মধ্য প্ৰদেশ, মহাৰাষ্ট্ৰ, ৰাজস্থান আৰু গুজৰাট এই ৫খন ৰাজ্যৰ ৩৫টা স্থানত থকা দেশৰ অনত্যম বৃহৎ সংবাদ প্ৰতিষ্ঠান হিন্দী দৈনিক ভাস্কৰ গ্ৰুপৰ কাৰ্যালয়ত বৃহস্পতিবাৰে আয়কৰ বিভাগে তালাচী চলায়।
গ্ৰুপটোৰ কেইবাজনো প্ৰম’’টাৰৰ ঘৰ তথা কাৰ্যালয়তো তালাচী চলোৱা হয়।
দীৰ্ঘদিন ধৰি আয়কৰ ফাঁকি দিয়াৰ অভিযোগত এইদৰে তালাী চলোৱা বুলি কোৱা হৈছে। আনহাতে, উত্তৰ প্ৰদেশৰ এটা টিভি চেনেলৰ কাৰ্যালয়তো তালাচী চলোৱা হয়।
বাতৰি অনুসৰি, দৈনিক ভাস্কৰ গ্ৰুপৰ জয়পুৰ, আহমেদাবাদ, ভূপাল আৰু ইন্দোৰৰ কাৰ্যালয়ত তালাচী চলোৱা হয়। সেইদৰে, উত্তৰ প্ৰদেশৰ ভাৰত সমাচাৰ নামৰ চেনেলৰ কাৰ্যালয়তো তালাচী চলোৱা হয়।
ভাৰত সমাচাৰৰ লক্ষ্ণৌৰ কাৰ্যালয় আৰু সম্পাদকৰ ঘৰত তালাচী চলোৱা হৈছে। এই চেনেলটোৱে বৰ্তমান কেইবাটাও বিষয়ত উত্তৰ প্ৰদেশ চৰকাৰৰ বিৰুদ্ধে সমালোচনা কৰিছিল।
আয়কৰ বিভাগে দাবী কৰা মতে কৰ ফাঁকি দিয়াৰ প্ৰমান পোৱাৰ পাছত চেনেলটোৰ কাৰ্যালয়ত তালাচী কৰা হৈছে।
বিৰোধীসকলে দাবী কৰা মতে, দৈনিক ভাস্কৰ আৰু ভাৰত সমাচাৰে কোভিড মোকাবিলাত চৰকাৰৰ ব্যৰ্থতাৰ কথা দাঙি ধৰিছিল।
কংগ্ৰেছ নেতা জয়ৰাম ৰমেশে টুইট কৰি কয় যে কোভিড মোকাবিলাত শোচনীয়ভাৱে ব্যৰ্থ হৈছে মোদী চৰকাৰ। দৈনিক ভাস্কৰে সেই কথা কাকতখনত তুলি ধৰিছিল। এতিয়া তেওঁলোকে তাৰ মূল্য ভৰিবলগীয়া হৈছে।
দৈনিক ভাস্কৰ গ্ৰুপ দেশৰ বৃহত্তম কাকত গোষ্ঠীৰ অন্যতম। চৰকাৰৰ বিৰুদ্ধে কলম তুল লোৱাৰ বাবেই এতিয়া গণতন্ত্ৰৰ কণ্ঠৰোধ কৰাৰ চেষ্টা চলোৱাৰ অভিযোগ উঠিছে।
আনহাতে, বিৰোধীয়ে সংবাদ পত্ৰই দাঙি ধৰা তথ্যৰ ভিত্তিতে চৰকাৰক সমালোচনাৰে থকা সৰকা কৰাৰ বাবে এইদৰে চৰকাৰে পৰোক্ষভাৱে ৰাজনৈতিক প্ৰতিহিংসাৰ আশ্ৰয় লোৱাৰ অভিযোগ উঠিছে।
