজ্ঞৰ মতে ভাৰতীয়সকলৰ ‘আমেৰিকান ড্ৰীম’ৰ বাবে অবৈধ পথ বাছি লোৱাৰ প্ৰৱণতা তেওঁলোকৰ মাজত বহু পৰিমাণে হ্ৰাস পাইছে। অৱশ্যে উচ্চ শিক্ষা, কৰ্মসংস্থাপন আৰু আইনী মাধ্যমেৰে দক্ষ পেছাদাৰী ব্যক্তিৰ প্ৰব্ৰজনৰ ক্ষেত্ৰত ভাৰতীয়সকলৰ বাবে এতিয়াও আমেৰিকা অন্যতম মূল গন্তব্যস্থান হৈয়েই আছে।