নাগৰিকত্ব সংশোধনী বিধেয়কক লৈ সমগ্ৰ উত্তৰ-পূবতে ক্ষোভৰ জুই জ্বলি থকাৰ সময়ত বিধেয়কখন ৰাজ্যসভাত গৃহীত নহয় বুলি অভয় বাণী প্ৰদান কৰিছে অটল বিহাৰী বাজপেয়ী চৰকাৰৰ অতি বিশ্বস্ত মন্ত্ৰী তথা বিজেপিৰ প্ৰাক্তন কেন্দ্ৰীয় নেতা যশৱন্ত সিনহাই।
“মই অসমলৈ অহাৰ আগত বিভিন্নজনৰ সৈতে কথা পাতি যি বুজিলো, বিজেপিৰ বাহিৰে ৰাজ্যসভাত এই বিধেয়কক কোনেও সমৰ্থন নকৰে। তেনে ক্ষেত্ৰত বিজেপিয়ে বিধেয়কখন ৰাজ্যসভাত গৃহীত কৰাব নোৱাৰিব”, দেওবাৰে গুৱাহাটীৰ মাছখোৱাস্থিত প্ৰাগজ্যোতি সাংস্কৃতিক প্ৰকল্পক অসম নাগৰিক সমাজৰ দ্বাৰা আয়োজিত ‘দেশৰ বৰ্তমান অৱস্থা আৰু ভৱিষ্যতৰ গতিপথ’ শীৰ্ষক বক্তৃতা প্ৰদান কৰি শংকাত থকা উত্তৰ-পূববাসীক এই আশ্বাস প্ৰাক্তন বিজেপি নেতাজনৰ।
তেওঁ নাগৰিকত্ব সংশোধনী বিধেয়কখন সাংবিধানিক, নৈতিক, আইনগত, অসম চুক্তি আদি কেইবাটাও দিশৰ পৰা ত্ৰুটিপূৰ্ণ বুলি দাবী কৰে।
“এনেকুৱা এখন ভুল বিধেয়ক ৰাজ্যসভাৰ সভাপতি, উপ-সভাপতি বা প্ৰিজাইডিং অফিচাৰে সদনত হোৱা হুলস্থূলীয়া পৰিৱেশৰ মাজেৰে গৃহীত কৰোৱাৰ চেষ্টা কৰিবলৈও সাহস নকৰিব”, পূৰ্বে বিত্ত, বৈদেশিক পৰিক্ৰমা আদিৰ দৰে গুৰুত্বপূৰ্ণ দপ্তৰৰ দায়িত্বত থকা সিনহাই কয়।
ইপিনে নৰেন্দ্ৰ মোদী নেতৃত্বাধীন চৰকাৰখনৰ কাৰ্যকালৰ এইখনেই শেষ সংসদৰ অধিৱেশন, গতিকে এইবাৰ বিধেয়কখন গৃহীত কৰাব নোৱাৰিলে আগলৈ আৰু নোৱাৰে বুলিও সিনহাই মন্তব্য কৰে।
তাৎপৰ্য্যপূৰ্ণভাৱে তেওঁ বিজেপি পুনৰ কেন্দ্ৰত শাসনলৈ নাহে বুলি এটা পূৰ্বানুমান দাঙি ধৰে। “মই আত্মবিশ্বাসেৰে কওঁ এই চৰকাৰখন আৰু দ্বিতীয়বাৰলৈ জয়ী হ’ব নোৱাৰে”, সিনহাৰ দাবী।
অহা লোকসভা নিৰ্বাচনত বিজেপিয়ে উত্তৰ-পূবত যাতে এখনো আসন নাপায় তাৰ বাবে উত্তৰ-পূবৰ ৰাইজক ঐক্যবদ্ধ হ’বলৈও তেওঁ আহ্বান জনায়।
নাগৰিকত্ব সংশোধনী বিধেয়কৰ বিপক্ষে উত্তৰ-পূবৰ ৰাইজৰ লগত তেওঁ পূৰ্ণ শক্তিৰে থাকিব বুলি কৈ যেতিয়াই প্ৰয়োজন হয় এই অঞ্চলৰ ৰাইজৰ লগত তেওঁ যুদ্ধত নামিবলৈও সাজু বুলি মন্তব্য কৰে।
উল্লেখযোগ্য যে যশৱন্ত সিনহাৰ পুতেক জয়ন্ত সিনহা বিজেপিৰ এজন সাংসদ আৰু তেওঁ মোদী চৰকাৰত অসামৰিক বিমান পৰিবহণ দপ্তৰৰ ৰাজ্যিক মন্ত্ৰী।
