তেজপুৰ আইন মহাবিদ্যালয়ত আয়কৰ বিভাগৰ তালাচী; টি ডি এছৰ অনিয়মৰ অভিযোগ

২০১৬ চনৰ পৰাই ডি টি এছ নিদিয়াৰ অভিযোগত তেজপুৰ আইন মহাবিদ্যালয়ত আয়কৰ বিভাগৰ এটা বিশেষ দলে ২২ অক্টোবৰত মহাবিদ্যালয়খনত তালাচী অভিযান চলায়।

আয়কৰ বিভাগৰ দলটোৱে তালাচীৰ পিছত মহাবিদ্যালয়খনৰ উপাধ্যক্ষ দুলুমনি নাথ আৰু হিচাপ পৰীক্ষক অনুৰাগ হাজৰিকাৰ জেৰা কৰা বুলি জানিব পৰা গৈছে।

অভিযোগ মতে, উত্তৰ অসমৰ আগশাৰীৰ আইন মহাবিদ্যালয়খনৰ অধ্যক্ষ ড০ ভুৱন চন্দ্ৰ বৰুৱাই টি ডি এছ (Tax Deducted at Source) দাখিল নকৰাত আয়কৰ বিভাগৰ সন্দেহ ওপজে আৰু মহাবিদ্যালয়খনত অভিযান চলোৱাৰ সিদ্ধান্ত লয়।

অধ্যক্ষ ড০ ভুৱন চন্দ্ৰ বৰুৱাৰ বিৰুদ্ধে মহাবিদ্যালয়খনৰ পুঁজিৰ অপব্যৱহাৰ কৰাৰ অভিযোগো আছে।

বৰুৱাই নিজৰ এজন আত্মীয়ৰ একাউণ্টলৈ মহাবিদ্যালয়ৰ পুঁজিৰ ধনৰ অংশ ট্ৰেন্সফাৰ কৰাৰ দৰে গুৰুতৰ অভিযোগো উত্থাপন হৈ আহিছিল।

১৯৭২ চনতে স্থাপিত মহাবিদ্যালয়খন গুৱাহাটী বিশ্ববিদ্যালয়ৰ সৈতে সংযুক্ত আৰু উত্তৰ অসমত ইয়াৰ যথেষ্ট জনপ্ৰিয়তা আছে।

মহাবিদ্যালয়খনে ৩ বছৰীয়া (স্নাতক) এল এল বি ডিগ্ৰী দিয়াৰ লগতে ৫ বছৰীয়া ইণ্টিগ্ৰেটেড বি এ এল এল বি আৰু দুবছৰীয়া এ এল এম ডিগ্ৰী আগ বঢ়াই আহিছে।