সাম্প্ৰতিক সময়ত কেঞ্চাৰ ৰোগৰ হাৰ ভয়াৱহ হাৰত বৃদ্ধি পোৱা পৰিলক্ষিত হৈছে। কেঞ্চাৰৰ চিকিৎসা পদ্ধতি বৰ্তমান পূৰ্বৰ তুলনাত সুলভ হৈছে যদিও এই চিকিৎসা পদ্ধতি যথেষ্ট ব্যয়বহুল হোৱা দেখা যায়।
সেয়ে আক্ৰান্ত হোৱোৰ পূৰ্বেই কেঞ্চাৰ প্ৰতিৰোধৰ বাবে যথাসম্ভৱ সাৱধানতা অৱলম্বন কৰা উচিত। কেঞ্চাৰ প্ৰতিৰোধৰ কোনো নিশ্চিত পদ্ধতি নাই যদিও জীৱনশৈলী তথা খাদ্যৰ সজাগতাই কেঞ্চাৰৰ সম্ভাৱনা হ্ৰাস কৰিব পাৰে।
মূলতঃ ফল-মূল, শাক-পাচলি, প্ৰটিনযুক্ত সুষম খাদ্য গ্ৰহণ কৰিলে বিভিন্ন কৰ্কট ৰোগৰ সম্ভাৱনা হ্ৰাস পাব পাৰে। সমান্তৰালভাৱে ৰেড মিট, চেনিযুক্ত খাদ্য আৰু পানীয় আৰু অত্যধিক মদ্যপান সীমিত কৰাটো বাঞ্ছনীয়।
অৱশ্যে কেৱল খাদ্যই কেঞ্চাৰৰ পৰা সুৰক্ষাৰ নিশ্চয়তা দিব নোৱাৰে। তথাপি কৰ্কট ৰোগ প্ৰতিৰোধৰ সম্ভাৱনা থকা বুলি গণ্য কৰা কিছু খাদ্যৰ বিষয়ে জানো আহকঃ
১/ জামু
ষ্ট্ৰ’বেৰী, ব্লুবেৰী, ৰাস্পবেৰী, ব্লেকবেৰী আদি প্ৰজাতিৰ জামুবোৰত এন্টিঅক্সিডেন্ট আৰু ফাইটোকেমিকেল থাকে, যি বিভিন্ন ধৰণৰ কেঞ্চাৰৰ সম্ভাৱনা হ্ৰাস কৰে।
২/ কবি জাতীয় পাচলি
ব্ৰকলি, ফুলকবি, বন্ধাকবি, ব্ৰাছেলছ স্প্ৰাউটৰ দৰে পাচলিত এনে কিছুমান যৌগ থাকে যি কেঞ্চাৰ কোষৰ বৃদ্ধি ৰোধ কৰাত সহায় কৰে বুলি প্ৰমাণিত হৈছে।
৩/ হালধি
হালধিত থকা সক্ৰিয় যৌগ কাৰকুমিনৰ যথেষ্ট এন্টি-ইনফ্লেমেটৰী আৰু এন্টিঅক্সিডেন্ট গুণ আছে, যি কেঞ্চাৰ কোষৰ বৃদ্ধিত বাধা দিব পাৰে।
৪/ গ্ৰীণ টি
গ্ৰীণ টিত বিভিন্ন ধৰণৰ পলিফেনল, বিশেষকৈ কেটেচিন থাকে, যি প্ৰধানতঃ স্তন, প্ৰষ্টেট আৰু কলৰেক্টাল কেঞ্চাৰৰ সম্ভাৱনা হ্ৰাস কৰে।
৫/ নহৰু
নহৰুত চালফাৰ যৌগ থাকে, যি কেঞ্চাৰ কোষৰ বৃদ্ধিত বাধা দিয়ে বুলি বিশেষজ্ঞসকলে সদৰী কৰিছে।
৬/ বিলাহী
বিলাহীত প্ৰচুৰ পৰিমাণে লাইকোপেন নামৰ এক শক্তিশালী এন্টিঅক্সিডেন্ট থাকে, যি প্ৰষ্টেট কেঞ্চাৰৰ সম্ভাৱনা হ্ৰাস কৰে।
৭/ বাদাম
বাদামত প্ৰচুৰ পৰিমাণে এন্টিঅক্সিডেন্ট, স্বাস্থ্যকৰ চৰ্বি, আৰু ফাইবাৰ থাকে, যি প্ৰদাহ আৰু অক্সিডেটিভ চাপৰ বিৰুদ্ধে যুঁজ দিয়াত সহায় কৰিব পাৰে, যাৰ ফলত কেঞ্চাৰৰ সম্ভাৱনা হ্ৰাস পায়।
