সোমবাৰৰ পৰা অনিৰ্দিষ্টকাললৈ অসমত ‘চকা বন্ধ।‘
এই চকা বন্ধ ঘোষণা কৰিছে সদৌ অসম মটৰ পৰিবহণ সন্থাই।
নৰ্থ ইষ্ট নাওৰ সৈতে হোৱা টেলিফোনিক বাৰ্তালাপত এই কথা জনাইছে সন্থাৰ সাধাৰণ সম্পাদক প্ৰদীপ দাসে।
কি দাবীৰে এই অনিৰ্দিষ্টকালীন চকা বন্ধ ঘোষণা কৰিছে বুলি আমাৰ সাংবাদিকে সোধাত দাসে কয়, ‘লকডাউনৰ মাজত আমাৰ কৰ ৰেহাই দিবলৈ বাৰম্বাৰ আহ্বান জনাই আহিছিলো। যিহেতু যাত্ৰী ৫০ শতাংশ কঢ়িয়াব লাগে গতিকে আমাৰ কৰো ৫০ শতাংশ ৰেহাই দিব লাগে। ৬ মাহ কাল আমি গাড়ী চলাচল নকৰাকৈয়ে এনেই বীমা বহন কৰিলো। আমাৰ বীমাৰ সময় ৬ মাহ বৃদ্ধি কৰিব লাগে।‘
ইপিনে, য’তে ত’তে টোলগেটসমূহ হোৱাৰ বাবে গাড়ীৰ মালিকৰ ওপৰত মাধমাৰ সোধোৱাৰ দৰে হৈছে বুলি উল্লেখ কৰি তেওঁ কয় ‘এই টোলগেটৰ জৰিয়তে চৰম অৰাজকতা চলিছে। গুৱাহাটীৰ পৰা বাইহাটা চাৰিআলি পাৰ হ’লে ১৩৫ টকা লয় আৰু বেলেগ জিলাৰ পৰা অহা যাত্ৰীবাহী বাহনৰ পৰা ৫৩৫ টকা লয়। এইবিলাক কোন দেশৰ নিয়ম?’
উক্ত দাবী সম্বলিত এখন স্মাৰক পত্ৰ পৰিবহন আয়ুক্তলৈ প্ৰেৰণ কৰা হৈছে বুলি দাসে উল্লেখ কৰি লগতে কয় ‘যদি দেওবাৰৰ ভিতৰত আমাৰ দাবীসমূহ মানি নলয় তেন্তে সোমবাৰৰ পুৱাৰ পৰা অনিৰ্দিষ্টকালীনভাৱে চকা বন্ধ ৰাখিম বা যাত্ৰীবাহী গাড়ীৰ চলাচল বন্ধ ৰাখিম।‘
ইপিনে, ৫০ শতাংশ যাত্ৰী কঢ়িয়াবৰ বাবে অনুমতি দিয়াৰ সমান্তৰালকৈ যাত্ৰীৰ পৰা ৫০ শতাংশ ভাড়া বেছিকৈ ল’বলৈ অনুমতি দিবলৈ মটৰ পৰিবহন সন্থাই আহ্বান জনায়।
