হাইড্ৰ’ক্সিক্লৰ’কুইন বিচাৰি অনুৰোধ জনোৱা প্ৰায় ২৫খন দেশলৈ এই ঔষধবিধ ৰপ্তানিত ভাৰতে অনুমোদন জনাইছে।
দেশত এই ঔষধবিধৰ মজুত সম্পৰ্কে পৰ্যালোচনা কৰাৰ পাছতে সিদ্ধান্তটো গ্ৰহণ কৰা হয়।
বাতৰি অনুসৰি অনুমোদনৰ ভিতৰত বাণিজ্যিক অৰ্ডাৰৰ পৰা সাহায্যলৈকে সামৰি লোৱা হৈছে।
এই ২৫খন দেশলৈ হাইড্ৰ’ক্সিক্লৰ’কুইনৰ উপৰিও পেৰাচেটামলো ৰপ্তানিত অনুমোদন জনোৱা হৈছে।
আমেৰিকাৰ চৰকাৰে গেম-চেঞ্জাৰ (পৰিস্থিতি সলনি কৰিব পৰা) বুলি আখ্যা দিয়া এই ঔষধবিধৰ বাবে ভাৰতে ৩০খন দেশৰ পৰা অনুৰোধ লাভ কৰিছিল যদিও মেডিকেল কমিউনিটিয়ে এই সন্দৰ্ভত এতিয়াও এক সহমতত উপনীত হ’ব পৰা নাই।
ভাৰতলৈ অনুৰোধসমূহ কেবল কূটনৈতিক দিশৰ পৰাই অহা নাই। কেইবাজনো বিশ্ব নেতাই ব্যক্তিগতভাৱেও প্ৰধান মন্ত্ৰী নৰেন্দ্ৰ মোদীক আহ্বান জনাইছিল।
যোৱা ২৪ ঘন্টাত আমেৰিকা যুক্তৰাষ্ট্ৰৰ ৰাষ্ট্ৰপতি ডোনাল্ড ট্ৰাম্প আৰু ব্ৰাজিলৰ ৰাষ্ট্ৰপতি জৈৰ এম ব’লছনাৰোৱে তেওঁলোকৰ অনুৰোধত অনুমোদন জনোৱাৰ বাবে ভাৰতক ধন্যবাদ জনাইছে।
আমেৰিকাৰ ৰাষ্ট্ৰপতিয়ে ‘ভাৰত আৰু ভাৰতীয় জনসাধাৰণক ধন্যবাদ’ দি কৈছে,’’ পাহৰি যাব নোৱাৰিম, প্ৰধান মন্ত্ৰী নৰেন্দ্ৰ মোদী, কেবল ভাৰতক সহায় কৰাৰ বাবে দিয়া আপোনাৰ শক্তিশালী নেতৃত্বৰ বাবেই নহয়, কিন্তু এই যুঁজত মানৱতাৰ পক্ষ লোৱাৰ বাবেও আপোনাক ধন্যবাদ।‘’
ইপিনে ব্ৰাজিলৰ ৰাষ্ট্ৰপতিয়ে ৰাষ্ট্ৰক উদ্দেশ্যি দিয়া ভাষণত কৈছে: ‘’আমাৰ বাবে বহুত ভাল খৱৰ আছে। ভাৰতৰ প্ৰধান মন্ত্ৰী নৰেন্দ্ৰ মোদীৰ সৈতে হোৱা মোৰ প্ৰত্যক্ষ বাৰ্তালাপৰ ফলস্বৰূপে শনিবাৰৰ ভিতৰত আমি হাইড্ৰ’ক্সিক্লৰ’কুইনৰ উৎপাদন চলাই নিয়াৰ বাবে কেঁচা সামগ্ৰী লাভ কৰিম যাতে আমি COVID-19 ৰোগীৰ লগতে মেলেৰিয়া, আৰ্থাৰাইটিছ আদিতো চিকিৎসা আগবঢ়াব পাৰো।‘’
তেওঁ লগতে কয়,’’ব্ৰাজিলৰ জনসাধাৰণক এনে সময়ত সহায় কৰাৰ বাবে মই প্ৰধান মন্ত্ৰী নৰেন্দ্ৰ মোদী আৰু ভাৰতৰ জনসাধাৰণক ধন্যবাদ জনাইছো।‘’
